ނޫސްވެރިންގެ ޖަމިއްޔާގެ ހަރަކާތްތައް ފަށައި، އާންމު އިންތިޚާބު ބާއްވަނީ

ރާއްޖޭގެ ހުރިހާ މީޑިޢާތަކެއްގެ ނޫސްވެރިން ހިމެނޭ ގޮތުން ހިންގަމުން އައި މޯލްޑިވްސް ޖާރނަލިސްޓް އެސޯސިއޭޝަން (އެމްޖޭއޭ)ގެ ޙަރަކާތްތައް އަލުން ހިންގަން ފެށުމަށް ނިންމައިފިއެވެ.

އާދިއްތަ ދުވަހު ރޭ އެމްޖޭއޭ އިން ނެރެފައިވާ އިއުލާނެއްގައި ބުނެފައިވަނީ އެމްޖޭއޭގެ ހަރަކާތްތައް ނުހިނގާ އޮންނަތާ ގިނަ ދުވަސްތަކެއް ވުމަށްފަހު އެ ޖަމްޢިއްޔާގެ ހަރަކާތްތައް އަލުން ހިންގަން ނިންމައި, ބެލެނިވެރި ފަރާތުން އަންނަ ސެޕްޓެމްބަރު މަހުގެ 13ގެ ކުރިން ހިންގާ ކޮމިޓީ އިންތިހާބު ކުރުމަށް އަންގާފައިވާކަމަށެވެ. އެހެންކަމުން ނޫސްވެރިން އެދޭ ބަދަލުތަކާއެކު އެ ޖަމްއިއްޔާގެ ހަރަކާތްތައް އަލުން ފަށައިގަތުމަށް ޖަމްއިއްޔާގެ ހިންގާ ގަވާއިދުގެ ދަށުން އަންގައި، އުސޫލުތަކާ އެއްގޮތަށް އަމަލުކުރުމަށް މަސްއޫލުވެރިން ވަނީ ނިންމައިފައިކަމަށް ބުނެފައިވެއެވެ.

ބަޔާނުގައި ބުނެފައިވަނީ "ހާއްސަ ގޮތުން ކުރާ އާއްމު ޖަލްސާ" އެއް އަންނަ ސެޕްޓެމްބަރު 5 ވަނަ ދުވަހު މެންދުރުފަހު 2:00 ގައި ބާއްވައި, އާ ހިންގާ ކޮމިޓީގެ މަގާމުތަކަށް މެންބަރުން އިންތިހާބު ކުރުމަށް ވަނީ ނިންމާފައިކަމަށެވެ.

މީގެއިތުރުން ޖަމިއްޔާ، ނުހިންގާ ގިނަ ދުވަސްތަކެއްވެފައިވުމުގެ ސަބަބުން ޖަމިއްޔާގެ މެމްބަރުންގެ ދަފްތައުގެ ސައްހަކަން ގެއްލިފައިވާތީ، ނޫސްވެރިކަމުގެ ދާއިރާއިން އެމްޖޭއޭގެ މެމްބަރުންގެ ގޮތުގައި ތިބިފަރާތްތައް ވަކިވެފައިވުން، ކުރީގެ ދަފްތަރު ބާތިލްކޮށް އާ މެމްބަރުންގެ ދަފްތަރެއް އެކުލަވާލުމަށް ވަނީ ނިންމާފައެވެ. އެހެންކަމުން އެމްޖޭއޭގެ މެންބަރެއްގެ ގޮތުގައިވުމަށް ދިވެހި ހުރިހާ ނޫސްވެރިން ޖާނަލިސްޓުން، ޕްރީލްންސާސް ކޮންޓްރިބިއުޓާސް ފޮޓޯގްރާފާސް ކާޓޫނިސްޓުންގެ އާޓިސްޓުން އަދި އެޑިޓަރުންނަން އަލުންވަނީ ހުޅުވާލާފައެވެ.

މި ފުރުސަތުގައި މެންބަރަކަށް ނުވާ ފަރާތްތަކަށް ހާއްސަގޮތުން ކުރާ އާންމު ޖަލްސާ ބާއްވާ، އާ ހިންގާ ކޮމިޓީ އިންތިހާބު ކުރެވެންދެން މެންބަރަކަށް ވުމުގެ ފުރުސަތު ނޯންނާނެކަމަށް ބުނެފައިވެ އެވެ. އަދި މެމްބަޝިޕްގެ އާ ދަފްތަރު ސެޕްޓެމްބަރު 1 ވަނަ ދުވަހު އާންމުކޮށް އިއުލާން ކުރެވޭނެ ކަމަަށް އެމްޖޭއޭ އިން ވަނީ ބުނެފަ އެވެ. އެ ދަފްތަރަށް ޝަކުވާ ހުށަހެޅުމަށް ސެޕްޓެމްބަރު މަގުގެ 3 ވަނަ ދުވަހުގެ މެންދުރު 2:00 އަށް ހުޅުވާލުމަށް އެ ޖަމްއިއްޔާއިން ވަނީ ނިންމައިފަ އެެވެ.

ފައިނަލް ދަފްތަރު ސެޕްޓެމްބަރު މަހުގެ 4 ވަނަ ދުވަހު އާންމުކޮށް އިއުލާންކުރެވޭނެ ކަމަށް ވަނީ ބުނެފައެވެ. ހާއްސަގޮތުން ކުރާ އާއްމު ޖަލްސާގައި ބައިވެރިވުމާއި ހިންގާ ކޮމިޓީ އިންތިހާބު ކުރަން ވޯޓް ދެވޭނީ، އެ ލިސްޓަށެވެ.

މި ޢާންމު ޖަލްސާ ބޭއްވުމާއި، އިންތިހާބުގެ ކަންކަން ކުރިއަށް ގެންދިޔުމަށް ތިން ބޭފުޅުންގެ މައްޗަށް އެކުލެވޭ އިންތިގާލީ ކޮމިޓީއަކީ އެ ޖަލްސާ ބޭއްވުން އަދި އިންތިހާބުގެ ކަންކަން ކުރިއަށް ގެންދަން ޙަވާލުކުރަން މުއައްސިސުން ވަނީ ނިންމައިފައެވެ. އެ ކޮމިޓީގައި ތިއްބަވާނީ،

1. ޒަހީނާ ރަޝީދު

2 ހުސެއިން ޙަސަން

3 މުހައްމަދު މުޒައްޔިން ނާޒިމް

ދެހާސްނުވަ ވަނަ އަހަރު އުފަންވި އެމްޖޭއޭއިން ވަނީ ދިވެހި ނޫސްވެރިކަމަށް ދިމާވި އެތަކެއް ގޮންޖެހުމަކަށް މީގެ ކުރިން އެޑްރެސްކޮށް އަޑުއުފުލާ އެކަމުގައި ގިނަ ކާމިޔާބީތަކެއްވެސް ހާސިލު ކޮށްފައެވެ. އަދި ދިވެހި ނޫސްވެރިންނަށް ތަމްރީނާއި ކިޔެވުމުގެ ގިނަ ފުރުސަތުތަކެއް ވެސް ވަނީ ހޯދައިދީފައެވެ. އެހެންކަމުން، މި ޖަމްއިއްޔާގެ ހަރަކާތްތައް އަޅުން ކުރިއަށް ގެންދިޔުމުގައި އެންމެހާ ދިވެހި ނޫސްވެރިންގެ ބައިވެރިވުމަށް އެ ޖަމްއިއްޔާއިން ވަނީ އެދިފައެވެ.