ހުސައިން ރަޝީދު ތަރުޖަމާކުރެއްވި ސަހީހް މުސްލިމްގެ 11 ވަނަ އަދަދު ނެރެފި
ހަދީސްތައް ދިރާސާކުރުމުގެ މުހިއްމު ކަމަށް އަލިއަޅުއްވައިލެއްވި
ސަހީހް މުސްލިމްގެ ތަރުޖަމާގެ، ރައީސް ނަޝީދު ނެރެދެއްވަނީ
ދީނީ އިލްމުވެރިޔާ ޝެއިހް ހުސައިން ރަޝީދު އަހުމަދު، ދިވެހި ބަހަށް ތަރުޖަމާކުރެއްވި ސަހީހް މުސްލިމްގެ ދިވެހި ބަހުގެ ތަރުޖަމާ ޝަރަހައިގެ އެގާރަ ވަނަ އަދަދު ނެރެފިއެވެ.
ހޮނިހިރު ދުވަހުގެ މެންދުރު އެމްޑީޕީގެ އޮފީހުގައި ބޭއްވި ރަސްމިއްޔާތެއްގައި ފޮތް ނެރެދެއްވީ، އެ ޕާޓީގެ ރައީސް، މުހައްމަދު ނަޝީދު އެވެ. ފޮތް ނެރެދެއްވައި ރައީސް ނަޝީދު ވަނީ ހުސައިން ރަޝީދު ކުރައްވަމުން ގެންދަވާ މަސައްކަތަށް ތައުރީފް ކުރައްވާފައެވެ. އެމަނިކުފާނު ވިދާޅުވީ، އެ މަސައްކަތަކީ ވަރަށް އަގުހުރި މުހިއްމު އަދި ބޭނުންތެރި މަސައްކަތެއް ކަމަށެވެ.
ހުސައިން ރަޝީދު ވިދާޅުވީ، ފޮތުގައި މައިގަނޑު ގޮތެއްގައި ހިމެނޭނީ ވެރިކަން ކުރުމާއި ބެހޭ ގޮތުންނާއި، ކެޔޮޅުކަން ކުރުމާއި ބެހޭ ގޮތުންނާއި ކުރުބާލު ކުރުމުގެ އިތުރުން ކައިބޮއި އުޅުމާއި ބެހޭ ގޮތުން ކަމަށެވެ. ހުސައިން ރަޝީދު ވިދާޅުވީ، ހަދީސް ދިރާސާ ކުރުމަކީ މުހިއްމު ކަމެއް ކަމަށެވެ.
އެ ފޮތް ނެރެދެއްވަމުން އޭނާ ވިދާޅުވީ، ހަދީސްގައި ކަމެއް ބަޔާންކޮށްފައި އޮތުމުން ނުފުދޭނެ ކަމަށެވެ. އޭގެ އިތުރަށް ހަދީސްއާ ގުޅޭގޮތުން އިތުރަށް ދިރާސާ ކުރަން ޖެހޭނެ ކަމަށް ވިދާޅުވިއެވެ.
ސަހީހް މުސްލިމްގެ ތަރުޖަމާގެ 11 ވަނަ އަދަދު ނެރެފައިވާއިރު، 10 ވަނަ އަދަދު ނެރެފައިވަނީ މިދިޔަ އަހަރުއެވެ. އެ ފޮތް ނެރެދެއްވީވެސް ރައީސް ނަޝީދުއެވެ.
