ގާސިމް ހައްޔަރުކުރި މައްސަލައިގައި މި ސަރުކާރުގެ ފޮތުންބަލާ ނަމަ ރައީސް ޔާމީނަށް ޓެރަރިޒަމްގެ ދައުވާ ކުރެވޭނެ ކަމަށް ކެންދޫ ދައިރާގެ މެންބަރު އަލީ ހުސައިން ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ފްރޮގްރާމުގައި ވާހަކަ ދައްކަވަމުން، މެންބަރު އަލީ ހުސައިން ވިދާޅުވީ، މި ސަރުކާރުން ނިންމި ނިންމުންތަކަށް ބަލާއިރު، ރައީސް މުހައްމަދު ނަޝީދުގެ މައްޗަށް ސަލާމަތީ ބާރު ބޭނުންކޮށްގެން މީހަކު ހައްޔަރުކުރުމުގެ ތުހުމަތުގައި ޓެރަރިޒަމްގެ ދައުވާ އުފުލާފައިވާ އިރު ރައީސް ޔާމީން ހައްޔަރުކޮށްގެން ކަމަށް ބުނެ ވެސް ޓެރަރިޒަމްގެ ދައުވާ އުފުލާފައިވާ ކަމަށެވެ. އެހެން ކަމުން ރައީސް ޔާމީނުގެ ފޮތުން ބަލާނަމަ، ގާސިމްގެ މައްސަލައިގައި ރައީސް ޔާމީނުގެ މައްޗަށް ޓެރަރިޒަމްގެ ދައުވާ އުފުލޭނެ ކަމަށް އޭނާ ވިދާޅުވި އެވެ.
އަލީ ހުސައިން ވިދާޅުވީ، ހައި ކޯޓުން ނިންމި ނިންމުމުގައި މަޖިލީހުގެ މެންބަރަކު ހައްޔަރުކުރުމަށް ކަނޑައެޅިފައިވާ އިޖުރާތްތައް ފުރިހަމަކޮށްފައިނުވާކަން ހާމަކޮށްފައިވާ ކަމަށެވެ.
"ފުލުހުން މަސައްކަތް ކުރައްވާ ހައްޔަރު ނުކޮށްވޭތޯ. ފުލުހުންނަށްވެސް ފެންނަވާ ގައުމު ބަނަވެގެންދާ މަންޒަރު. އަޅުގަނޑު ގަބޫލު ކުރާ ގޮތުގައި މިއީ ފުލުހުންވެސް ހިތުން ރުހުމުން ކުރައްވާ ކަމެއް ނޫން. އެހެން ނަމަވެސް އެބޭފުޅުންވެސް ވަޒީފާގެ ބޭނުމުގައި މަތިން އަންނަ ޕްރެޝަރެއްގެ ބޮޑުކަމުން އެގޮތެއް ނެތިގެން ގާސިމް ހައްޔަރުކުރެއްވީ. ހައްޔަރު ކުރި އިރު، އިޖުރާއަތްތައްވެސް ރަގަޅަށް ބަލާ ނުލެވުނީ." އަލީ ހުސައިން ވިދާޅުވި އެވެ.
ގާސިމްގެ މައްސަލައިގައި ކަންކަން ކުރި ގޮތުން ސަރުކާރުގެ އަތަށް ގޮވާފައި ކަމަށް އަލީ ހުސައިން ވިދާޅުވި އެވެ.
ރައީސް އަބްދުﷲ ޔާމީނުގެ ވެރިކަމަށް ވަރަށް ބޮޑަށް ފާޑުވިދާޅުވެ، ވާހަކަދައްކަވަމުން އަލީ ހުސައިން ވިދާޅުވީ، މި ސަރުކާރުން ތަރައްގީގެ ނަމުގައި ހިންގަމުންދަނީ، ކޮރަޕްޝަން ކަމަށާއި ބޮޑެތި މަޝްރޫއުތަކުގެ އަގު އެތަށް ގުނައެއް އިތުރަށްދީގެން، ކޮރަޕްޝަނުގެ އަމަލުތައް ހިންގަމުންދާ މަންޒަރު ފެންނަމުންދާ ކަމަށެވެ. އަދި މިކަމަކީ ރައްޔިތުންނަށް އެނގޭ ކަންކަން ކަމަށް އޭނާ ވިދާޅުވި އެވެ.
މިއަދު ސަރުކާރުން މަސައްކަތް ކުރަނީ، ދައުލަތުގެ ޓެކްސް އިދާރާ މީރާ ބޭނުންކޮއްގެން ރައްޔިތުންގެ އަތުން ފައިސާ ފެލުމަށް ކަމަށް އަލީ ހުސައިން ވިދާޅުވި އެވެ. ގައުމު ދަރަމުންދާ މިންވަރު ދަނީ ފެންނަމުން ކަމަށާއި، ދައުލަތުގެ ހަރަދުތައްވެސް ސަރުކާރަށް ހަމަނުޖެއްސޭ ކަމަށް ވެސް މައުލޫމާތު ލިބެމުންދާ ކަމަށް އަލީ ހުސައިން ވިދާޅުވި އެވެ.
"އަޅުގަނޑުމެންނަށް ފެނިގެން ހިގައްޖެ، ރައްޔިތުންގެ މަޖިލީސް ބޭނުންކޮށްގެން ރައީސް ޔާމީނަށް ބޭނުން އަދަދަކުން ލޯނު ނެގޭގޮތަށް ގާނޫނަށް ބަދަލު ގެނައިތަން. ބޭނުންގޮތަކަށް ބޭނުން ހަރަދެއް ކުރެވޭނެހެން ގާނޫނަށް ބަދަލު ގެނައިތަން. އަދި ބޭނުން އަދަދަކުން ސޮވެރިން ބޮންޑު ނެގުމަށްވެސް ފަހި ކުރިތަން.މިއީ ދިވެހި ރައްޔިތުން ބަލައިގަންނާނެ ކަންތައްތަކެއް ނޫން." އަލީ ހުސައިން ވިދާޅުވި އެވެ.
