މަޖިލީހުގެ ރައީސާއި 2 ވަޒީރަކު ބޭރު ކުރަން ހޯމަ ދުވަހު މަޖިލީހަށް ހުށަހަޅާނެ:ހުސައިން އަރީފް
މަޖިލީހަށް ވައްދާނީ 42 އަށްވުރެ ގިނަ ސޮޔާއެކު
ހުސައިން އަރީފް: އަދަދު ވަނީ ހަމަވެފައިކަމަށް ވަނީ ވިދާޅުވެފައި
ރައްޔިތުންގެ މަޖިލީހުގެ ރައީސާއި ސަރުކާރުގެ ދެ ވަޒީރެއްގެ އިތުބާރު ނެތްކަމުގެ މައްސަލައެއް އަންނަ ހޯމަ ދުވަހު ރައްޔިތުންގެ މަޖިލީހަށް ވައްދާނެ ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު ހުސައިން އަރީފް ވިދާޅުވެއްޖެއެވެ.
އެމްޑީއޭގެ މެންބަރުކަމުގައި ހުންނަވައިގެން ގުޅިފައިވާ ޕާޓީތަކުގެ ހަރަކާތައް ތާއީދު ކުރައްވަމުން ގެންދަވާ މެންބަރު އަރީފް މިހެން ވިދާޅުވީ ހޮނިހިރު ދުވަހުގެރޭ ކުރެއްވި ޓްވީޓެއްގައެވެ.
ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް މަޖިލީހަށް ފުރަތަމަ ވެއްދުމުގައިވެސް އިސްކޮށް ހުންނެވި އަރީފްގެ ޓްވީޓްގައި ވިދާޅުވެފައިވަނީ "ހޯމަ ދުވަހު މެންދުރު 2 ގެ ކުރިން 42 މެންބަރުންގެ ސޮޔަށްވުރެ އިތުރަށް ސޮއި އަޅައި 2 ވަޒީރަކާއި މަޖިލިސް ރައީސްގެ އިތުބާރު ނެތްކަމަށް ވައްދާނަން" ކަމަށެވެ.
އަރީފް މިހެން ވިދާޅުވެފައި މިވަނީ ރައްޔިތުންގެ މަޖިލީހުގެ ރައީސް އަދި ނައިބު ރައީސްގެ އިތުބާރު ނެތްކަމުގެ މައްސަލައެއް މަޖިލީހަށް ވައްދާފައި ވަނިކޮށް ރައީސް އަބްދުﷲ ޔާމީންގެ ޕީޕީއެމް ފެކްޝަނަށް ތާއީދު ކުރައްވާ މެންބަރުން މަޖިލީހުގެ ޤަވާއިދު އިސްލާހުކޮށް 42 މެންބަރުންގެ ސޮޔާއެކު ނޫން ގޮތަކަށް މަޖިލީހުގެ ރައީސާ ނައިބު ރައީސްގެ އިތުބާރު ނެތްކަމުގެ މައްސަލައެއް ހުށަނޭޅޭނެކަމަށް ކަނޑައަޅާފައި ވަނިކޮށެވެ.
އަރީފް މިހެން ވިދާޅުވެފައި މިވަނީ ޤަވާއިދަށް ގެނައި އިސްލާހާއެއްގޮތަށް މައްސަލަ ހުށަހެޅުމަށްޓަކައި ބޭނުންވާ 42 މެންބަރުންގެ ސޮއި ހަމަކޮށްފައިވާކަމަށް އިދިކޮޅު ޕާޓީތަކުގެ މެމްބަރުން ވިދާޅުވުމާއެކު، ޖުމްހޫރީ ޕާޓީގެ ލީޑަރ ޤާސިމް ހައްޔަރުކޮށްފައި ވަނިކޮށެވެ.
ގުޅިފައިވާ ޕާޓީތަކުން ބާއްވާ ޖަލްސާތަކުގައި އެޕާޓީތަކުގެ އިސްވެރިން ވިދާޅުވަމުން ގެންދަވަނީ "އަދަދު ހަމަވެއްޖެ" ކަމަށެވެ. އަދި 42 މެންބަރުންނަށްވުރެ އިތުރަށްވެސް މެންބަރުން ވަޑައިގެންފައިވާކަމަށް އެބޭފުޅުން ގެންދަވަނީ ވިދާޅުވަމުންނެވެ.
