މި އަހަރުގެ ދެވަނަ ކުއާޓާގައި ލިބުނު އާމްދަނީ، 2019 ވަނަ އަހަރުގެ ދެވަނަ ކުއާޓާއާ އަޅާބަލާއިރު 75 ޕަސެންޓަށްވުރެ ދަށްވެއްޖެއެވެ.

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން އާންމުކޮށްފައިވާ މިއަހަރުގެ ދެވަނަ ކުއާޓާގެ ތަފާސްހިސާބުތައް ދައްކާގޮތުން، މި އަހަރުގެ ދެވަނަ ކުއާޓާގައި ބަލައިގެންފައިވަނީ 992.72 މިލިއަން ރުފިޔާއެވެ. މިދިޔަ އަހަރުގެ ދެވަނަ ކުއާޓަރުގައި މީރާއިން ވަނީ 3.99 ބިލިއަން ރުފިޔާ ބަލައިގެންފައެވެ. އެހެންކަމުން މިއީ، މިއަހަރުގެ ދެވަނަ ކުއާޓާއާއި މިދިއަ އަހަރުގެ ދެވަނަ ކުއާޓާއާ އަޅާބަލާއިރު 75.1 ޕަސެންޓް ދަށްވުމެކެވެ.

މީރާއިން ބުނެފައިވާ ގޮތުގައި، މިއަހަރުގެ ދެވަނަ ކުއާޓާގައި މީރާއަށް ބަލައިގަތްފައިވާ އާމްދަނީގެ އަދަދު މިހާބޮޑުތައް ދަށަށް ގޮސްފައިވަނީ، ކޮވިޑް-19 އާ ގުޅިގެން ރާއްޖޭގެ ބޯޑަރުތައް ބަންދުކޮށް، ޓެކްސް އަދި ޓެކްސް ނޫން ފީތައް ދައްކަންޖެހޭ ސުންގަޑި މިއަހަރުގެ ތިންވަނަ ކުއާޓާއަށް ފަސްކޮށްދީފީފައިވާތީ ކަމަށެވެ.

މި އަހަރުގެ ދެވަނަ ކުއާޓާގައި ލިބުނު އާމްދަނީ ބެހިފައިވާ ގޮތަކަށް ބަލާއިރު، އެންމެ ބޮޑު އާމްދަނީއެއް ލިބިފައިވަނީ، ޖީއެސްޓީންނެވެ. ޖީއެސްޓީގެ ގޮތުގައި މީރާއަށް 483.36 މިލިއަން ރުފިޔާ ބަލައިގަތްފައިވާއިރު، އެއީ ލިބުނު އާމްދަނީ 48.7 ޕަސެންޓެވެ. ދެވަނައަށް އެންމެ ގިނައިން އާމްދަނީ ލިބިފައިވަނީ ރިސޯޓު ކުލިންނެވެ. ރިސޯޓު ކުލީގެ ގޮތުގައި 192.46 މިލިއަން ރުފިޔާ ލިބިފައިވާއިރު، އެއީ އާމްދަނީގެ 19.4 ޕަސެންޓެވެ.

މީގެ އިތުރުން ގްރީން ޓެކްސްގެ ގޮތުގައި 47.66 މިލިއަން ރުފިޔާ ލިބިފައިވާއިރު، އެއީ އާމްދަނީގެ 4.8 ޕަސެންޓެވެ. އެއަރޕޯޓް ޑިވެލޮޕްމަންޓް ފީގެ ގޮތުގައި 41.42 މިލިއަން ރުފިޔާ ލިބިފައިވާއިރު އެއީ، އާމްދަނީގެ 4.2 ޕަސެންޓެވެ. އަދި އެއަރޕޯޓް ސަރވިސް ޗާޖުގެ ގޮތުގައި 41.03 މިލިއަން ރުފިޔާ ލިބިފައިވާއިރު އެއީ 4.1 ޕަސެންޓެވެ.

މީރާގެ ތަފާސްހިސާބުތަކަށް ބަލާއިރު، މިއަހަރުގެ ދެވަނަ ކުއާޓާގައި ޓެކުހުގެ ގޮތުގައި 670.86 މިލިއަން ރުފިޔާގެ އާމްދަނީއެއް ލިބިފައިވާއިރު، މިއީ މިދިއަ އަހަރުގެ ދެވަނަ ކުއާޓާއާ އަޅާބަލާއިރު 79.8 ޕަސެންޓް ދަށްވުމެކެވެ. އަދި ޓެކްސް ނޫން އެހެނިހެން އާމްދަނީގެ ގޮތުގައި 321.86 މިލިއަން ރުފިޔާ ލިބިފައިވާއިރު، އެއީ މިދިއަ އަހަރުގެ ދެވަނަ ކުއާޓާއާ އަޅާބަލާއިރު 60.3 ޕަސެންޓްގެ ދަށްވުމެކެވެ.

ކޮވިޑް-19 އާ ގުޅިގެން މުޅި ދުނިޔޭގެ އިގްތިޞާދު ހީނަރުވެފައިވާ ދަނޑިވަޅުގައި ރާއްޖޭގެ އިގްތިޞާދު އެއްކޮށް ހުއްޓުމަކަށް އައެވެެ. އެގޮތުން މާރޗު މަހުގެ 27 ވަނަ ދުވަހު ރާއްޖޭގެ ބޯޑަރު ބަންދު ކުރުމަށްފަހު އަލުން ހުޅުވާފައި މިވަނީ މިދިޔަ ޖުލައި މަހުގެ 15 ވަނަ ދުވަހުއެވެ.

ރާއްޖޭގެ ބޯޑަރުތައް ހުޅުވިނަމަވެސް، ކޮވިޑް-19 ފެތުރުން ކޮންޓްރޯލް ކުރުމަށް ދުނިޔޭގެ ގައުމުތަކުން އަޅާފައިވާ ފިޔަވަޅުތަކާ ގުޅިގެން ފަތުރުވެރިން ރާއްޖެއަށް ޒިޔާރަތް ކުރުން މިވަނީ ވަރަށް ބޮޑަށް ދަށަށް ގޮސްފައެވެ. އަދި ކުރިއަށް އޮތްތަނުގައި ރާއްޖެއަށް ޒިޔާރަތް ކުރާނެ ކަމަށް ކުރިން އަންދާޒާކުރި މިންވަރާ ގާތައް ވެސް ފަތުރުވެރިން ރާއްޖެއަށް ޒިޔާރާތް ކުރާނެ ކަމަށް ނުބެލެވެއެވެ. ރާއްޖެއަށް ލިބޭ އާމްދަނީގެ 80 ޕަސެންޓް ހިއްސާކުރަނީ ފަތުރުވެރިކަމުގެ ދާއިރާއިންނެވެ.