އިންޑިއާގެ 74 ވަނަ މިނިވަން ދުވަހުގެ ތަހުނިޔާ ރައީސް ސޯލިހު ފޮނުއްވައިފި
15 އޯގަސްޓު 2020 | ހޮނިހިރު 04:25މުޅި ދުނިޔެއަށް ޑިމަކްރަސީގެ ރީތި ނަމޫނާ ދައްކުވައިދީފައިވާ ގައުމެއް
ރައީސް ސޯލިހު، އިންޑިއާގެ ބޮޑު ވަޒީރާއެކު ބޭއްވެވި ބައްދަލުކުރެއްވުމުގެ ތެރެއިން
އިންޑިއާގެ 74 ވަނަ މިނިވަން ދުވަހުގެ ތަހުނިޔާ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފޮނުއްވައިފިއެވެ.
އިންޑިއާގެ މިނިވަން ދުވަހާ ގުޅިގެން ރައީސް ސޯލިހު ކުރެއްވި ޓްވީޓެއްގައި ވިދާޅުވީ މީގެ 73 އަހަރު ފެށިގެން އިންޑިއާއަކީ، އެ ގައުމުން ގެންގުޅޭ ދިމުގްރާތީ ހަމަތަކާއި، ސުލްހައާއި ކުރިއެރުމަށްޓަކައި ކޮށްދީފައިވާ ކަންކަމުގެ ސަބަބުން، ދުނިޔެއަށް އުއްމީދު އައުކޮށްދޭ ގައުމެއް ކަމަށެވެ.
ރައީސް ސޯލިހުގެ ތަހުނިޔާގެ މެސެޖު ރައްދުކުރެއްވީ، އިންޑިއާގެ ރައީސް ރާމް ނާތް ކޯވިންދު އާއި އެ ގައުމުގެ ބޮޑުވަޒީރު ނެރެންދުރަ މޯދީގެ އިތުރުން، އެ ގައުމުގެ އެންމެހާ ރައްޔިތުންނަށެވެ.
ރައީސް ސޯލިހުގެ ސަރުކާރުގައި އިންޑިއާ އާއި ރާއްޖޭގެ ގުޅުން އިތުރަށް ވަރުގަދަ ކުރުމަށް ގިނަ މަސައްކަތްތަކެއް ކޮށްފައިވެއެވެ. މީގެ ނަތީޖާއެއްގެ ގޮތުން އިންޑިއާއިން އަންނަނީ ރާއްޖެއަށް އެކި ދާއިރާތަކުން އެހީ ފޯރުކޮށްދީ، ތަރައްގީގެ މަޝްރޫއުތަކަށާއި ދައުލަތުގެ ބަޖެޓް ސަޕޯޓަށް ފައިސާ ފޯރުކޮށްދީފައެވެ.
އިންޑިއާއިން އެ ގައުމުގެ 74 ވަނަ މިނިވަން ދުވަސް ފާހަގަކުރަމުން އަންނައިރު އެ ގައުމަށް، އިނގިރޭސީންގެ އިސްތިއުމާރުގެ ދަށުން އެ ގައުމަށް މިނިވަންކަން ލިބުނީ 15 އޯގަސްޓް 1947 ގައެވެ.
