ޗައިނާއިން މުސްލިމުން ހައްޔަރުކޮށްގެން ގެންގުޅޭ ކޭމްޕެއްގެ ތެރެއިން ވީޑިއޯއެއް އާއްމުވެއްޖެ
11 އޯގަސްޓު 2020 | އަންގާރަ 08:05ޝީ ޖިންގް ޕިންގްގެ ސަރުކާރުގެ އަމުރަށް ޗައިނާގެ ޝިންޖިއާންގައި ދިރިއުޅޭ މުސްލިމުންނަށް އަނިޔާ ކުރަން ފެށި
ޝިންޖިއާންގެ އީގަރ ދަރިކޮޅުގެ މޮޑެލްކުރާ ޒުވާނެއްކަމަށްވާ މަރްދާން ގައްޕާރް
ޗައިނާގެ ޝިންޖިއާންގައި މުސްލިމުން ހައްޔަރު ކޮށްގެން ގެންގުޅޭ ކޭމްޕަކަށް ގެންދިޔަ ޒުވާނަކު ސިއްރުން ނަގާފައިވާ ވީޑިއޯއެއް އާއްމުވެއްޖެއެވެ.
ޝިންޖިއާންގެ އީގަރ ދަރިކޮޅުގެ މޮޑެލް ކުރާ ޒުވާނެއް ކަމަށްވާ މަރްދާން ގައްޕާރް ހައްޔަރުކޮށް، އެނދެއްގައި ބިޑި އަޅުވާފައިވާ ވީޑިއޯއެއް އަމިއްލައަށް ނަގައި، ޗައިނާގެ ސޯޝަލް މީޑިއާ ޕްލެޓްފޯމްތަކަށް ވަނީ ދޫކޮށްލާފައެވެ. އެއާއެކު ޗައިނާގެ އިރުއުތުރު ޝިންޖިއާން ޕްރޮވިންސްގެ މުސްލިމުންނާ ދެކޮޅަށް އެގައުމުގެ ސަރުކާރުން ހިންގާ ލާއިންސާނީ އަމަލުތަކާ ބެހޭ ގޮތުން އިންސާނީ ހައްގުތަކަށް ވަކާލާތު ކުރާ ފަރާތްތަކުން ދައްކާ ވާހަކަތަކަށް އިތުރު ބާރެއް ވަނީ ލިބިގެން ގޮސްފައެވެ.
ގައްޕާރް ބުނި ގޮތުގައި އޭނާ ހައްޔަރު ކޮށްފައި ހުރި ޕޮލިސް ސްޓޭޝަނުން، ވީޑިއޯ ނެގިއިރު ހުރި ތަނަށް ބަދަލުކޮށްފައިވަނީ ކޮވިޑް-19 ގެ އަލާމަތްތަކެއް އޭނާގެ ކިބައިން ފެނުމުންނެވެ. ވީޑިއޯ ނެގި ފޯނު އޭނާ ގެންގުޅެފައިވަނީ ފޮރުވައިގެން ކަމަށް ބެލެވެއެވެ.
2013 ވަނަ އަހަރު ޗައިނާގެ ވެރިރަށް ބެއިޖިންގަޔާއި 2014 ވަނަ އަހަރު ކުންމިންގް ސިޓީގައި ހައްދުފަހަނަ އެޅި ބަޔަކު ދިން ހަމަލާތަކަކަށްފަހު ރައީސް ޝީ ޖިންގް ޕިންގްގެ ސަރުކާރުގެ އަމުރަށް ޗައިނާގެ ޝިންޖިއާންގައި ދިރިއުޅޭ މުސްލިމުންނަށް ބޮޑެތި އަނިޔާތަކެއް ދޭން ފެށިއެވެ. އެގޮތުން އެމީހުން ޖަލުތަކުގައި ބަންދުކޮށް، ނަފްސާނީ އަދި ޖިސްމާނީ އަނިޔާ ކުރަމުންދާ ކަމަށް އިންސާނީ ހައްގުތަކާ ބެހޭ ޖަމްއިއްޔާތަކުން ދަނީ ބުނަމުންނެވެ. އާއްމުވެފައިވާ ވީޑިއޯގައި ގައްޕާރްވެސް ވަނީ އޭނާ ހައްޔަރުކޮށްފައި ހުރި ތަނުން ބޭރުގައި މީހުންނަށް ދުވާލު ހަތަރުދަމު އަނިޔާކު ރާ އަޑު އިވޭ ކަމަށް ބުނެފައެވެ.
ބައިނަލްއަގްވާމީ ފިއްތުންތަކާއެކު ވެސް، ޝިންޖިއާންގައި ޗައިނާ ސަރުކާރުން ހިންގާ ކޭމްޕްތައް ހުއްޓުމެއް ނެތި ހިންގައެވެ.
