އިންޑިއާގެ އެހީގައި އައްޑޫގައި ގާއިމު ކުރާ އިކޯ ޓޫރިޒަމްގެ މަޝްރޫއުގައި ސޮއިކޮށްފި
ރާއްޖެއަށް ދީފައިވާ 85 މިލިއަން ރުފިޔާ
މި ޕްްރޮޖެކްޓަށް އިންޑިއާއިން ވަނީ ރާއްޖެއަށް 85 މިލިއަން ރުފިޔާ
އަވަށްޓެރި އިންޑިއާގެ އެހީގައި އައްޑޫ ސިޓީގެ ހިތަދޫ، މަރަދޫ، ފޭދޫ، ހުޅުދޫ އަދި މީދޫގައި ފަސް އިކޯ ޓޫރިޒަމް ޒޯން ގާއިމު ކުރުމުގެ މަޝްރޫއުގެ ކޮންޓްރެކްޓް އައްޑޫ ސިޓީ ކައުންސިލާ ހަވާލުކޮށްފިއެވެ.
މި މަޝްރޫއުތައް ކުރިއަށް ގެންދަނީ އިންޑިއާގެ ހައި އިމްޕެކްޓް ކޮމިއުނިޓީ ޑިވެލޮޕްމެންޓް ޕްރޮޖެކްޓް (އެޗްއައިސީޑީޕީ) ގެ ދަށުން ރާއްޖެއަށް ދީފައިވާ 85 މިލިއަން ރުފިޔާ (5.5 މިލިއަން ޑޮލަރު) ގެ އެހީގެ ދަށުންނެވެ. މި ގްރާންޓްގެ ދަށުން ހިންގޭ މިފަދަ ނުވަ ހައި- އިމްޕެކްޓް މަޝްރޫއުތައް ރާއްޖޭގެ އެކި ކަންކޮޅުތަކުގައި މިހާރު ވެސް ކުރިއަށް އެބަދެއެވެ.
އޭގެ ތެރެއިން އައްޑޫ ސިޓީގައި ގާއިމް ކުރެވޭ ގޭދޮށު މަސް ޕްލާންޓްތަކުގެ ކޮންޓްރެކްޓް ވަނީ ހަވާލު ކޮށްފައެވެ. އަދި ނުވަ މަޝްރޫއު މޮބިލައިޒް ކުރުމަށް ބޭނުންވާ އެޑްވާންސް ޖުލައި މަހުގެ 28 ވަނަ ދުވަހު ފޮރިން މިނިސްޓްރީގައި ބޭއްވި ރަސްމިއްޔާތެއްގައި ވަނީ ހަވާލުކޮށްފައެވެ.
އެ ރަސްމިއްޔާތުގައި ވާހަކަ ދައްކަވަމުން އިންޑިއާ ސަފީރު ސަންޖޭ ސުދީރު ފާހަގަކުރެއްވި ގޮތުގައި އެފަދަ އެޗްއައިސީޑީޕީ މަޝްރޫއު ތަކުގެ ފަހަތުގައިވާ ތިން މަޤްސަދެއް ވެއެވެ.
އެއީ ރަށު ރައްޔިތުންނަށް ދެމެހެއްޓެނިވި ގޮތުގައި ފައިދާ ކުރުވަނިވި ހައި-އިމްޕެކްޓް ވަސީލަތެއް ގާއިމު ކުރުމާއި، ލޯކަލް ކައުންސިލްތައް ބާރުވެރިކުރުވާ ޒިންމާދާރު ކުރުވާ، ކައުންސިލްތަކުގެ ކެޕޭސިޓީ އިތުރުކުރުމާއި، ރަށުގެ އިގްތިސާދު ކުރިއެރުވުމެވެ.
އޭގެ އިތުރުން އައްޑޫ ސިޓީގައި ގާއިމްކުރެވޭ ގޭދޮށު މަސް ޕްލާންޓްތަކުގެ ކޮންޓްރެކްޓް 22 ޖުލައި ގައި ބޭއްވުނު ރަސްމިއްޔާތެއްގައި ހަވާލުކުރެވިފައިވާކަން ސަފީރު ފާހަގަކުރެއްވިއެވެ. އައްޑޫގައި ކުރިއަށް ގެންދެވޭ ޓޫރިޒަމް އަދި ފިޝަރީޒްގެ މި 8 މަޝްރޫއުގެ ސަބަބުން އައްޑޫ ސިޓީއަށް އުމްރާނީ ގޮތުންނާއި އިގްތިސާދީ ގޮތުން ކުރިއެރުން ލިބި، ވަޒީފާގެ ބާޒާރަށް އިތުރު ފުރުސަތުތަކެއް ތައާރަފުވެގެންދާނެ ކަމށް ސަފީރު ވިދާޅުވިއެވެ.
ސަންޖޭ ސުދީރް ވިދާޅުވީ، ކޮވިޑް-19 ބަލިމަޑުކަމުގެ ސަބަބުން ދުނިޔެއަށް ކުރިމަތި ވެފައިވާ ދަތިތަކާއި އެކުގައި ވެސް ފޮރިން މިނިސްޓަރ އަބްދުﷲ ޝާހިދުއާއި އައްޑޫ ސިޓީ ކައުންސިލްއާއި ސަރުކާރުގެ އިތުރު މުއައްސަސާތަކުން މިފަދަ ތަރައްގީގެ މަޝްރޫއުތަށް ހުއްޓުމަކާއި ނުލާ ކުރިއަށް ގެންދިއުމަށް އެދިވަޑައިގަންނަވާ ކަމަށެވެ.
މި މަޝްރޫއުތަކާއި އެކު ދިވެހި އިގްތިސާދު އެންމެ ބޮޑަށް ބަރޯސާވާ ޓޫރިޒަމް އަދި މަސްވެރިކަމުގެ ދާއިރާއިގެ މި މަޝްރޫއުތަކުގެ ސަބަބުން އައްޑޫ ސިޓީއަށް ވަޒީފާ އިތުރުކުރެވި، އެކްސްޕޯޓް އިތުރުވެ އިގްތިސާދު ކުރިއަރާނެ ކަމަށް އުންމީދު ކުރެވޭ ކަމަށް ހައި ކޮމިޝަނުން ބުންޏެވެ.
ކޮވިޑް-19 ގެ ސަބަބުން މެދުވެރި ވެފައިވާ ދަތިތަކާއި އެކުގަ އިވެސް ފޮރިން މިނިސްޓްރީ އިން ރަށު އަދި ސިޓީ ކައުންސިލްތަކުން އިންޑިއާގެ ގްރާންޓް އެހީގެ ދަށުން ހިންގޭ ކުދި އަދި މެދުފަންތީގެ މަޝްރޫއުތަކުގެ މަސައްކަތް ކުރިއަށް ގެންދެއެވެ. އިންޑިއާ ސަރުކާރުގެ އުއްމީދަކީ މިފަދަ ކުދި ގްރާންޓްތަކުގެ ދަށުން ހިންގޭ އެކި ޕްރޮޖެކްޓްތަކުގެ މަސައްކަތް އަވަހަށް ފުރިހަމަ ކުރެވި، ދިވެހި ރައްޔިތުންނަށް މި ޕްރޮޖެކްޓްތަކުގެ ފައިދާ ލިބެން ފެށުމެވެ.
މި ރަސްމިއްޔާތުގައި ފޮރިން ސެކްރެޓަރީ އަބްދުލް ގަފޫރާއި، އައްޑޫ ސިޓީ ތަމްސީލު ކުރައްވާ މަޖިލިސް މެމްބަރުންނާއި، ފޮރިން މިނިސްޓްރީ، ރައީސް އޮފީސް އަދި އިންޑިއަން ހައި ކޮމިޝަންގެ އިސް އޮފިޝަލުން ބައިވެރިވެ ވަޑައިގެންނެވިއެވެ.
