ޓެކްސް އެޕީލް ޓްރައިބިޔުނަލްގެ ހުސްވެފައިވާ މަގާމަށް ކުރިމަތިލި 2 މީހުންގެ ނަން ދިރާސާކުރުމަށް ކޮމިޓީއަށް
10 އޯގަސްޓު 2020 | ހޯމަ 08:542 ބޭފުޅުންގެ ނަން ދިރާސާކުރުމަށް ޖުޑީޝަރީ ކޮމިޓީއަށް ވަނީ ފޮނުވާފައި
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ޓެކްސް ނެގުމާއި ބެހޭ އިދާރީ ޤާނޫނުގެ 56 ވަނަ މާއްދާގެ ދަށުން ޓެކްސް އެޕީލް ޓްރައިބިޔުނަލްގެ ހުސްވެފައިވާ މަގާމަށް ކުރިމަތިލެއްވި 2 ބޭފުޅުންގެ ނަން ދިރާސާކުރުމަށް ޖުޑީޝަރީ ކޮމިޓީއަށް ފޮނުވައިފި އެވެ.
އެ ޓްރައިބިޔުނަލްގެ ޤާނޫނީ ދާއިރާއިން ހުސްވެފައިވާ މަގާމަށް ކުރިމަތިލައްވާފައިވާ ދެ ބޭފުޅުންނަކީ:
1- އަލްއުސްތާޛު މުހައްމަދު މުނައްވަރު އަލީ/ ވެސްޓްބީޗް/ އއ މަތިވެރި
2- އަލްއުސްތާޛާ ޝީރީން ނާހިދާ އަލީ/ ގ.ނޫމަރާ ވިލާ
މި ނަންތައް ދިރާސާކުރުމަށް މަޖިލީހަށް ފޮނުއްވަމުން ރައީސުލްޖުމްހޫރިއްޔާ ފޮނުއްވާފައިވާ ސިޓީގައި ވަނީ އެ ޓްރައިބިޔުނަލްއަށް ކުރިމަތިލުމަށް އާންމުކޮށް ހުޅުވާލުމުން އެކަމަށް ކުރިމަތިލެއްވީ ދެ ބޭފުޅުންކަމަށެވެ.
ޓެކްސް އެޕީލް ޓްރައިބިޔުނަލް އަކީ ޓެކްސްއާ ބެހޭ ޤާނޫނުތަކާއި އެއްގޮތްވާ ގޮތުގެ މަތިން ހުށަހެޅޭ ޓެކްސްއާ ގުޅޭ މައްސަލަތައް ބެލުމަށް ޓެކްސް ނެގުމާއި ބެހޭ އިދާރީ ޤާނޫނުގެ ދަށުން އުފައްދާފައިވާ ޓްރައިބިޔުނަލް އެކެވެ. ޓްރައިބިޔުނަލްގައި 5 މެމްބަރުން ތިއްބަވަން ޖެހެއެވެ.
