ޔުއެފާ ޗެމްޕިއަންސް ލީގުގެ ދެވަނަ ބުރުގެ ދެވަނަ ލެގުގައި ރަށުން ބޭރުގައި މެންޗެސްޓާ ސިޓީއާ ދެކޮޅަށް ކުޅޭ މެޗަށް ރެއާލް މެޑްރިޑް އޮތީ ވަރަށް ރަނގަޅަށް ތައްޔާރުވެފައި ކަމަށާއި، ފުރަތަމަ ލެގުގެ ނަތީޖާ ބަދަލުކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށް ރެއާލްގެ ކޯޗު ޒިނެދިން ޒިދާން ބުނެފިއެވެ.

ސިޓީން ވަނީ ރެއާލްގެ ދަނޑުގައި ކުޅުނު ފުރަތަމަ ލެގުގެ މެޗު 2-1 ގެ ނަތީޖާއަކުން ކާމިޔާބުކޮށްފައެވެ.

ހުކުރު ދުވަހުގެރޭގެ މެޗުގެ ކުރިން ޒިދާން ބުނީ މި މެޗަކީ އުނދަގޫ މެޗަކަށް ވާނެ ކަމަށާއި، އެކަމަކު މި މެޗަށް ޓީމު އޮތީ އެންމެ ފުރިހަމައަށް ތައްޔާރުވެފައި ކަމަށެވެ. އަދި މެޗަށް ނުކުންނައިރު، އެޓީމުގެ ފޯވާޑް އެޑެން ހަޒާޑް ފޯމުގައި ހުރި ކަމަށްވެސް ޒިދާން ބުންޏެވެ.

އެކަމަކު މީގެ ކުރިން ބައެއް މީޑިއާތަކުން ވަނީ ސިޓީއާ ދެކޮޅަށް ކުޅޭ މެޗަށް ރެއާލުން އެކުލަވާލި ސްކޮޑުން ހަޒާޑަށް ފުރުސަތުދިން ނަމަވެސް، މެޗަށް ހަޒާޑް ފިޓް ނޫން ކަމަށާއި އޭނާގެ ފައިގެ ކުޑަ ހުޅަށް އަނިޔާވެފައިވާ ކަމަށް ރިޕޯޓުކޮށްފައެވެ.

ޒިދާން އިތުރަށް ބުނީ ރެއާލުން ކޮންމެ މެޗަކަށްވެސް ނުކުންނަނީ ފައިނަލެއް ކަމުގައި ދެކިގެން ކަމަށާއި، އެގޮތުން މި މެޗަކީ ރެއާލުން މި ސީޒަނުގައި ކުޅޭނެ އެންމެ ބޮޑު ފައިނަލް މެޗު ކަމަށެވެ. އަދި ރެއާލްގެ ފޯވާޑް ގެރެތު ބޭލް ސްކޮޑުގައި ނުހިމެނީ އޭނާގެ އެދުމުގެ މަތިން ކަމަށާއި، ޓީމާއެކު ދަތުރު ނުކުރަން އޭނާ ނިންމި ސަބަބު ސާފުކޮށްދޭން ނުޖެހޭނެ ކަމަށްވެސް ޒިދާން ބުންޏެވެ. އަދި އެއީ އޭނާ އާއި ބޭލްއާ ދެމީހުންގެ ދެމެދު އޮތް ކަމެއް ކަމަށް ޒިދާން ވަނީ ބުނެފައެވެ.

ޒިދާން ބުނީ މެޗަށް ނުކުންނައިރު ސްޕެނިޝް ލީގުގެ ޗެމްޕިއަންކަން ރެއާލަށް ލިބިފައި އޮތުން އެއީ ލިބޭނެ ފައިދާއެއް ނޫން ކަމަށާއި، ޗެމްޕިއަންސް ލީގަކީ ރެއާލަށް އަބަދުވެސް ހާއްސަ މުބާރާތެއް ކަމަށެވެ.

ކޮވިޑް-19 އާ ގުޅިގެން ފަސްކުރި ޗެމްޕިއަންސް ލީގު މެޗުތައް އަލުން ފަށާއިރު، ދެވަނަ ބުރުގެ ދެވަނަ ލެގުގައި ރަށުން ބޭރުގައި ސިޓީއާ ދެކޮޅަށް ރެއާލް ނުކުންނާނީ ހުކުރު ދުވަހުގެރޭ ރާއްޖެ ގަޑިން 00:00 ގައެވެ.