މިއީ ރިޔާސީ ނިޒާމަށް ފައްކާވެފައި އޮތް ގާނޫނުއަސާސީއެއް ނޫން: ރައީސް ނަޝީދު
7 އޯގަސްޓު 2020 | ހުކުރު 10:14އަވަސް އަރުވާލައިގެން ގާނޫނު އަސާސީ އަށް ބަދަލު ގެނައުން ރަނގަޅެއް ނޫން: ނަޝީދު
މަޖިލީހުގެ ރައީސް ރާއްޖެ.އެމްވީ އަށް ދެއްވި އިންޓަވިއުއެއްގެ ތެރެއިން
މިހާރު އަމަލުކުރަމުންދާ ފެހި ގާނޫނު އަސާސީއަކީ ތަބީއީ ގޮތުން ރިޔާސީ ނިޒާމަށް ފައްކާވެފައި އޮތް ގާނޫނު އަސާސީ އެއް ނޫން ކަމަށާއި، ހިންގުމުގެ ތެރެއިން ގާނޫނު އަސާސީއަށް ބަދަލު ގެންނަން ޖެހޭ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ފެހި ގާނޫނު އަސާސީއަކީ ރިޔާސީ ނިޒާމަށް ފައްކާވެފައިވާ ގާނޫނު އަސާސީއެއް ނޫން ކަމަށް ރައީސް ނަޝީދު ވިދާޅުވީ، ފެހި ގާނޫނު އަސާސީއަށް 12 އަހަރު ފުރުމުގެ މުނާސަބަތުގައި މަޖިލީހުގެ މީޑީއާއަށް ދެއްވި އިންޓަވިއުއެއްގައެވެ. ނަޝީދު ވިދާޅުވީ، ގާނޫނު އަސާސީއަކީ ދޫ ދިނުމަށް ހުއްޖަތެއްގެ ގޮތުގައި ވެރިން އަބަދުވެސް ގެންގުޅެމުންދާ އެއްޗެއް ކަމަށެވެ.
އެމަނިކުފާނު ވިދާޅުވީ، މިހާރު އަމަލުކުރަމުންދާ ގާނޫނު އަސާސީއަކީ ދުވަހަކުވެސް ކަމެއްގައި ބައިވެރިނުވާ މިންވަރަށް ހުރިހާ ދިވެހިން ބައިވެރިވެގެން ހަދާފައި އޮތް ގާނޫނު އަސާސީއެއް ކަމަށެވެ.
މަޖިލީހުގެ ރައީސް ވިދާޅުވީ، ފެހި ގާނޫނު އަސާސީ ބިނާވެގެން އައީ ބަރުލަމާނީ ސިފައެއްގައި ކަމަށާއި، ނަމަވެސް އެންމެ ފަހު ވަގުތު ވެރިކަމުގެ ނިޒާމާއި ގުޅޭ ގޮތުން ފެންނަ ނުފެންނަ ވޯޓެއް ނެގުމާއި އެކު އެކަން ބަދަލުވެގެން ދިޔަ ކަމަށެވެ. އެއީ 2007 ވަނަ އަހަރުއެވެ.
އެ ވޯޓުން ރައްޔިތުން ނިންމީ ރާއްޖޭގައި އޮންނަންވާނީ ރިޔާސީ ނިޒާމެއް ކަމަށެވެ. ނަމަވެސް އެ ވޯޓުގެ ނަތިއްޖާ އޭރު އެމްޑީޕީން ބަލައިނުގަންނަ ކަމަށް އެމަނިކުފާނު ވިދާޅުވިއެވެ. ރައީސް ނަޝީދު ވިދާޅުވީ، އެމަނިކުފާނުގެ ވެރިކަމުގައި ގާނޫނު އަސާސީ ތަންފީޒުކުރަން އެތައް ދަތިތަކެއް ދިމާވިކަމަށް ވިދާޅުވިއެވެ.
ނަޝީދުގެ ނަޒަރުގައި ގާނޫނު އަސާސީއަށް އަވަސް އަވަހަށް އިސްލާހު ގެނައުމަކީ ރަނގަޅު ކަމެއް ނޫނެވެ. އިސްލާހު ގެނައުމުގެ ބަދަލުގައި އެމަނިކުފާނު ވިދާޅުވީ، ހިންގުމުގެ ތެރޭގައި ފުރިހަމަ ކުރަން ހުރި ކަންތައް ފުރިހަމަ ކުރުން މުހިއްމު ކަމަށެވެ.
އެހެންނަމަވެސް އެންމެ ރަނގަޅު ވެރިކަމުގެ ނިޒާމަކީ ބަރުލަމާނީ ނިޒާމު ކަމަށް ނަޝީދު ވިދާޅުވާ ވިދާޅުވުން ތަކުރާރު ކުރެއްވެވިއެވެ. އެކަމަކު ބަރުލާމާނީގެ ވާހަކަ ދައްކާ ކޮންމެ ފަހަރަކު ނޫސްތަކުގެ ހެޑްލައިންގައި އެވާހަކަ ދައްކާތިވެ އެމަނިކުފާނު ނުރުހުން ފާޅުކުރެއްވިއެވެ.
އައު ގާނޫނު އަސާސީ ތަސްދީގު ކުރައްވާފައިވަނީ 2008 ވަނަ އަހަރުގެ އޮގަސްޓު މަހުގެ ހަތް ވަނަ ދުވަހުއެވެ. ގާނޫނު އަސާސީ ތަސްދީގު ކުރައްވާފައިވަނީ ކުރީގެ ރައީސް މައުމޫން އަބްދުލްގައްޔޫމެވެ. ފެހި ގާނޫނު އަސާސީއަކީ ރާއްޖޭގެ ތާރިހުގައި އެކުލަވާލީ ހަތް ވަނަ ގާނޫނު އަސާސީއެވެ. އެއަށް ފަހު އަމަލުކުރަމުން އަންނަނީ މި ގާނޫނު އަސާސި އަށެވެ.
