ބޭރޫތުގައި ދެ ހަފުތާއަށް ކުއްލި ނުރައްކަލުގެ ހާލަތު އިއުލާނުކުރަނީ

ލުބުނާނުގެ ވެރިރަށް ބޭރޫތުގައި ގޮވި ބާރުގަދަ ގޮވުންތަކާއި ގުޅިގެން ދެ ހަފްތާގެ މުއްދަތަށް ކުއްލި ނުރައްކަލުގެ ހާލަތު އިއުލާންކުރެއްވުމަށް ނިންމަވާފައިވާކަމަށް އެ ގައުމުގެ ރައީސް މައިކަލް އައުން ވިދާޅުވެއްޖެއެވެ.

މީގެއިތުރުން ބުދަ ދުވަހު އެގައުމުގެ ކެބިނެޓްގެ ކުއްލި ބައްދަލުވުމެއް ބޭއްވުމަށްވެސް ވަނީ ހަމަޖެހިފައެވެ. ރައީސްގެ ރަސްމީ ޓްވިޓަރ އެކައުންޓުން ކޮށްފައިވާ ޓްވީޓެއްގައި ރައީސް މައިކަލް ވިދާޅުވެފައިވަނީ 2,750 ޓަނުގެ އެމޯނިއަމް ނައިޓްރޭޓް އެއްވެސްކަހަލަ ރައްކާތެރިކަމުގެ ފިޔަވަޅެއް ނާޅާ ހަ އަހަރު ވަންދެން ގުދަނެއްގައި ބެހެއްޓުމަކީ އެއްވެސް ގޮތަކަށް ގަބޫލުކުރެވޭ ކަމެއް ނޫންކަމަށެވެ. އަދި މިކަމާއި ގުޅިގެން ޒިންމާވާން ޖެހޭ ފަރާތްތަކަށް ހަރުކަށި އަދަބު ދެއްވާނެ ކަމަށް ރައީސް ވަނީ ވިދާޅުވެފައެވެ.

މީގެ އިތުރުން ލުބުނާންގެ ސުޕްރީމް ޑިފެންސް ކައުންސިލުން ވެސް ވަނީ ގޮވުންތަކާއި ގުޅިގެން ދެ ހަފުތާގެ މުއްދަތަށް ކުއްލި ނުރައްކަލުގެ ހާލަތު ބޭރޫތުގައި އިއުލާންކޮށް ސެކިޔުރިޓީ ބެލެހެއްޓުމުގެ ކަންކަން އެގައުމުގެ މިލިޓަރީއާ ހަވާލުކުރުމަށް ގޮވާލާފައެވެ.

ޓީވީ މެދުވެރިކޮށް ލައިވްކުރި ކައުންސިލްގެ ބަޔާނުގައި ބުނެފައިވަނީ މި ގޮވުންތަކާއި ގުޅިގެން ލިބުނު ގެއްލުންތަކަށް 100 ބިލިއަން ލުބުނާން ޕައުންޑް މި އަހަރުގެ ބަޖެޓުން ޚަރަދުކުރެއްވުމަށް ރައީސް ނިންމަވާފައިވާ ކަމަށެވެ.

ބުދަ ދުވަހު ބާއްވާ ކުއްލި ކެބިނެޓްގެ ބައްދަލުވުމުގެ ތެރެއިން މިކަން ހިނގާދިޔަ ގޮތް ބަލާ ޒިންމާވާން ޖެހޭ ފަރާތްތައް ފަސް ދުވަހުގެ ތެރޭގައި ހޯދާ އެފަރާތްތަކަށް އެންމެ ހަރުކަށި އަދަބު ދިނުމަށް ނިންމާނެކަމަށް ވެސް ވަނީ ބުނެފައެވެ.

ބޭރޫތުގައި އަންގާރަ ދުވަހު ގޮވި ބާރުގަދަ ގޮވުންތަކާއި ގުޅިގެން މިހާތަނަށް އައިއިރު 78 މީހަކު މަރުވެފައިވާ ކަމަށް އެ ގައުމުގެ ހެލްތު މިނިސްޓްރީން ބުނެއެވެ. އަދި ހަތަރުހާހާ ގާތްކުރާ އަދަދަކަށް މީހުން ޒަޚަމްވެފައިވާ ކަމަށް އެ ގައުމުގެ ހެލްތު މިނިސްޓްރީއާ ހަވާލާދީ ރޮއިޓަރސްއިން ބުނެއެވެ.

ބާރުގަދަ ގޮވުންތައް ގޮވުމުގެ ސަބަބުން ބޭރޫތުން ކަރަންޓު ކަނޑައިގެން ދިޔުމާއި ގުޅިގެން ވެސް މީހުން ހޯދުމަށް ދަތިތައް ދިމާވެފައިވާ ކަމަށާއި އެތައް ހާސް ބަޔަކު އެމީހުންގެ އާއިލާ އާއި ރަހުމަތްތެރިން ނުފެނިގެން އެމަރޖެންސީ ޑިޕާޓްމަންޓަށް އަންގަމުންދާ ކަމަށް ލުބުނާންގެ ހެލްތު މިނިސްޓަރ ހަމަދް ހަސަން ވިދާޅުވިއެވެ. ވެއްޓިފައިވާ އިމާރާތްތަކުގެ ދަށުން މީހުން ހޯދުމުގެ މަސައްކަތް އަންނަނީ ކުރަމުންނެވެ.

ބޭރޫތުގައި ބާރުގަދަ އެއްޗެހިތަކެއް ގޮވާފައި މި ވަނީ ކުރީގެ ބޮޑު ވަޒީރު ރަފީގު ހަރީރީ 2005 ވަނަ އަހަރު އަވާރަކޮށްލި މައްސަލައިގައި ހުކުމް އިއްވަން ތައްޔާރުވަމުން ދަނިކޮށެވެ.