ޙައްޖުގެ އަޅުކަމާ ގުޅިގެން ސައުދީން އެޅި ފިޔަވަޅުތަކަށް ޑަބްލިއުއެޗްއޯގެ ތައުރީފު!
3 އޯގަސްޓު 2020 | ހޯމަ 10:03މިފަދަ ބޮޑެތި އިންތިޒާމުތަކެއް ހަމަޖެއްސުމަކީ ފަސޭހަ ކަމެއް ނޫންކަން ފާހަގަ ކުރެއްވި
ޙައްޖާޖީން ކައުބަތުﷲ ގެފުޅު ވަށައިގެން ޠަވާފް ކުރަނީ- ސައުދީން ވަނީ ކުރީބައިގައި ރައްކާތެރި ފިޔަވަޅުތައް އަޅާފައި
ކޮވިޑް-19ން ރައްކާތެރިވުމަށް އަޅާފައިވާ ވަރުގަދަ ފިވަޅުތަކާއެކު މިއަހަރުގެ ހައްޖުގެ އަޅުކަން ނިންމާލުމާ ގުޅިގެން ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ) އިން ސައުދީ އަރަބިއްޔާގެ ސަރުކާރަށް ތައުރީފު ކޮށްފިއެވެ.
ހޯމަ ދުވަހު ޑަބްލިއުއެޗްއޯއިން ކުރިއަށް ގެންދިޔަ ނޫސްވެރިންގެ ބައްދަލުވުން ފައްޓަވަމުން އެ ޖަމިއްޔާގެ ޗީފް ޓެޑްރޯސް އަދަނޯމް ގެބްރިއާސިސް ވިދާޅުވީ، މިއަހަރުގެ ޙައްޖުގެ އަޅުކަމަކީ ރައްކާތެރިކަމުގެ ފިޔަވަޅުތަކާއެކު ކުރިއަށް ދިޔަ އަޅުކަމެއްކަން ކަށަވަރު ކުރުމަށް ސައުދީ ސަރުކާރުން އަޅާފައިވާ ފިޔަވަޅުތައް ފާހަގަކޮށްލެވޭ ކަމަށެވެ. އަދި ޓެޑްރޯސް ވަނީ އެކަމަށް މަރުޙަބާ ވިދާޅުވެ، ޢީދުގެ ތަހުނިޔާ ހުރިހާ މުސްލިމުންނަށް އަރިސް ކުރައްވާފައެވެ.
ޓެޑްރޯސް ވިދާޅުވީ، ސައުދީން ދައްކުވައިދިނީ ލާމަސީލު މިސާލެއް ކަމަށާއި، އެހެން ޤައުމުތަކުން ވެސް އެކަމުން ފިލާވަޅު ލިބިގަނެ، އައު އާންމު ޙާލަތަކަށް ހޭނެން ދަސްކުރެވިދާނެ ކަމަށެވެ.
އޭގެ އިތުރުން މިފަދަ ބޮޑެތި އިންތިޒާމުތަކެއް ހަމަޖެއްސުމަކީ ފަސޭހަ ކަމެއް ނޫންކަން ފާހަގަ ކުރައްވައި ޓެޑްރޯސް ވިދާޅުވީ، ބަލިމަޑުކަމެއްގައި ދުނިޔެ އޮތް ނަމަވެސް، އާންމު ދިރިއުޅުމުގެ ކަންކަން ހުއްޓިފައި އޮންނަން ނުޖެހޭ ކަމަށެވެ. އަދި ވައިރަސްއާއެކު އުޅެން ދަސް ކުރުމަށް ޓެޑްރޯސް ވަނީ ތަކުރާރުކޮށް އިލްތިމާސް ކުރައްވާފައެވެ.
މަދު މީސްކޮޅަކާއެކު މި އަހަރު ޙައްޖުގެ އަޅުކަން ކުރިއަށް ގެންގޮސްފައިވާއިރު، ރައްކާތެރިކަމުގެ ގޮތުން ސައުދީން ވަނީ ވަރުގަދަ ފިޔަވަޅުތަކެއް ކުރީބައިގައި އަޅާފައެވެ. މިސާލެއްގެ ގޮތުން ހައްޖުގެ އެންމެ މުހިއްމު ހަރަކާތް ކަމަށްވާ ޖަމްރާއަށް ހިލައުކުން ކުރިއަށް ގެންގޮސްފައިވަނީ ކޮވިޑާއި ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތަކާއި އެކުއެވެ. އެގޮތުން ހިލަ އުކުމަށްޓަކައި އަމިއްލަ ހިލަ އެއްކުރުމުގެ ބަދަލުގައި މިފަހަރު ކޮންމެ ހައްޖުވެރިއަކަށް ސްޓެރެލައިޒް ކޮށްފައިވާ ހިލަތަކެއް ވަނީ ދީފައެވެ.
އޭގެ އިތުރުން، ގެފުޅުގެ ވަށައިގެން ޠަވާފް ކުރުމުގައި ވެސް އިޖުތިމާއީ ގައިދުރުކަމާއި، މާސްކް އެޅުން ފަދަ ފިޔަވަޅުތައް ގާތުން ބަލައި ކަށަވަރު ކޮށްފައިވެއެވެ.
މީގެ ކުރިން ކޮންމެ އަހަރަކު ހައްޖުގެ އަޅުކަން އަދާކުރުމަށް 2.5 މިލިއަން މުސްލިމުން ދިޔަ ނަމަވެސް، މި އަހަރުގެ ހައްޖުގެ އަޅުކަން އަދާކޮށްފައިވަނީ 10،000 މުސްލިމުންނެވެ.
