ޔާސިރު ޔަހުޔާ ފުރުވާލުމަށް އެކިފަހަރުމަތިން މަސައްކަތް ކުރެވުނު، ފުރައިގެން ދިޔުމަށް އޭނާ އިންކާރުކުރި

ޓެރަރިޒަމްގެ ތުހުމަތުތަކެއް ކުރެވި ހުޅުމާލޭ ޑިޓެންޝަން ސެންޓަރުގައި ބަންދުކޮށްފައި ހުރި ޔަމަނުގެ ރައްޔިތެއް ކަމަށްވާ ޔާސިރު ޔަހްޔާ ސާލިހު ރާއްޖެއިން ފުރުވާލުމަށް އެކި ފަހަރުމަތިން ތަކުރާރުކޮށް ކުރެވުނު މަސައްކަތުގައި އޭނާގެ ފަރާތުން އެއްބާރުލުން ލިބިފައި ނުވާ ކަމަށް ކަމާބެހޭ މުއައްސަސާތަކުން ބުނެފިއެވެ.

މޯލްޑިވްސް އިމިގްރެޝަނާއި، މޯލްޑިވްސް ކަރެކްޝަނަލް ސާރވިސް އަދި މޯލްޑިވްސް ޕޮލިސް ސާރވިސް ގުޅިގެން އާދިއްތަ ދުވަހުގެރޭ ނެރުނު ނޫސްބަޔާނެއްގައި ބުނެފައިވަނީ ޤާނޫނު ނަމްބަރު 2007/1 (ދިވެހިރާއްޖޭގެ އިމިގްރެޝަން ޤާނޫނުގެ) 8 ވަނަ މާއްދާގެ (ހ) ގެ (6) އަދި (7) ވަނަ ނަމްބަރަށް ރިއާޔަތްކޮށް، އެ ޤާނޫނުގެ 20 ވަނަ މާއްދާގެ (ށ)ގެ ދަށުން، ރާއްޖޭގައި ހުރުމަށް ދޫކޮށްފައިވާ ހުއްދަ 2 މާރޗް 2017ގައި ބާތިލް ކުރުމަށްފަހު އެ ޤާނޫނުގެ 21 ވަނަ މަޢްދާގެ (ރ)ގެ ދަށުން ރާއްޖެއިން ފުރުވާލެވެންދެން އިމިގްރޭޝަން ޤާނޫނާއި ޚިލާފްވެގެން ބިދޭސީން ބޭތިއްބޭ ޑިޓެންޝަން ސެންޓަރުގައި ބެހެއްޓިފައިވާ ޔަމަނުގެ ރައްޔިތެއް ކަމުގައިވާ ޔާސިރު ޔަހުޔާ ސާލިހު (ޕާސްޕޯޓް ނަމްބަރު 05028404) ކެއިން ބުއިމަށް އިންކާރު ކުރުމުގެ ސަބަބުން ސިއްޚީ ހާލަތު ދަށްވެގެން އިންދިރާގާންދީ މެމޯރިއަލް ހޮސްޕިޓަލްގައި އެޑްމިޓްކޮށް، ފަރުވާދެމުންދަނިކޮށް ސްޓްރޯކެއް ޖެހިގެން އާދިއްތަ ދުވަހުގެ 16:25 ގައި ނިޔާވެފައިވާ ކަމަށެވެ.

Advertisement

ފުލުހުންނަށް ލިބިފައިވާ އިތުބާރުހުރި އިންޓެލިޖެންސް މައުލޫމާތުގެ މައްޗަށް ބިނާކޮށް، އޭނާ އަކީ ދިވެހިރާއްޖޭގެ ގައުމީ ސަލާމަތަށް ހުރި ނުރައްކަލެއް ކަމަށް ޤަބޫލުކުރެވޭތީ، 2 މާރަޗް 2017 ގައި ޔާސިރު ޔަހުޔާ ދިވެހިރާއްޖޭގައި ހުރުމަށް ދޫކޮށްފައިވާ ހުއްދަ ބާތިލް ކުރުމުގެ ކުރިން 01 ފެބްރުއަރީ 2017 ވަނަ ދުވަހު އޭނާ މޯލްޑިވްސް އިމިގްރޭޝަނަށް ހާޒިރުކޮށް 01 މަސްދުވަހުގެ ތެރޭގައި ރާއްޖެއިން ފުރައިގެން ދިއުމަށް އަންގާފައިވާ ކަމަށް ބަޔާނުގައި ވެއެވެ.

އެ އެންގުމާއި އެއްގޮތަށް އޭނާ އަމަލުކޮށްފައި ނުވާތީ އޭގެ ފަހުން ވެސް ތިން ފަހަރެއްގެ މަތިން ރާއްޖެއިން ފުރައިގެން ދިއުމަށް އަންގާފައިވާ ކަމަށާއި ތަކުރާރުކޮށް ރާއްޖެ ދޫކޮށް ފުރައިގެން ދިއުމަށް ދެވުނު މުއްދަތުގެ ތެރޭގައި ފުރައިގެން ގޮސްފައި ނުވާތީ 2 މާރޗް 2017 ގައި ދިވެހިރާއްޖޭގައި ދިރުއުޅުމަށް ޔާސިރު ޔަހުޔާއަށް ދީފައިވާ ހުއްދަ ބާތިލްކޮށް އޭނާ ފުރުވާލެވެންދެން އިމިގްރޭޝަން ޤާނޫނާއި ޚިލާފްވެގެން ބިދޭސީން ބޭތިއްބޭ ޑިޓެންޝަން ސެންޓަރުގައި ބަންދުކުރެވިފައިވާ ކަމަށެވެ.

ޔާސިރު ޔަހުޔާ ޓޫރިސްޓް ވިސާގައި ދިވެހިރާއްޖެއަށް އެތެރެވެފައިވަނީ 2014 ވަނަ އަހަރުއެވެ. ހަމަ އެއަހަރު ދިވެއްސަކާއި ކައިވެނިކޮށްފައިވެއެވެ. ޓެރެރިޒަމާއި ގުޅުންހުރިކަމަށް ތުހުމަތު ކުރެވޭތީ އެމުއްދަތުގައި އޭނާގެ ހަރަކާތްތައް މޯލްޑިވްސް ޕޮލިސް ސާރވިސްއިން ބަލައި މޮނިޓަރ ކުރަމުންގެދެވިފައިވާ ކަމަށެވެ.

ފުލުހުންނަށް ލިބިފައިވާ އިންޓެލިޖެންސް މައުލޫމާތުން އިނގޭ ގޮތުގައި އޭނާ އަކީ އަލްޤައިދާ ޖަމާއަތާއި ގުޅުން އޮންނަ، އެޖަމާއަތުގެ އިސް ދައުރެއް އަދާކުރާ ، އެ ޖަމާއަތް ހިންގާ މަތީފެންވަރުގެ ޓެރަރިސްޓް ތަމްރީންތައް ފުރިހަމަކޮށްފައިވާ މީހެކެވެ. ދުނިޔޭގެ އެކި ކަންކޮޅުތަކުގައި އެ ޖަމާއަތުން ހިންގާ ހަރަކާތްތައް ރާވާ ވިލަރެސް ކުރުމުގެ އިތުރުން ޓެރަރިޒަމާއި ގުޅުން ހުރި މައްސަލަތަކުގައި ފުލުހުން ތަހުޤީގު ކޮށްފައިވާ ދިވެހިންނާއި އޭނާ ގުޅުން ބަދަހިކޮށްފައިވާ ކަމަށް ބަޔާނުގައި ވެއެވެ.

ޔާސިރު ޔަހުޔާ އަކީ އޭނާގެ އުފަން ގައުމުގެ އިތުރުން އެކި ގައުމު ތަކުގައި ޓެރަރިޒަމާއި ގުޅުންހުރި މައްސަލަތަކުގައި ހައްޔަރު ކުރެވި އެކި ފަހަރުމަތިން ބަންދު ކުރެވިފައިވާ މީހެއް ކަމަށެވެ.

އަދި އެކިއެކި ގައުމުތަކުގެ ސައްޚަނޫން ޓްރެވަލް ޑޮކިއުމަންޓްގައި އެއްގައުމުން އަނެއް ގައުމަށް ދަތުރުކޮށްފައިވާ މީހެއް ކަމަށެވެ.

ޔާސިރު ޔަހުޔާ އިމިގްރޭޝަން ޤާނޫނާއި ޚިލާފްވެގެން ބިދޭސީން ބޭތިއްބޭ ޑިޓެންޝަން ސެންޓަރުގައި ބެހެއްޓިފައިވަނިކޮށް، ކެއިންބުއިމަށް އިންކާރު ކުރުމުގެ ސަބަބުން ސިއްޚީ ހާލަތު ދަށްވެގެން، ކުރިންވެސް ހޮސްޕިޓަލުގައި އެޑްމިޓްކޮށް ފަރުވާދެވިފައިވާ ކަމަށް ބަޔާނުގައި ވެއެވެ.

ހަމައެއާއި އެކު ޔާސިރު ޔަހުޔާ އާއި ގުޅޭ ތަފްސީލީ މައުލޫމާތު އެކި ފަހަރުމަތިން ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަށް ހިއްސާކުރެވިފައިވާނެ ކަމަށެވެ.

ކަރެކްޝަންސްގެ ބެލުމުގެ ދަށުގައި ޔާސިރު ބަންދުކުރެވިފައި ހުރި މުއްދަތުގައި އޭނާއައި މެދު އަމަލު ކޮށްފައިވާނީ ސަލާމަތީ ގޮތުން ކަށަވަރު ކުރަންޖެހޭ ކަންކަން ކަށަވަރު ކުރުމަށްފަހު އޭނާގެ އިންސާނީ ހައްގުތަކަށް ރިއާޔަތްކޮށް އޭނާގެ ދިވެހި އާއިލާއާ ގުޅުން ބޭއްވުމަށާއި ކެއިން ބުއިމާއި ހުރުމުގައިވެސް ޚާއްސަ އުސޫލެއްގެ ދަށުން ލުއިގޮތަކަށް ކަމަށެވެ.

އަދި އެމުއްދަތުގައި އެނާއާ ގުޅޭ މައުލޫމާތު ޔަމަނުގެ ސަރުކާރަށް މިނިސްޓްރީ އޮފް ފޮރިން އެފެއަރޒް މެދުވެރިކޮށް ފޯރުކޮށްދީފައިވާނެ ކަމަށް ބަޔާނުގައި ވެއެވެ.

ޔާސިރު ޔަހުޔާ ރާއްޖެއިން ފުރުވާލުމަށް ބޭނުންވާ ޓެރެވަލް ޑޮކިއުމަންޓް ފޮރިންމިނިސްޓްރީ މެދުވެރިކޮށް، ޔަމަނު ސަރުކާރުން ހޯދުމަށް އެކި ފަހަރުމަތިން ތަކުރާރުކޮށް ކުރެވުނު މަސައްކަތުގައި ޔާސިރު ޔަހުޔާގެ ފަރާތުން އެއްބާރުލުން ލިބިފައި ނުވާތީ "އިންވޮލަންޓަރިލީ" ޔާސިރު ޔަހުޔާ ރާއްޖެއިން ފުރުވާލުމަށް ބޭނުންވާ ޓްރެވަލް ޑޮކިއުމަންޓް ހޯދުމަށް ފޮރިންމިނިސްޓްރީ މެދުވެރިކޮށް ޔަމަން ސަރުކާރުގައި އެދިފައިވާނެ ކަމަށެވެ.

ޔާސިރު ޔަހުޔާ ރާއްޖެއިން ފުރުވާލުމަށް އެކި ފަހަރުމަތިން މަސައްކަތް ކުރެވުނު ނަމަވެސް އޭނާ ރާއްޖެއިން ފުރުވާލެވިފައި ނުވަނީ ފުރައިގެން ދިއުމަށް އިންކާރުކޮށް، ފުރުމަށް ބޭނުންވާ ޓްރެވަލް ޑޮކިއުމަންޓް ހެއްދުމަށް އެއްބާރުލުން ދީފައި ނުވުމުގެ ސަބަބުންކަމަށް ބަޔާނުގައި އެވެ.