ރާއްޖެއިން ކޮވިޑް ޖެހުނު ދިވެހިންގެ އަދަދު 2000 އަށްވުރެ މައްޗަށް
2085 ދިވެހިން ވަނީ ޕޮޒިޓިވް ވެފައި
ކޮވިޑް-19 އަށް ޓެސްޓް ކުރަން ސާމްޕަލް ނަގަނީ
ރާއްޖެއިން ކޮވިޑް-19 އަށް ޕޮޒިޓިވްވި ދިވެހިންގެ އަދަދު 2000 އަށް އަރައިފިއެވެ.
ހެލްތް ޕްރޮޓެކްޝަން އެޖެންސީ އެޗްޕީއޭގެ އެންމެ ފަހުގެ ތަފާސް ހިސާބުތައް ދައްކާގޮތުން ރާއްޖެ އިން ކޮވިޑް-19 އަށް ޕޮޒިޓިވްވި ދިވެހިންގެ އަދަދު ވަނީ ބިދޭސީންއަށް ވުރެވެސް މައްޗަށް އަރާފައެވެ. އެގޮތުން މިހާތަނަށް ރާއްޖެއިން ކޮވިޑް-19 އަށް ޕޮޒިޓިވްވި ދިވެހިންގެ އަދަދު ވަނީ 2085 އަށް އަރާފައެވެ. އަދި ކޮވިޑް-19 އަށް ޕޮޒިޓިވްވި ބިދޭސީންގެ އަދަދަކީ 2079 އެކެވެ.
ރާއްޖޭގައި ކޮވިޑް-19 އަށް ޕޮޒިޓިވްވާ ދިވެހިންގެ އަދަދު ދުވަހެއް ދުވަހަށް ދަނީ އިތުރުވަމުންނެވެ.
އާދިއްތަ ދުވަހު އެކަނިވެސް ރާއްޖެއިން ކޮވިޑް-19 އަށް ވަނީ 215 މީހަކު ޕޮޒިޓިވް ވެފައެވެ. އޭގެތެރެއިން 149 މީހުންނަކީ ދިވެހިންނެވެ.
މިހާތަނަށް ރާއްޖެއިން ކޮވިޑް-19 އަށް 4164 މީހަކު ވަނީ ޕޮޒިޓިވްވެފައެވެ. އެކްޓިވް ކޭސްގެ ގޮތުގައި 1488 ކޭސްއެއް ރިޕޯޓްކުރެވިފައިވާއިރު މިހާތަނަށް ބަލިން ރަނގަޅުވެފައިވަނީ 2643 މީހެކެވެ.
