މަގުމަތީ އުޅޭއިރު މާސްކު ނަގައިގެން ތިބެ ސިގިރޭޓު ބުއިމަކީ މަނާކަމެއް!
2 އޯގަސްޓު 2020 | އާދީއްތަ 07:02މާސްކު ތިރިކޮށްގެން ތިބެ މަގުމަތީ ސިނގިރޭޓް ނުބޮއެވޭނެ
ފުލުހުން މަގުމަތި ބަލަހައްޓަނީ: މާލެ ސަރަހައްދުގެ މަގުމަތީގައި އުޅޭއިރު މާސްކު އެޅުން މަޖުބޫރު
މާލެ ސަރަހައްދުގެ މަގުތަކުގައި އުޅޭ އިރު މާސްކު އަޅަން މަޖުބޫރު ކުރުމާއެކު، މަގުމަތީގައި ތިބެގެން ސިގިރޭޓު ބުއިމަކީ މަނާކަމެއް ކަމަށް ޑރ. ނަޒްލާ ރަފީގު ވިދާޅުވެއްޖެއެވެ.
ހޮނިހިރު ދުވަހުގެ ރޭ ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވިދާޅުވީ، މަގުމަތީގައާއި އާންމު ތަންތަނުގައި އުޅޭއިރު މާސްކު އެޅުން މަޖުބޫރު ކޮށްފައިވާތީ، މަގުތަކުގައި ސިނގިރޭޓް ބުއިން ވެސް މަނާވާނެ ކަމަށެވެ. އެގޮތުން، މާސްކް ތިރިކޮށްގެން ވެސް މަގުމަތީގައި ތިބެ ސިނގިރޭޓް ނުބޮވޭނެ ކަމަށް ޑރ. ނަޒްލާ ވިދާޅުވިއެވެ.
މާސްކު އެޅުން މަޖުބޫރުކުރި ފަހުން، 116 މީހަކަށް ނަސޭހަތްތެރިވެފައި ވާއިރު، މިހާތަނަށް ޖޫރިމަނާ ކުރީ ހަތަރު މީހެކެވެ. މި ހަތަރު މީހުންނަކީ ވެސް މާސްކު އެޅުމަށް ނަސޭހަތްތެރިވުމަށް ފަހު، ޖޫރިމަނާ ކުރި ފަރާތްތަކެވެ. މާސްކު ނާޅާ މަގުމަތީ އުޅޭނަމަ ޖޫރިމަނާ ކުރަން ނިންމާފައިވަނީ 1،000ރ. އިންނެވެ.
ރާއްޖޭގެ ކޮވިޑް-19ގެ ހާލަތު ދިރާސާ ކުރާ ބައެއް ފަރާތްތަކުން ބުނާ ގޮތުން، ކުރިއަށް އޮތީ، މި ބަލީގެ ނުރައްކާ އިތުރުވެގެންދާނެ ދުވަސްތަކެކެވެ. ސަރުކާރުން ވިސްނަމުންދަނީ އަލުން ފުރަބަންދު ކުރުމުގެ ބަދަލުގައި، މި ބަލިން ރައްކާތެރިވެވޭނެ ހަރަދުނާ ފިޔަވަޅުތަކެއް އަޅައިގެން އިގްތިޞާދީ ހަރަކާތް ހިންގުމަށެވެ.
