"ބޮޑުފިނޮޅުން ކަރަންޓާއި ފެން ކަނޑާލީ ސީލް ކުންފުނިން"

ބ. ބޮޑުފިނޮޅުން ކަރަންޓާއި ފެން ކަނޑާލީ ސީލް މޯލްޑިވްސް ޕްރައިވެޓް ލިމިޓެޑުން ކަމަށް އާރުއައިއެކްސް (ރިޒް) ޕްރައިވެޓް ލިމިޓެޑުން ބުނެފިއެވެ.

"ރާއްޖެއެމްވީ" އަށް މައުލޫމާތު ދެމުން އާރުއައިއެކްސްގެ ޤާނޫނީ ވަކީލު އަލީ ސައީދު ވިދާޅުވީ ބޮޑުފިނޮޅުގައި މަސައްކަތް ކުރަމުންދާ ބިދޭސީންނަށް ދޭންޖެހޭ އަސާސީ ޚިދުމަތްތައް ކަމަށްވާ ފެނާއި ކަރަންޓްގެ ޚިދުމަތް ކަނޑާއި ސީލް ކުންފުނިން ކަމަށެވެ. އަދި ފެން ކަނޑާލާނެކަން އެ ރަށް ބަލަހައްޓަމުން ދިޔަ ފުލުހުންނަށް، ސީލް ކުންފުނިން މައުލޫމާތު ދުރާލާ އެންގި ކަމަށް މައުލޫމާތު ލިބިފައިވާ ކަަމަށް ވިދާޅުވިއެވެ.

ބުރާސްފަތި ދުވަހު އެރަށުން ފެނާއި ކަރަންޓް ކަނޑާލުމާއި ގުޅިގެން އެރަށުގައި ތިބި މަސައްކަތްތެރިން ކަންބޮޑުވުން ފާޅުކުރުމުން ބުރާސްފަތި ދުވަހުގެރޭ ދަންވަރު ވަނީ ފެނާއި ކަރަންޓްގެ ޚިދުމަތް އަލުން ދީފައިކަމަށް ސައީދު ވިދާޅުވިއެވެ. "ރާއްޖެއެމްވީ" އަށް މައުލޫމާތު ލިބިފައިވާ ގޮތުގައި ކަރަންޓާއި ފެނުގެ ހިދުމަތް އަލުން ފޯރުކޮށްދިނީ ފުލުހުން އަންގައިގެންނެވެ.

އޭގެ އިތުރުން، އެ ރަށުގައި ތިބި ބިދޭސީންނަށް ފޮނުވި ކާބޯތަކެތި ރަށަށް އެރުވުމަށް ސީލް ކުންފުނިން ދެ ފަހަރެއްގެ މަތިން ހުރަސް އަޅާފައިވާ ކަމަށް ސައީދު ތުހުމަތު ކުރެއްވިއެވެ. އެ މައްސަލަ ހައްލުކޮށްފައިވަނީ ހިއުމަން ރައިޓްސް އޮފް ދަ ކޮމިޝަން މޯލްޑިވްސް (އެޗްއާރުސީއެމް) އަށް އެންގުމުން، އެ ކޮމިޝަނުން ފުލުހުން މެދުވެރިކޮށެވެ.

ސައީދު ވިދާޅުވީ ފުލުހުންގެ އެ ރަށް ބަލަހައްޓަމުންދާއިރު ބިދޭސީންނަށް ފޯރުކޮށްދޭންޖެހޭ އަސާސީ ޚިދުމަތްތަކަށް ހުރަސް އެޅިގެން ދިއުމަކީ އިންތިހާއަށް ކަންބޮޑުވާ ކަމެއް ކަމަށެވެ. އަދި އެ ރަށުގައި ތިބި ބިދޭސީން ރައްކާތެރި ތަންތަނަށް ބަދަލުކުރުމުގެ މަސައްކަތް ރިޒް ކުންފުނިން ކުރަމުންދާ ކަމަށް ސައީދު ވިދާޅުވިއެވެ.

ބޮޑުފިނޮޅުގައި ތިބި ބިދޭސީންނަށް ބޭނުންވާ އަސާސީ ހިދުމަތްތައް މެދުކެނޑުމާއި ގުޅިގެން ހިއުމަން ރައިޓްސް ވޮޗް އަދި ޓްރާންޕޭރެންސީ މޯލްޑިވްސް ފަދަ ޖަމިއްޔާތަކުން ވަނީ ކަންބޮޑުވުން ފާޅުކޮށްފައެވެ. އަދި މި މައްސަލައިގައި މިއަށް ވުރެ ޒިންމާދާރުކޮށް އަމަލުކުރުމަށް ސަރުކާރަށާއި ކަމާބެހޭ މުއައްސަސާތަކަށް އެ ޖަމިއްޔާތަކުން ވަނީ ގޮވާލާފައެވެ.