ސަންޗޯ ބަދަލުވާން ބޭނުންވަނީ ލިވަޕޫލަށް: ރިޕޯޓު

ބޮރޫޝިއާ ޑޯޓްމުންޑަށް ކުޅެމުން އަންނަ އިންގްލެންޑްގެ ފޯވާޑް ޖޭޑަން ސަންޗޯ ބަދަލުވާން ބޭނުންވަނީ ލިވަޕޫލަށް ކަމަށް ރިޕޯޓުތައް ބުނެފިއެވެ.

ސަންޗޯ ހޯދުމަށް ލިވަޕޫލްގެ އިތުރުން މެންޗެސްޓާ ޔުނައިޓެޑާއި، ޗެލްސީންވެސް އަންނަނީ މަސައްކަތް ކުރަމުންނެވެ.

ރިޕޯޓުތައް ބުނާ ގޮތުން ސަންޗޯ ޑޯޓްމުންޑު ދޫކޮށް އެހެން ކްލަބަކަށް ބަދަލުވާނަމަ، އޭނާ ބަދަލުވާން ބޭނުންވަނީ އިނގިރޭސި ޕްރިމިއާ ލީގުގެ ޗެމްޕިއަން ލިވަޕޫލަށެވެ. ސަބަބަކީ ލިވަޕޫލްގެ ކޯޗު ޔާގަން ކްލޮޕަކީ ނަތީޖާ ނެރެމުން އަންނަ ކޯޗަކަށްވެފައި، ލިވަޕޫލަކީ މިވަގުތު އިނގިރޭސި އެންމެ ކާމިޔާބު ޓީމު ކަމަށްވުމާއެކު، ލިވަޕޫލާއެކު ޔޫރަޕްގެ ބޮޑު މުބާރާތްތައް ކާމިޔާބުކުރުމުގެ ފުރުސަތު ބޮޑުވާނެތީއެވެ.

ދާދި ފަހުން ޑޯޓްމުންޑުން ވަނީ އުމުރުން 20 އަހަރުގެ ސަންޗޯ ވިއްކާލާނަމަ، ވިއްކާލާނީ 125 މިލިޔަން ޑޮލަރަށް ކަމަށް ބުނެފައެވެ. ޑޯޓްމުންޑުގެ އޮފިޝަލަކު ބުނީ މާލީ ގޮތުން ޓީމު އަޑިއަޅާލާފައިވީ ނަމަވެސް، ސަންޗޯ ފަދަ މުހިންމު ކުޅުންތެރިއަކު ވިއްކާލާނީ ކްލަބުން ބޭނުންވާ އަގަކަށް ކަމަށެވެ.

އެކަމަކު ރިޕޯޓުތައް ބުނާގޮތުން ޔުނައިޓެޑުން ވަނީ ސަންޗޯ ހޯދުމަށް 100 މިލިއަން ޑޮލަރުގެ ބިޑެއް ކޮށްފައެވެ. އެއީ ޑޯޓްމުންޑުން ކިޔާ އަގަށްވުރެ 25 މިލިއަން ޑޮލަރު ކުޑަ އަދަދެކެވެ.

ސަންޗޯ ހޯދުމަށް ޔޫރަޕްގެ ބޮޑެތި ކްލަބުތަކުން މަސައްކަތް ކުރަމުން އަންނައިރު، އޭނާ ވިދާލީ 2017 ވަނަ އަހަރު އިންޑިއާގައި ބޭއްވި 17 އަހަރުން ދަށުގެ ފީފާ ވޯލްޑް ކަޕްގައެވެ. އެގޮތުން އެ އަހަރު ވޯލްޑް ކަޕް ކާމިޔާބުކުރި އިންގްލެންޑް ޓީމުން އެންމެ ފާހަގަކޮށްލެވުނު ކުޅުންތެރިއަކީ ސަންޗޯއެވެ. އޭރު ސިޓީގެ ޒުވާން ޓީމަށް ކުޅެމުން އައި ސަންޗޯއަށް އެ މުބާރާތަށް ފަހު ޔޫރަޕްގެ ގިނަ ކްލަބުތަކަކުން ފާރަލިއެވެ. އޭގެ ތެރޭގައި މެންޗެސްޓާ ސިޓީވެސް ހިމެނެއެވެ. އެކަމަކު ލިބުނު ބޮޑެތި ހުށަހެޅުންތަކަށް ނޫނެކޭ ބުނެ ސަންޗޯ ބަދަލުވީ ޑޯޓްމުންޑަށެވެ.