ކަރެކްޝަނުން ރައީސް ޔާމީންގެ ގާނޫނީ ވަކީލުންގެ ޓީމުން ނެރުނު ބަޔާން ދޮގުކޮށްފި

އެމްއެމްޕީއާރުސީގެ ހިޔާނާތުގެ ފައިސާއިން މަނީ ލޯންޑަރިންގ ކުށް ސާބިތުވެ، ފަސް އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް، އެމަނިކުފާނުގެ ޤާނޫނީ ވަކީލުންނާ ސީދާ ބައްދަލުކޮށް، ޤާނޫނީ ވަކީލުންގެ އެހީތެރިކަން ހޯދުމުގެ ހައްގަށް މޯލްޑިވްސް ކަރެކްޝަނަލް ސަރވިސް އިން ހުރަސް އަޅަމުންދާ ކަމަށް ބުނެ، ރައީސް ޔާމީންގެ ގާނޫނީ ޓީމުން ނެރުނު ނޫސްބަޔާން، ކަރެކްޝަނަލް ސަރވިސްއިން ދޮގުކޮށްފިއެވެ.

ކަރެކަޝަނަލް ސަރވިސް އިން ބުދަ ދުވަހު ނެރުނު ނޫސްބަޔާނުގައި ބުނެފައިވަނީ، ވަކީލު ބައްދަލުވުމާ ގުޅޭ ގޮތުން، ކަރެކްޝަނަލް ސަރވިސްއިން އިސްވެ، ޤައިދީގެ ޤާނޫނީ ވަކީލުންނަށް 14 ޖުލައި 2020 ފޮނުވި ސިޓީގައި ބައްދަލުވުމަށް އެދުމުން ހަމަޖެހިފައިވާ އުޞޫލުގެ ތެރެއިން ބައްދަލުވުން ހަމަޖެއްސައި ދޭނެ ކަމަށް ސާފުކޮށް ދަންނަވާފައިވާނެ ކަމަށެވެ. އަދި ވަކީލު ބައްދަލުވުމަށާއި އެހެނިހެން ބައްދަލުވުންތަކަށް އެދޭ ފޯމުތައް މިހާލަތުގައި އީމެއިލް މެދުވެރިކޮށް ކޮންމެ ވަގުތެއްގައި ވެސް ކަރެކްޝަނަލް ސަރވިސްއަށް ފޮނުވޭނެ އިންތިޒާމް ހަމަޖައްސާފައި ވާކަން އިއުލާންކޮށްފައިވާކަން ވެސް އެ ސަރވިސުން ބުނެފައި ވެއެވެ.

ކޮވިޑް-19 ރޯގާއާ ގުޅިގެން، ޤާނޫނީ ވަކީލުންނާއި، އެހެނިހެން ބައްދަލުވުންތަކަށް އެދި އެސަރވިސްގެ visits@corrections.gov.mv އަށް އީމޭލް ކުރުމުން ހަމަޖެހިފައިވާ އުސޫލުގެ ތެރެއިން އެބައްދަލުވުމެއް އިންތިޒާމް ކޮށްދެވޭނެ ވާހަކަ ދަންނަވާފައިވާ ކަމަށެވެ.

މީގެ އިތުރުންވެސް މިކަމާއި ގުޅޭ މަޢުލޫމާތު ޤައިދީއަށާއި ގާނޫނީ ވަކީލުންނަށް ދީފައިވާނެ ކަމަށްވެސް ކަރެކްޝަނަލް ސަރވިސުން ބުނެއެވެ. ހަމައެހެންމެ، ރައީސް ޔާމީންގެ ގާނޫނީ ވަކީލުންގެ ފަރާތުން މާލޭ ޖަލަށް ހުށަހެޅި ފޯމާ ގުޅިގެން ޢަމަލުކުރަންވީ ގޮތުގެ އިރުޝާދު މާލޭ ޖަލުން ވަކީލުންނަށް ދީފައި ވާނެ ކަމަށްވެސް ކަރެކްޝަނަލް ސަރވިސްގެ ބަޔާނުގައި ބުނެފައި ވެއެވެ.

ނަމަވެސް، މާލޭ ޖަލުން ދީފައިވާ އިރުޝާދަށް ރައީސް ޔާމީންގެ ގާނޫނީ ވަކީލުންގެ ޓީމުން ޢަމަލުނުކޮށް، ޙަޤީޤަތް އޮޅޭފަދަ ގޮތަކަށް މައުލޫމާތު ފެތުރުމަކީ، އެކަމާމެދު ކަރެކްޝަނަލް ސަރވިސްއިން ކަންބޮޑުވާ ކަމެއް ކަމަށްވެސް އެބަޔާނުގައި ބުނެފައި ވެއެވެ.

އަންގަރާ ދުވަހު ރައީސް ޔާމީންގެ ގާނޫނީ ވަކީލުންގެ ޓީމުން ނެރެފައިވާ ބަޔާނުގައި ބުނެފައިވަނީ، ރައީސް ޔާމީނާ ބައްދަލުކުރުމަށްޓަކައި ވަކީލު ބައްދަލުވުމަށް އެދޭ ފޯމު ކަރެކްޝަނަލް ސަރވިސްގެ މާލޭ ޖަލަށް ހުށަހަޅަން ދިއުމުން ރައީސް ޔާމީނާ ސީދާކޮށް ގާތުން ބައްދަލުކުރުމުގެ ފުރުޞަތެއް ނުލިބޭނެ ކަމަށް އަންގައި ވަކީލު ބައްދަލުވުން ހަމަޖައްސައިދީފަ ނުވާ ކަމަށެވެ. އަދި ބައްދަލުވުމަށް އެދުނީ ހައިކޯޓުން އެންގެވި އެންގުމާ ގުޅިގެން ކަމަށް ބަޔާންކޮށް އަދި ބައްދަލުވުން ހަމަޖެހޭނެ ކަމަށް އަންގައި ކަރެކްޝަނަލް ސަރވިސް އިން ފޮނުވާފައިވާ ސިޓީ ދެއްކުމުން ވެސް ވަކީލު ބައްދަލުވުން ހަމަޖައްސައިދިނުމަށް އިންކާރުކޮށް ފޯމު ވެސް ބަލައިގަނެފައެއް ނުވާ ކަމަށް ވެސް ރައީސް ޔާމީންގެ ގާނޫނީ ޓީމުން ނެރެނު ބަޔާނުގައި ބުނެފައި ވެއެވެ.