އަލުން ފުރަބަންދު ކުރުމަކީ ރައްޔިތުންނަށް އެންމެ ފައިދާ ހުރިގޮތް ކަމަށް ނުދެކެން: ރައީސް ނަޝީދު
ކޮވިޑް-19 އާއެކު އުޅެވޭނެގޮތް ހޯދަންޖެހޭ
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު: ކޮވިޑް-19 ރޯގާއާއެކު އުޅެވޭނެގޮތް ހޯދަން ޖެހޭ ކަމަށް ވިދާޅުވި
ރާއްޖެ އަލުން ފުރަބަންދު ކުރުމުގެ ވިސްނުމަކީ ދިވެހިންނަށް އެންމެ ފައިދާ ހުރި ގޮތްކަމަށް ދެކެވަޑައިނުގަންނަވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހު ރައީސް ނަޝީދު ކުރެއްވި ޓްވީޓެއްގައި ވިދާޅުވެފައިވަނީ، ކޮވިޑް-19 ރޯގާއާއެކު އުޅެވޭނެ ގޮތް ހޯދަން ޖެހޭ ކަމަށެވެ. އަދި ރޯގާއިން ސަލާމަތް ވުމަށްޓަކައި ޤައުމު ބަންދުކޮށް، ރައްޔިތުން ބަނގު ރޫޓް ވުމަށް ޖާގަ ދީފިނަމަ ރައްޔިތުންނަށް ލިބޭ ގެއްލުން ބޮޑުވާނެ ކަމަށެވެ.
ރައީސް ނަޝީދު މިހެން ވިދާޅުވެ ޓްވީޓް ކުރެއްވާފައިވާއިރު، ސަރުކާރު ކޯލިޝަންގައި ހިމެނޭ، ކުރީގެ ރައީސް މައުމޫން އަބްދުލްގައްޔޫމްގެ މޯލްޑިވްސް ރިފޯމް މޫވްމަންޓް (އެމްއާރުއެމް) އިން ވަނީ ކޮވިޑް-19 އަށް ޕޮޒިޓިވްވާ މީހުންގެ އަދަދު އިތުރުވަމުންދާތީ، ސަރުކާރުން ދީފައިވާ ލުއިތަކަށް ބަދަލު ގެނައުމަށް ގޮވާލާފަ އެވެ. އަދި މިހާރަށްވުރެ ހަރުދަނާ ފިޔަވަޅުތަކެއް އެޅުމަށް ވަނީ ސަރުކާރަށް ގޮވާލާފައެވެ.
މިދިޔަ މާރިޗް މަހުގެ 27 ވަނަ ދުވަހު ރާއްޖޭގެ ބޯޑަރު ބަންދުކޮށް، މާލެ ސަރަހައްދު ފުރަބަންދު ކުރީ އޭޕްރީލް މަހުގެ 15 ވަނަ ދުވަހު އެވެ.
މާލެ ސަރަހައްދުގެ ފުރަބަންދަށް ލުއިތައް ދޭން ފެށީ ޖޫން މަހުގެ މެދުތެރޭގައެވެ. އޭގެ ފަހުން މިހާރު މިދަނީ ލުއި ދިނުމުގެ ތިން ވަނަ ފޭސްއެވެ.
މި ޖުލައި މަހުގެ 15 އިން ފެށިގެން ރާއްޖޭގެ ބޯޑަރު ވެސް ވަނީ އަލުން ހުޅުވާލާފައެވެ. އަލުން ބޯޑަރު ހުޅުވާލުމުން ރާއްޖެއައި ފަތުރުވެރިންގެ ތެރެއިން މިހާތަނަށް ކޮވިޑް-19އަށް ޕޮޒިޓިވް ވެފައިވަނީ އެންމެ ފަތުރުވެރިޔެކެވެ.
އަންގާރަ ދުވަހަކީ ރާއްޖެއިން މިހާތަނަށް އެންމެ ގިނަ މީހުން ޕޮޒިޓިވްވި ދުވަސްތަކުގެ ތެރެއިން ދުވަހެކެވެ. އަންގާރަ ދުވަހު 137 މީހަކު ޕޮޒިޓިވް ވެފައިވެއެވެ.
މިހާތަނަށް ރާއްޖެއިން 3506 މީހަކު ކޮވިޑް-19އަށް ޕޮޒިޓިވް ވެފައިވާއިރު، 2544 މީހަކު ރަނގަޅުވެފައި ވެއެވެ. ކޮވިޑް-19 ޖެހިގެން ފަރުވާ ދެމުންދަނީ 932 މީހަކަށެވެ. އޭގެ ތެރެއިން 64 މީހަކު ހޮސްޕިޓަލުގައި އެޑްމިޑްކޮށްގެން ފަރުވާދެމުން ދެއެވެ.
