ހުވަދުއަތޮޅުގެ ކަނޑުއޮޅިތަކަށް ޑައިވްކުރުމުގެ ހަރަކާތެއް ފަށައިފި

ހުވަދޫ އަތޮޅުގެ ހުރިހާ ކަނޑުއޮޅިތަކަށް ފީނުމުގެ ހަރަކާތެއް ދިވެހި މަސްވެރިންގެ ޖަމުޢިއްޔާ އިން "ޑިސްކަވަރ ހުވަދު"ގެ ނަމުގައި ފަށައިފިއެވެ.

މި ޙަރަކާތް ކުރިއަށް ގެންދިއުމަށް ހަމަޖެހިފައިވަނީ މިއަދު ފަށާފައިވާއިރު ހަރަކާތް ކުރިއަށްދާނީ އޮގަސްޓް 3 ގެ ނިޔަލަށެވެ.

މި ޙަރަކާތަކީ، ދަ ސްމޯލް އައިލެންޑް ޑިވެލޮޕިން ސްޓޭޓްސް - ކޮމިއުނިޓީ ބޭސްޑް އެޑަޕްޓޭޝަން ޓު ކްލައިމަޓް ޗޭންޖް (ސިޑްސް ސީ.ބީ.އޭ) ޕްރޮގްރާމްގެ ދަށުން ގެންދެވޭ ޙަރަކާތެއް ކަމަށާއި އޮސްއެއިޑްގެ އެހީގެ ދަށުން ޔޫ.އެން.ޑީ.ޕީ. ގެ ސުމޯލް ގްރާންޓްސް ޕްރޮގްރާމުން ހިންގޭ ޕްރޮގްރާމެއް ކަމަށް މަސްވެރިންގެ ޖަމުޢިއްޔާ ބުންޏެވެ.

ސިޑްސް ސީ.ބީ.އޭ ޕްރޮގްރާމުގެ މަޤްސަދަކީ، މޫސުމަށް އަންނަ ބަދަލުތަކާއި ގުޅިގެން ކުރާނެ އަސަރުތަކާއި، އަދި ދިމާވެދާނެ ހާލަތްތަކަށް މުޖުތަމަޢު ހޭލުންތެރިކުރުމާއި، ތައްޔާރުވުމާއި، ހޭނުމެވެ. އަދި ދިރުންތަކާއި، ޤުދުރަތީ މާހައުލު ރައްކާތެރިކޮށް، އާމްދަނީ ހޯދޭނެ ޤުދުރަތީ ވަސީލަތްތައް ދެމެހެއްޓެނިވި ގޮތުގައި ބޭނުންކުރުމަށް މަގުފަހިކުރުމެވެ.

މިގޮތުން އޮސްޓްރޭލިއަން އެއިޑްގެ އެހީތެރިކަމާއިއެކު، ޔޫ.އެން.ޑީ.ޕީ ސްމޯލް ގްރާންޓްސް ޕްރޮގްރާމްގެ ދަށުން، ދިވެހި މަސްވެރިންގެ ޖަމުޢިއްޔާއިން ކުރިއަށްގެންދާ "ޑިސްކަވަރ ހުވަދު" ޙަރަކާތުގައި ހުވަދުއަތޮޅުގެ ވަށައިގެންވާ ކަނޑުއޮޅިތަކަށް ފީނުމުގެ އިތުރުން، ޑައިވްކުރުމުގައި ދިމާވާ އެކިކަންކަމަށް މަސްވެރިންނާއި ޑައިވަރުން ހޭލުންތެރި ކުރުމަށް ޙާއްޞަ ޙަރަކާތެއް ކުރިއަށް ގެންދާނެ ކަމަށާއި ޑައިވްސައިޓްތަކުގެ ޢިލްމީ ދިރާސާއަކާއެކު މި ޙަރަކާތާގުޅޭ ޙާއްޞަ ޑޮކިއުމެންޓްރީތަކެއް އުފައްދާނެ ކަމަށް ވެސް އެ ޖަމިއްޔާ އިން ބުންޏެވެ.

ހޭލުންތެރިކުރުވުމުގެ ޙަރަކާތުގައި މަސްވެރިކަންކަމަށް ބޭނުންވާ އެން ހިފުމަށްޓަކާ ޑައިވްކުރާއިރު، ޑައިވަރުން ސަމާލުކަން ދޭންވީ ކަންތައްތަކާއި ސަލާމަތާއި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތަކާއި އަދި ޑައިވްކުރުމަށްޓަކާ ޑައިވް ކޯސް ހެދުމުގެ މުހިންމުކަމުގެ މައްޗަށް އަލިއަޅުވާލާނެއެވެ. މި ހޭލުންތެރިކުރުވުމުގެ ކެމްޕެއިން ވަރޗުއަލްކޮށް ކުރިއަށް ގެންދިއުމަށް ހަމަޖެހިފައިވަނީ، ފަންނީ މާހިރުން މި ކެމްޕެއިންގައި ބައިވެރިވާ ގޮތަށެވެ.

ހުވަދުއަތޮޅަކީ ދުނިޔޭގެ ނިސްބަތުން އެންމެ ބޮޑު މުރަކައިގެން އަތޮޅެވެ. ރާއްޖެއަށް ފީނުމަށް އަންނަ ފަތުރުވެރިންގެ މެދުގައި މަޤްބޫލު "ޑީޕް ސައުތް"ގައި ހިމެނޭ ހުވަދު އަތޮޅަކީ، ޑައިވް ސައިޓްތައް ގިނަ އަދި ޤުދުރަތީ ރީތިކަން ލިބިފައިވާ ފަރުތަކާއި ރަށްތައް އެކުލެވިގެންވާ އަދި ދޫނިތަކަށް ޙާއްސަ ރަށްތަކެއް ވެސް ހިމެނިފައިވާ އަތޮޅެކެވެ.

"ޑިސްކަވަރ ހުވަދޫ"ގެ ތެރެއިން މި ޑައިވް ސައިޓްތަކުގެ ހާލަތު ދެނެގަނެވި، ޢިލްމީ ގޮތެއްގައި އެތަންތަނުގައި ހުރި ދިރުންތަކާއި ގުޅޭގޮތުން ދިރާސާއެއް ކުރުމަށް ޑާޓާ އެއްކުރެވިގެންދާނެއެވެ. މި ޢިލްމީ ދިރާސާ ކުރިއަށްދާނީ މިކަމުގެ ފަންނީ މާހިރުންގެ އިރުޝާދާއި އެއްގޮތަށް ކަމަށް ވެސް އެ ޖަމިއްޔާ އިން މައުލޫމާތުދެއެވެ.

އެ ޖަމިއްޔާ އިން އިތުރަށް ބުނީ މި ޙަރަކާތުގައި ޑައިވްތައް ކުރިއަށްދާނީ މިކަމުގެ އެންމެ މަތީ މިންތީގެ ސަލާމަތާއި ރައްކާތެރިކަމުގެ ފިޔަވަޅުތަކާ އެކުގައި ކަމަށާއި އެގޮތުން ތަޖުރިބާކާރު ޑައިވް އިންސްޓްރަކްޓަރުން މިޙަރަކާތުގައި ބައިވެރިވާނެ ކަމަށެވެ. މައިގަނޑު ގޮތެއްގައި ޑައިވްތައް ކުރިއަށްދާނީ މަސްވެރިންގެ ޖަމުޢިއްޔާއިން ހޮވާލެވޭ ޑައިވަރުންނާ އެކުގައި ކަމަށް ވެސް ވަނީ ބުނެފައެވެ.

މި ހަރަކާތް ކުރިއަށް ގެންދަނީ ކަމާބެހޭ އިދާރާތަކުން ނަގަންޖެހޭ ހުއްދަތަކާއެކުގައިކަން ފާހަގަކޮށް އެ ޖަމިއްޔާ އިން ބުނީ މި ޙަރަކާތުގައި މާލެއިން ބައިވެރިވާ އެކްސްޕާޓުންގެ ޓީމުގެ ޑައިވް ޙަރަކާތްތައް ހުވަދުއަތޮޅުގެ ދެކުނުބިތުގައި ކުރިއަށްދާ ކަމަށެވެ. މިޓީމުގައި ހިމެނެނީ އަންޑަރ ވޯޓަރ ވީޑިއޯގްރާފަރަކާއި، އެންވަޔަރަމެންޓަލް އެކްސްޕާޓެއްގެ އިތުރުން ކޮމިއުނިކޭޝަންސް ސްޕްޝަލިސްޓެކެވެ.

މި ޙަރަކާތުގެ ޕާޓްނަރުންނަކީ މެރިން އިކުއިޕްމެންޓްސް، އަޕްނިއާ މޯލްޑިވްސް، އަދި ބޭންކް އޮފް މޯލްޑިވްސްއެވެ. މި ޙަރަކާތް އިންތިޒާމް ކުރަނީ ޓާކޮއިޝް ލެބުން ކަމަށް މަސްވެރިންގެ ޖަމިއްޔާއިން ބުނެއެވެ.