އެއްވުންތައް ކުރިޔަށް ގެންދެވޭނީ އެޗްޕީއޭގެ ގަވާއިދުތަކާއި އެއްގޮތަށް: ފުލުހުން
28 ޖުލައި 2020 | އަންގާރަ 18:5330ށް ވުރެ ގިނަ މީހުން އެއްނުވުމަށް އެޗްޕީއޭއިން ވަނީ އިލްތިމާސްކޮށްފައި
އިދިކޮޅުން ބޭއްވި އެއްވުމެއްގެ ތެރެއިން
މާލޭގައި ބާއްވާ އެއްވުންތައް ކުރިޔަށް ގެންދެވޭނީ ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގަވާއިދުތަކާއި އެއްގޮތަށްކަމަށް ފުލުހުން ބުނެފިއެވެ.
އެޗްޕީއޭއިން ބުނެފައިވާ ގޮތުން މި ހާލަތުގައި 30ށް ވުރެ ގިނަ މީހުންނަށް އެއް ނުވެވޭނެއެވެ. އަދި އެއްވާ މީހުންވެސް ތިބެން ޖެހޭނީ މާސްކު އަޅައިގެން ގައިދުރުކަން ބަހައްޓައިގެންނެވެ.
އަންގާރަ ދުވަހުގެރޭ ފުލުހުންގެ އިދާރާއިން އާއްމުކޮށްފައިވާ ބަޔާނެއްގައި ބުނީ، މި ފަހަކަށް އައިސް ކޮވިޑް-19ށް ޕޮޒިޓިވްވާ މީހުންގެ އަދަދު ގިނަވެފައިވާއިރު، ފޮރޮންޓްލައިން މަސައްކަތްކުރާ ފުލުހުންވެސް ޕޮޒިޓިވްވާ އަދަދު ގިނަވަމުން އަންނަ ކަމަށެވެ.
އެހެންކަމުން ގާނޫނީ ތަރަހައިގެ ތެރެއިން، ހާލަތާ އެކަށީގެންވާ ގޮތްތައް ބޭނުންކޮށްގެން ހިޔާލުފާޅު ކުރުމަށް ފުލުހުން އިލްތިމާސްކުރެއެވެ.
އާދިއްތަ ދުވަހުގެރޭ ޕީޕީއެމް/ޕީއެންސީން ކުރިޔަށް ގެންދިޔަ މުޒާހަރާގައި ފުލުހުން ނޫސްވެރިންނަށް ހުރަސްއެޅި ކަމުގެ ޝަކުވާ ލިބިފައިވާ ކަމަށް މީޑިއާ ކައުންސިލުން ވަނީ ބުނެފައެވެ. ފުލުހުން ބުނީ، އެއްވުންތައް ކަވަރު ކުރުމުގައި ދިމާވާ ދަތިތައް ހައްލުކޮށް ވީހާވެސް ގާތުން އެއްވުންތައް ކަވަރު ކުރުމުގެ ފުރުސަތުފަހިކޮށް ދިނުމުގެ މަސައްކަތް ކުރަމުންދާނެ ކަމަށެވެ.
