އެއްވުންތައް ރޫޅާލުމުގައި ފުލުހުން ހާލަތާއި ނުބައްދަލު ބާރުގެ ބޭނުންކޮށްފައިވޭ، ނޫސްވެރިންނަށް އަނިޔާވެފައިވޭ: އެޗްއާރުސީއެމް
12 މާރިޗު 2018 | ހޯމަ 14:41ފުލުހުންގެ އަމަލުތައް ހުންނަ ގޮތުގެ ސަބަބުން އާންމުގެ ތެރެއިން ބައެއް މީހުންނަށާއި އެއްވުން ކަވަރުކުރުމަށް ހަރަކާތްތެރިވާ ނޫސްވެރިންނަށް އަނިޔާވެފައިވޭ
އެއްވުމެއް ރޫޅާލުމުގައި ފުލުހުން ހަރަކާތްތެރިވަނީ
އެއްވުންތައް ރޫޅާލުމުގައި ފުލުހުން ހާލަތާއި ނުބައްދަލު ބާރުގެ ބޭނުން ކޮށްފައިވާ ކަމަށާއި، ފުލުހުންގެ އަމަލުތަކުގެ ސަބަބުން އާންމުންނަށާއި ނޫސްވެރިންނަށް އަނިޔާވެފައިވާ ކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) އިން ބުނެފި އެވެ.
ފެބުރުއަރީ މަހުގެ 1 ވަނަ ދުވަހު ސުޕްރީމް ކޯޓުން ނެރިފައިވާ އަމުރު ތަންފީޒްކުރުމަށް ގޮވާލާ، މާލެ އާއި އެކި އަތޮޅުތަކުގައި ކުރިއަށްގެންދިޔަ އެއްވުންތައް ވަރަށް ގާތުން އެޗްއާރުސީއެމްއިން މޮނީޓަކޮށްފައިވާކަން ހާމަކޮށް، އެ ކޮމިޝަނުން ނެރުނު ރިޕޯޓުގައި ބުނެފައިވަނީ އެއްވުންތައް ރޫޅާލުމުގައި ފުލުހުން ހާލަތާއި ނުބައްދަލު ބާރުގެ ބޭނުންކޮށްފައިވާކަން ފާހަގަކުރެވިފައިވާ ކަމަށެވެ. އަދި ފުލުހުންގެ އަމަލުތައް ހުންނަ ގޮތުގެ ސަބަބުން އާންމުގެ ތެރެއިން ބައެއް މީހުންނަށާއި އެއްވުން ކަވަރުކުރުމަށް ހަރަކާތްތެރިވާ ނޫސްވެރިންނަށް އަނިޔާވެފައިވާ ކަމަށް ރިޕޯޓްގައި ބުނެފައިވެއެވެ.
އޭގެއިތުރުން އެޗްއާރުސީއެމްގެ ރިޕޯޓްގައި ބުނެފައިވަނީ ލެސްލީތަލް ހަތިޔާރު ބޭނުންކުރެވިދާނެ ކަމަށް ބަޔާންކޮށްފައިވާ "ހަތިޔާރުު ގެންގުޅުމާއި ބޭނުންކުރުމާއިބެހޭ ގަވައިދު" ގައި ބަޔާންކޮށްފައިވާ ގޮތާއި ހިލާފަށް ބައެއް ހާލަތްތަކުގައި ފުލުހުން ޕޭޕަރ ސްޕްރެ ބޭނުންކޮށްފައިވާ ކަމަށެވެ. އަދި މުއާމަލާތްކުރުމުގައި ފުލުހުން ވެސް އެންމެ އެކަށީގެންނުވާ ބަސްމަގު ބޭނުން ކޮށްފައިވާކަން ފާހަގަކުރެވިފައިވާކަމަށް ވެސް ރިޕޯޓުގައި ބުނެފައިވެއެވެ. ރިޕޯޓުގައި 8 ވަނަ ކަމެއްގެ ގޮތުގައި ބުނެފައިވަނީ ފަހަކަށް އައިސް ގިނަ އެއްވުންތައް ސުލްހަވެރިކަމާއެކު ކުރިއަށް ގެންގޮސްފައިވާ ކަމަށާއި، އެއްވުންތައް ރޫޅާލުމުގައި ފުލުހުން ހާލަތާއި ނުބައްދަލު ބާރު ފަހަކަށް އައިސް ބޭނުންކޮށްފައިވާކަން ފާހަގަކުރެވިފައިވާ ކަމަށެވެ.
އެޗްއާރުސީއެމްގެ ރިޕޯޓްގައި ބުނެފައިވަނީ މުޒާހަރާތައް ރޫޅާލުމުގެ ތެރޭގައި ފުލުހުންގެ ބެލުމުގެ ދަށަށް ގެންދިއުމަށް ފަހު އަނިޔާކޮށްފައިވާ ކަމަށް ތުހުމަތުކުރެވޭ 6 މައްސަލައެއް އެންޓި ޓޯޗަރ ޤާނޫނުގެ ދަށުން ބަލަމުން އަންނަ ކަމަށެވެ. އަދި އޭގެތެރެއިން 3 މައްސަލައެއް ބަލަނީ އެޗްއާރުސީއެމްގެ އަމިއްލަ އިސްނެގުމަށް ކަމަށް ރިޕޯޓުގައި ބުނެފައިވެއެވެ.
އެޗްއާރުސީއެމްއިން ބުނީ ރިޕޯޓްގައި ބުނެފައިވާ ކަންތައްތައް ފެބުރުއަރީ 18 ވަނަ ދުވަހު އަދި މާރިޗު މަހުގެ 11 ވަނަ ދުވަހު ފުލުހުންނާއި ހިއްސާކޮށްފައިވާ ކަމަށެވެ.
