ވަކި ބައެއްގެ މަސްލަތު ހިމާޔަތް ކުރުމަށްޓަކައި ގާނޫނުތައް ހިތަށް އެރިގޮތަކަށް މާނަކޮށްގެން ގެންދެވޭނީ ވަކި މިންވަރަކަށް: ފާރިސް
22 އޮކްޓޯބަރު 2018 | ހޯމަ 15:57ސަރުކާރު ޖަވާބު ދާރީ ކުރުވުމަށް ގިނަ މަސައްކަތްތަކެއް ކުރެވުނު
ދިއްގަރު ދާއިރާގެ މެންބަރު އަހުމަދު ފާރިސް މައުމޫން ސުޕްރީމް ކޯޓަށް ވަދެވަޑައިގަންނަވަނީ
ސުޕްރީމް ކޯޓުގެ ހުކުމުން ހާމަވެގެންދިޔައީ ވަކި ބައެއްގެ މަސްލަތު ހިމާޔަތް ކުރުމަށްޓަކައި ގާނޫނުތައް ހިތަށް އެރިގޮތަކަށް މާނަކޮށްގެން ގެންދެވޭނީ ވަކި މިންވަރަކަށް ކަމަށް ދިއްގަރު ދާއިރާގެ މެންބަރު އަހުމަދު ފާރިސް މައުމޫން ވިދާޅުވެއްޖެއެވެ.
އިންތިހާބު ބާތިލް ކުރަން ޖެހޭ ފަދަ ސަބަބެއް ނެތް ކަމަށް ސުޕްރީމް ކޯޓުން ކަނޑައެޅުމާ ގުޅިގެން ނޫސްވެރިންނާ ވާހަކަފުޅު ދައްކަވަމުން ފާރިސް ވިދާޅުވީ ސަރުކާރު ޖަވާބުދާރީ ކުރުމަށް ގުޅިފައިވާ ސިޔާސީ ޕާޓީތަކުން މަސައްކަތް ކުރަމުންދާތާ ގިނަ ދުވަސްތަކެއް ވެފައިވާ ކަމަށެވެ. އަދި ހުރިހާ ރައްޔިތުން ވެސް ވަރަށް ސާފު ބަހުން މި ސަރުކާރަށް ނޫނެކޭ ބުނެފައި ވާކަމަށް ފާރިސް ވިދާޅުވި އެވެ.
"އަނެއްކާވެސް އެބޭފުޅުންނަށް ލިބިފައިވާ ގާނޫނީ މަރުހަލާއެއް ބޭނުން ކުރެއްވީ. އެހެން ނަމަވެސް ވަރަށް މުހިއްމު ވަގުތުތަކެއް ގެއްލިގެން ދިޔައީ. މިހާރު އަޅުގަނޑުމެން ގަބޫލު ކުރަނީ ދިވެހިންގެ ހުރިހާ އެންމެންނަށް ވެސް މި ހަގީގަތް ގަބޫލު ކުރެވިއްޖެ ކަން." ފާރިސް ވިދާޅުވިއެވެ.
ބައެއް ބޭފުޅުންނަށް ހަގީގަތް ގަބޫލު ނުކުރެވިގެން އުޅުއްވި ނަމަވެސް ބޮޑު އަޣުލަބިއްޔަތެއް ބޭނުން ވަނީ އިބްރާހިމް މުހައްމަދު ސޯލީހުގެ ވެރިކަން ކަމަށް ފާރިސް ވިދާޅުވިއެވެ. ކުރިއަށް އޮތް ދުވަސްތަކުގައި ޓްރާންސިޝަން މަސައްކަތްތައް ވެސް ވަރަށް އޮމާން ކަމާއެކު ކުރިއަށްދާނެ ކަމަށް އުންމީދު ކުރައްވާ ކަމަށް އެމަނިކުފާނު ވިދާޅުވިއެވެ.
ރިޔާސީ އިންތިހާބު އެއްކޮން ބާތިލް ކޮށްދިނުމަށް އެދި ރައީސް އަބްދުﷲ ޔާމިން އަބްދުލް ގައްޔޫމް ހުށައެޅުއްވި މައްސަލަ އެމަނިކުފާނާ ދެކޮޅަށް އާދިއްތަ ދުވަހު ނިންމާފައި ވަނީ އެ މައްސަލަ ބެއްލެވި ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުންނެވެ.
