ކުރިޔަށް އޮތް ރިޔާސީ އިންތިހާބުގައި ވާދަކުރެއްވުމަށް އެމްޑީޕީގެ ޓިކެޓް ހޯއްދެވުމަށް ކެމްޕެއިން ކުރައްވަމުން ގެންދަވާ ކުރީގެ ރައީސް މުހައްމަދު ނަޝީދުގެ ކެމްޕެއިން ޓީމުން ބ. އަތޮޅުގެ އެކި ރަށްތަކަށް ހުކުރު ދުވަހުވެސް ޒިޔާރަތްކޮށްފިއެވެ.

މި ކެމްޕެއިން ޓީމުގައި އިސްކޮށް ހަރަކާތްތެރިވަނީ ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އަލީ ނިޒާރެވެ. ނިޒާރުގެ އިތުރުން ވެސް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު މުހައްމަދު ނާޒިމް އާއި އެމްޑީޕީގެ ލީޑަރޝިޕްގެ އިސް ފަރާތްތައް މި ދަތުރުގައި ބައިވެރިވެއެވެ.

ޖަޒީރާ ރައީސްގެ ނަމުގައި ހިންގަމުންދާ މި ކެމްޕެއިންގެ ހަރަކާތްތައް މިއަދު ފަށާފައިވަނީ ބ. ދޮންފަނުންނެވެ. ދޮންފަނުގެ އެމްޑީޕީއަށް ސަޕޯޓްކުރައްވާ ރައްޔިތުންނާއި މި ޓީމުން ބައްދަލުކޮށްފައިވާއިރު މިއަދު އެ ޓީމުން ވަނީ ބ. އޭދަފުށްޓައް ވެސް ގޮސްފައެވެ. މި ދެ ރަށުގައިވެސް ވަނީ ރައީސް ނަޝީދުގެ ކެމްޕެއިން ޕޯސްޓަރުތައް ހިއްޕުމަށްފަހު އެ ރަށްރަށުގެ ކެމްޕެއިން ޓީމްތަކާއި ބައްދަލުކޮށްފައެވެ.

އެ އަތޮޅުގެ ހިތާދޫގައި ވެސް ޖަޒީރާ ރައީސްގެ ކެމްޕެއިން ހަރަކާތްތައް ކުރިޔަށް ގެންގޮސްފައިވާއިރު ހުކުރު ދުވަހުގެރޭ ތުޅާދޫގައި ބޮޑު ޖަލްސާއެއް ބޭއްވުމަށް ވަނީ ނިންމާފައެވެ. ތުޅާދޫއިން ވަނީ ޖަޒީރާ ރައީސްގެ ކެމްޕެއިން ޓީމަށް ހޫނު މަރުހަބާއެއް ދަންނަވާފައެވެ.

ހަމައެހެންމެ ކެމްޕެއިން ޓީމުން ވަނީ އިއްޔެ އެ އަތޮޅުގެ މާޅޮހާއި ކަމަދޫގެ އިތުރުން ކުޑަރިކިލު އަދި ދަރަވަންދޫއަށްވެސް ޒިޔާރަތްކޮށްފައެވެ. މި ރަށްރަށުގެ ރައްޔިތުންނާއި ސްކައިޕް މެދުވެރިކޮށް ރައީސް ނަޝީދު ވާހަކަ ދައްކަވާފައިވާއިރު ކެމްޕެއިން ޓީމުން ވަނީ ރަށްރަށުގެ ރައްޔިތުންނާއި ބައްދަލުކޮށް، ކެމްޕެއިނާއި ގުޅޭ އިތުރު މައުލޫމާތު ދީފައެވެ.

ޖަޒީރާ ރައީސްގެ ކެމްޕެއިން ހަރަކާތްތައް ދަނީ ބާރަށް ކުރިއަށެވެ. އެގޮތުން މާލެއާއި އަތޮޅުތެރޭގައި އެހަރަކާތްތައް ކުރިއަށްދާއިރު ހަފްތާ ބަންދާ ދިމާކޮށް މާލެއިން އަތޮޅުތަކަށް ޓީމުތައް ދަނީ ދަތުރު ކުރަމުންނެވެ. ބ އަތޮޅުގެ އިތުރުން ހުވަދު އަތޮޅުގައި ވެސް އެ ކެމްޕެއިންގެ ޓީމެއް ދަނީ ހަރަކާތްތެރިވަމުންނެވެ