އަނިލްގެ އިތުބާރުގެ މައްސަލަ ކުރިއަށް ގެންދެވޭނީ ގަވާއިދު އިސްލާހުކޮށްގެން: މަސީހު
އިމްޕީޗްމެންޓް އުސޫލާ ގުޅޭ ގޮތުން ސުޕްރީމް ކޯޓުން ކުރި ހުކުމް
ރައްޔިތުންގެ މަޖިލީހުގެ ރައީސް އަބްދުﷲ މަސީހު
ރައްޔިތުންގެ މަޖިލީހަށް ހުށަހަޅާފައިވާ ބަންޑާރަނައިބު މުހައްމަދު އަނިލްގެ އިތުބާރު ނެތް ކަމުގެ މައްސަލަ ކުރިއަށް ގެންދެވޭނީ ގަވާއިދު އިސްލާހުކޮށްގެން ކަމަށް މަޖިލިސް ރައީސް އަބްދުﷲ މަސީހު ވިދާޅުވެއްޖެ އެވެ.
ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ ދެވަނަ ދައުރުގެ ފަހު ޖަލްސާ ނިންމަވާލެއްވުމުގެ ކުރިން މަސީހު ވިދާޅުވީ އިމްޕީޗްމެންޓް އުސޫލާ ގުޅޭ ގޮތުން ސުޕްރީމް ކޯޓުން ކޮށްފައިވާ ހުކުމާ ގުޅިިގެން މައްސަލަ ކުރިއަށް ގެންދިއުމަށް މަޖިލިސް ގަވާއިދަށް އިސްލާހު ގެންނަންޖެހޭ ކަމަށެވެ. ނަމަވެސް، އިސްލާހު ގެނެސް އެ މައްސަލަ ބާއްވާނެ ދުވަހެއް މަސީހު ވިދާޅެއް ނުވެ އެވެ.
މީގެ އިތުރުން މަސީހު ވިދާޅުވީ އިތުބާރުގެ މައްސަލައިގެ ޕެޓިޝަންގައި އެއް މެންބަރެއްގެ ނަން ދެ ފަހަރު އޮތް ކަމަށެވެ.
ބަންޑާރަނައިބު އަނިލް ހުށަހެޅުއްވި ދުސްތޫރީ މައްސަލައެއްގައި މެއި މަހުގެ 22 ވަނަ ދުވަހު ސުޕްރީމް ކޯޓުން ކުރި ހުކުމުގައި ވަނީ ރައްޔިތުންގެ މަޖިލީހުން ފާސްކުރާ ވަޒީރުންގެ އިތުބާރު ނެތް ކަމުގެ މައްސަލަތަކުގައި ފަހުގެ ނިންމުން ނިންމާނީ އެ ކޯޓުން ކަމަށެވެ.
ބަންޑާރަނައިބު އެ މައްސަލަ ހުށަހެޅީ، ގާނޫނު އަސާސީގެ 101 ވަނަ މާއްދާ މާނަ ކުރުމަށެވެ. އެ މާއްދާގައި ބުނެފައިވަނީ، މަޖިލީހުގެ 10 މެންބަރުން ސަބަބު ބަޔާންކޮށް ސޮއިކޮށް ހުށަހަޅާ ހުށަހެޅުމަކުން ވަޒީރުންގެ މަޖިލީހުގެ މެންބަރެއްގެ އިތުބާރު ނެތް ކަމުގެ ވޯޓެއް ނެގުމަށް ހުށަހެޅިދާނެ ކަމަށެވެ.
ސުޕްރީމް ކޯޓުގެ ހުކުމުގައި ބުނެފައިވަނީ، އެކަށީގެންވާ ސަބަބެއް ނެތި ސިޔާސީ ބޭނުމަށް މިނިސްޓަރުންގެ އިތުބާރު ނެތް ކަމުގެ މައްސަލަ (ވޯޓް އޮފް ނޯ ކޮންފިޑެންސް) ހުށަނޭޅެނެ ކަމަށެވެ. މިނިސްޓަރަކު ވަކިކުރެވޭނީ އެކަށީގެންވާ ސަބަބުތަކެއް އޮވެގެން ނަގާ އިމްޕީޗްމެންޓް ވޯޓަކުން އެކަނި ކަމަށެވެ. އަދި އެގޮތަށް މަޖިލީހުން ފާސްކުރި ނަމަވެސް އެކަމުގައި އެންމެފަހުގެ ނިންމުން ނިންމާނީ ސުޕްރީމް ކޯޓުން ކަމަށެވެ. އެ އުސޫލަށް މަޖިލީހުން ތަބާވާން ޖެހޭނެ ކަމަށް ވެސް ހުކުމުގައިވެ އެވެ.
ބަންޑާރަނައިބުގެ މަގާމުގައި އަނިލް ހުންނަވައިގެން ބާރުތައް ވަކިވެފައިވާ ނިޒާމް ގަނޑުބަނޑުކޮށް، ރައްޔިތުން މަޖިލީހުގެ މެންބަރުންގެ މަސައްކަތުގައި ރިއާޔަތްކުރަންޖެހޭ ކަންކަމުގެ ތެރެއަށް ސިޔާސީ ނުފޫޒު ފޯރުވަމުންގެންދަވާ ކަމަށް ބުނެ އިތުބާރުގެ މައްސަލަ ހުށަހެޅީ މިމަހުގެ 10 ވަނަ ދުވަހު އެވެ.
ރައްޔިތުންގެ މަޖިލީހުގެ މަސައްކަތްތަކުގެ ތެރޭގައި ސަރުކާރަށް ފާރަވެރިވުމާއި ޖަވާބުދާރީ ކުރުވުމާއި، ދައުލަތުގެ މަގާމުތަކަށް މީހުން އައްޔަންކުރުމާއި، އެ މަގާމްތަކަށް ފަރާވެރިވުމާއި ޖަވާބުދާރީކުރުވުމާއި، މަގާމްތަކުން މީހުން ވަކިކުރުން ހިމެނޭއިރު މިކަންކަން މެންބަރުންނަށް މިނިވަންކަމާއެކު ކުރުމުގެ އިޚްތިޔާރު ގެއްލޭނެ ގޮތަށް ސިޔާސީ ޕާޓީގެ ނުފޫޒްގެ ދަށަށް ގެންދިއުމަށްޓަކައި ސުޕްރީމް ކޯޓަށް މައްސަލަ ހުށަހެޅިކަމަށް ބުނެފައިވެއެވެ.
މީގެ އިތުރުން، ސިޔާސީ ޕާޓީގެ ގާނޫނުގެ 16 ވަނަ މާއްދާގެ (ބ) ގައި، ސިޔާސީ ޕާޓީއެއްގެ ޓިކެޓުގައި އިންތިޚާބުވެފައިވާ މީހަކު ޕާޓީގެ ސުލޫކީ މިންގަނޑާ ޚިލާފުވެގެން ޕާޓީން ވަކިކުރިކަމުގައި ވިޔަސް، އެމީހަކު އިންތިޚާބުވެފައިވާ މަގާމުގއި ދެމި ހުންނާނެ ކަމަށް ބުނެފައިވާއިރު، އެ މާއްދާއަށް ބެލުމެއްނެތި ސުޕްރީމް ކޯޓުގައި ވަކާލާތުކޮށް ގާނޫނު އަސާސީގެ 90 ވަނަ މާއްދާގެ ދަށުން މަޖިލިސް މެންބަރުންގެ އިމްތިޔާޒަށް އަރައިގަނެ ރައްޔިތުންގެ މަޖިލީހުގެ ބާރުތައް ކަނޑާލާފައިވާ ކަމަށް ވެސް އެ މައްސަލައިގައި ބުނެފައިވެއެވެ.
މީގެ ކުރިން ޖުލައި މަހުގެ 20 ވަނަ ދުވަހު ވެސް އަނިލްގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅި އެވެ. ނަމަވެސް، މަޖިލީހުން ވަނީ އެ މައްސަލަ ބޭރުކޮށްލާފަ އެވެ. މައްސަލަ ބޭރުކޮށްލާފައިވަނީ ޖުލައި 25 ވަނަ ދުވަހު އެވެ.
މަޖިލިހުގެ ގަވައިދުގައިވާ ގޮތުން ވަޒީރެއްގެ އިތުބާރު ނެތްކަމުގެ މައްސަލައެއް ހުށަހަޅައިފި ނަމަ، މަޖިލިހުގައި ބަހުސް ފެށުމުގެ 14 ދުވަސް ކުރިން އެ ވަޒީރަކަށް އެކަން އަންގަންޖެހެ އެވެ. އަދި އެ ބަހުސްގައި އަނގަ ބަހުންނާއި ލިޔުމުން ދިފާއުވުމުގެ ހައްގު އެ ވަޒީރަކަށް ލިބިވަޑައިގަންނަވަ އެވެ.
ވަޒީރެއްގެ އިތުބާރު ނެތްކަމުގެ މައްސަލަ ފާސްވާނީ، ގަވައިދުގައިވާ ގޮތުން ޖުމްލަ މެމްބަރުންގެ އަޣުލަބިއްޔަތު ލިބުމުންނެވެ. އެއީ 43 މެމްބަރުންނެވެ.
ރައްޔިތުންގެ މަޖިލީހުގެ މެންބަރަކު މަޖިލީހަށް އިންތިޚާބުވި އިރު ހުންނެވި ޕާޓީ ނޫން އެހެން ޕާޓީއަކަށް ބަދަލުވުމުން، ވަކިވުމުން ނުވަތަ ޕާޓީން ވަކި ކުރުމުން މަޖިލީހުގެ މެންބަރުކަން ގެއްލޭނެ ކަމަށް ކަނޑައަޅައި ދިނުމަށް އެދި ދައުލަތުގެ ފަރާތުން ސުޕްރީމް ކޯޓަށް ހުށަހެޅުއްވި މައްސާލާގައި އަނިލްއަށް ބޮޑެތި ފާޑު ކިޔުންތައް އަމާޒުވެގެން ގޮސްފައިވެއެވެ.
