އިންގްލެންޑްގެ ފޯވާޑް ޖޭޑަން ސަންޗޯގެ އަގު ކުޑަނުކުރަން ބޮރޫޝިއާ ޑޯޓްމުންޑްގެ މެނޭޖްމަންޓުން ނިންމައިފިއެވެ.

ރިޕޯޓުތައް ބުނާ ގޮތުން ސަންޗޯގެ އަގު ކުޑަކުރަން ހުށަހަޅާފައިވަނީ މެންޗެސްޓާ ޔުނައިޓެޑުންނެވެ. ޔުނައިޓުގެ އިތުރުން ސަންޗޯ ހޯދުމުގެ ރޭހުގައި ޗެލްސީ އާއި އިނގިރޭސި ޕްރިމިއާ ލީގު ޗެމްޕިއަން ލިވަޕޫލްވެސް ހިމެނެއެވެ.

މިވަގުތު ސަންޗޯ ހޯދުމުގެ މަސައްކަތް އެންމެ ބޮޑަށް ކުރަމުން އަންނަނީ ޔުނައިޓެޑުންނެވެ. ރިޕޯޓުތައް ބުނާ ގޮތުން އެ ކްލަބުގެ ކޯޗު އޮލެ ގުނަ ސޮލްޝެއާ އަންނަ ސީޒަނަށް އެންމެ ބޮޑަށް ބޭނުންވާ ކުޅުންތެރިއަކީ ސަންޗޯއެވެ.

އުމުރުން 20 އަހަރުގެ ސަންޗޯ ހޯދުމަށް ޔުނައިޓެޑުން 100 މިލިއަން ޑޮލަރުގެ ބިޑެއް ކޮށްފައިވާ ކަމަށް ވަނީ ރިޕޯޓުކޮށްފައެވެ. އެކަމަކު އެއީ ޑޯޓްމުންޑުން ކިޔާ އަގަށްވުރެ 25 މިލިއަން ޑޮލަރު ކުޑަ އަދަދެކެވެ. އެހެންކަމުން ސަންޗޯގެ އެބިޑަށް ޑޯޓްމުންޑުން ނޫނެކޭ ބުނެފައިވާ ކަމަށްވެސް ރިޕޯޓުތައް ބުނެއެވެ.

ޑޯޓްމުންޑުގެ އޮފިޝަލަކު ބުނީ މާލީ ގޮތުން ޓީމު އަޑިއަޅާލާފައިވީ ނަމަވެސް، ސަންޗޯ ފަދަ މުހިންމު ކުޅުންތެރިއަކު ވިއްކާލާނީ ކްލަބުން ބޭނުންވާ އަގަކަށް ކަމަށެވެ.

ސަންޗޯ ވިދާލީ 2017 ވަނަ އަހަރު އިންޑިއާގައި ބޭއްވި 17 އަހަރުން ދަށުގެ ފީފާ ވޯލްޑް ކަޕްގައެވެ. އެގޮތުން އެ އަހަރު ވޯލްޑް ކަޕް ކާމިޔާބުކުރި އިންގްލެންޑް ޓީމުން އެންމެ ފާހަގަކޮށްލެވުނު ކުޅުންތެރިއަކީ ސަންޗޯއެވެ. އޭރު ސިޓީގެ ޒުވާން ޓީމަށް ކުޅެމުން އައި ސަންޗޯއަށް އެ މުބާރާތައް ފަހު ޔޫރަޕްގެ ގިނަ ކްލަބުތަކަކުން ފާރަލިއެވެ. އޭގެ ތެރޭގައި ސިޓީވެސް ހިމެނެއެވެ. އެކަމަކު ލިބުނު ބޮޑެތި ހުށަހެޅުންތަކަށް ނޫނެކޭ ބުނެ ސަންޗޯ ބަދަލުވީ ޑޯޓްމުންޑަށެވެ.