ހޯރަފުށީ ސްކޫލުން ގަސް އިންދުމުގެ ޕްރޮގްރާމެއް ކުރިއަށް ގެންގޮސްފި
މި ޕްރޮގްރާމް ކުރިއަށް ގެންގޮސްފައިވަނީ އާދިއްތަ ދުވަހު
ގަސް އިންދުމުގެ ޕްރޮގްރާމުގެ ތެރެއިން
ހއ. އަތޮޅު މަދަރުސާގެ 41 ވަނަ އަހަރީ ދުވަހާއި މިނިވަން ދުވަހާ ގުޅުވައިގެން ގަސް އިންދުމުގެ ޕްރޮގްރާމެއް ކުރިއަށް ގެންގޮސްފިއެވެ.
މި ޕްރޮގްރާމް ކުރިއަށް ގެންގޮސްފައިވަނީ އާދިއްތަ ދުވަހުގެ ހަވީރު 04:30ން ފެށިގެން 05:30ށް ކުރިއަށް ގެންގޮސްފައިވޭ ހޯރަފުށީ އެއަރޕޯޓުގައެވެ.
ރާއްޖެއެމްވީއަށް މައުލޫމާތު ދެއްވަމުން ހއ. އަތޮޅު މަދަރުސާގެ ޕްރިންސިޕަލް ހުސެއިން ނައީމް އަހްމަދު ވިދާޅުވީ ސްކޫލުގެ ގިނަ ކުދިންނާއި މުވައްޒަފުންގެ އިތުުރުން ބެލެނިވެރިން ޕްރޮގްރާމުގައި ބައިވެރިވި ކަމަށެވެ. އެގޮތުން 450 މީހުން ބައިވެރިވިއިރު 600ށްވުރެން ގިނަ ގަސް އިންދާފައިވާ ކަމަށެވެ.
ހުސެއިން ވިދާޅުވީ މި ޕްރޮގްރާމްގެ ކުރިއަށް ގެންގޮސްފައިވަނީ ރައްކާތެރިކަމުގެ ފިޔަވަޅުތައް އަޅައިގެން ކަމަށާއި އުންމީދު ކުރި ވަރަށް ވުރެން ބޮޑު ތަރުހީބެއް އެންމެންގެ ފަރާތުން ވެސް ލިބުނު ކަމަށެވެ.
އެއަރޕޯޓް ސަރަހައްދުގައި އިންދާފައިވަނީ ރުކާއި ހޭޅި ފަށުގައި ހެދޭ ކަހަަލަ ގަސްތައްކަން ފާހަގަކުރައްވާ ހުސެއިން ވިދާޅުވީ މި ގަސްތައް ބަލަހައްޓާނީ އެރަށު ކައުންސިލުން ކަމަށެވެ.
ހއ. ހޯރަފުށީ އެއަރޕޯޓުގައި އެއް ލައްކަ ގަސް އިންދުމުގެ ޕްރޮގުރާމެއް "ހޯރަފުށި އެއަރޕޯޓު ފެހި ކުރުން، އަހަރުމެން އެންމެންގެ ޒިންމާ" މި ޝިއާރުގެ ދަށުން މިއަހަރުގެ ޖެނުއަރީ މަހުގެ ތެރޭގައި ވެސް ވަނީ ފަށާފައެވެ. ނައީމް ވިދާޅުވީ ހޯރަފުށި ސްކޫލުގެ ފަރާތުން އިސް ނަގައިގެން ގަސް އިންދުމުގެ ޕްރޮގްރާމް ކުރިއަށް ގެންގޮސްފައިވަނީ ހޯރަފުށި އެއަރޕޯޓު ފެހި ކުރުން، އަހަރުމެން އެންމެންގެ ޒިންމާ މި ޕްރޮގްރާމަށް އެއްބާރުލުން ދިނުމުގެ ގޮތުން ކަމަށެވެ.
މި ޙަރަކާތަކީ ހޯރަފުށި ދާއިރާގެ މެންބަރު އަޙްމަދު ސަލީމާއި އެރަށު ކައުންސިލްގެ އިސްނެންގެވުމުގެ މަތިން ކުރިޔަށް ގެންގޮސްފައިވާ ޙަރަކާތެކެވެ. މިކަމުގައި ހޯރަފުށީގެ އިދާރީ ހުރިހައި ކުންފުންޏެއް ވެސް ބައިވެރިވިއިރު އަމާޒަކީ ޕްރޮގްރާމްގެ ދަށުން އެއްލައްކަ ގަސް އިންދާ އެއަރޕޯޓުގެ ހުރިހާ ޞަރަޙައްދެއް ފެހި ކުރުމެވެ.
ހޯރަފުށީ ސްކޫލުން ކުރިއަށްގެންދިޔަ ގަސް އިންދުމުގެ ޕްރޮގްރާމާއި ބެހޭ ގޮތުން ޓުވީޓު ކުރައްވާ މެންބަރު އަޙްމަދު ސަލީމް (ސައްލެ) ވިދާޅުވީ ކޮންމެ ގަހެއް ރަމްޒުކޮށްދެނީ ފަހި މާދަމާއަކަށް އޮތް އުންމީދު ކަމަށެވެ.
