ދުބާއީ އަށް ދަތުރު ކުރާ ފަސިންޖަރުން ދެފަހަރަށް ކޮވިޑަށް ޓެސްޓު ކުރަން ޖެހޭނެ: އެމިރޭޓްސް

އަންނަ އޮގަސްޓް މަހުގެ 1 އިން ފެށިގެން ދުބާއީ އަށް ދަތުރު ކުރާ ހުރިހާ ފަސިންޖަރުން އަތުގައި ކޮވިޑް-19ގެ ޓެސްޓުގެ ނަތީޖާ ނެގެޓިވްވި ކަމުގެ ލިޔުން އޮންނަން ޖެހޭ ކަމަށް އެމިރޭޓްސް އިން ބުނެފިއެވެ.

އެމިރޭޓްސް އެއަރލައިން އިން ނެރެފައިވާ ގައިޑްލައިންގައި 29 ގައުމަކުން ދުބާއީ އަށް ދަތުރު ކުރާ ފަރާތްތަކުން ޑަބަލް ޓެސްޓް ހެދުމަށް ވަނީ އެދިފައެވެ.

އެގޮތުން ފްލައިޓަށް އެރުމުގެ 96 ގަޑިއިރު ކުރިން އެއް ޓެސްޓް ހެދުމަށް ފަހު އޮން އެރައިވަލްގައި ދެވަނަ ޓެސްޓެއް ހެދުމަށް ވަނީ އެދިފައެވެ. އަދި ފަސިންޖަރުންނަށް ފަސޭހަ ކޮށްދިނުމުގެ ގޮތުން އެމިރޭޓްސް އިން ވަނީ އެ އެއަރލައިންގައި އެދުމުން ފަސެންޖަރުންނަށް ޑަބަލް ޓެސްޓް ހެދޭނެ އިންތިޒާމު ހަމަޖައްސައިދޭނެ ކަމަށް ބުނެފައެވެ.

ދުބާއީ އަށް ދަރުރުކުރުމުގެ ކުރިން ޑަބަލް ޓެސްޓް ހެދުމަށް ލިސްޓްކޮށްފައިވާ 29 ގައުމުގެ ތެރޭގައި ހިމެނެނީ އަފްގާނިސްތާން، އަރުމޭނިއާ، ބްރެޒިލް، ބަންގްލަދޭޝް، ޑީޖިބޮތީ، އިޖިޕްޓް، އެރިޓްރިއާ، އިންޑިއާ، އިންޑޮނޭޝިޔާ، އިރާން، އިރާގު، ކަޒަކަސްތާން، ކިރިގިސްތާން، ލެބްނާން، މޮންޓިނެގްރޯ، ނައިޖީރިއާ، ޕާކިސްތާން، ފިލިޕީންސް، ރަޝިޔަން ފެޑްރޭޝަން، ސާރބިއާ، ސީމާލިއާ، ސައުތް އެފްރިކާ، ސްރީލަންކާ، ސޫދާން، ތަޖިކިސްތާން، ތެންޒާނިއާ، ތުރުކަމަނިސްތާން، އެމެރިކާ އަދި އުޒްބަކިސްތާނެވެ.