ކޮންޓެކްޓް ޓްރޭސިންއަށް އަދިވެސް ސައްހަ މައުލޫމާތު ނުދޭކަން ފާހަގަކުރެވޭ: ޑރ. ނަޒްލާ
27 ޖުލައި 2020 | ހޯމަ 03:52ކޮންޓެކްޓް ޓްރެސިން ހެދުމުގެ ބޭނުމަކީ ކޮވިޑް-19 ފެތުރުން ކޮންޓްރޯލް ކުރުން
އެޗްއީއޯސީގެ ތަރުޖަމާނު ޑރ. ނަޒްލާ ރަފީގު
ކޮވިޑް-19 އަށް މީހަކު ޕޮޒިޓިވްވުމުން އޭނާގެ ކޮންޓެކްޓް ޓްރޭސިން ހަދަމުންދާއިރު ބައެއް ފަރާތްތަކުން އަދިވެސް ސައްހަ މައުލޫމާތު ނުދޭކަން ފާހަގަ ކުރެވޭ ކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފިއެވެ.
އަދިއްތަ ދުވަހުގެ ރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގް ވިދާޅުވީ ކޮންޓެކްޓް ޓްރޭސިން ހެދުމުގެ ބޭނުމުގެ ބޭނުމަކީ ކޮވިޑް-19 ފެތުރުން ކޮންޓްރޯލް ކުރުން ކަމަށެވެ.
އެހެންކަމުން ކޮންޓެކްޓް ޓްރޭސިން ހަދަމުންދާއިރު ރަނގަޅު މައުލޫމާތު ދިނުން ވަރަށް މުހިއްމު ކަމަށެވެ.
ނަޒްލާ ވިދާޅުވީ ސައްހަ މައުލޫމާތު ނުދިނުމުގެ ސަބަބުން އިތުރަށް ޕޮޒިޓިވްވާ މީހުންގެ ކޮންޓެކްޓް ޓްރޭސިން ހަދަމުންދާއިރު ކުރީގެ ޕޮޒިޓިވް ކޭސްއާ ކޮންމެވެސް ގޮތަކަށް ލިންކްވާ ފަރާތްތައް ހިމެނޭ ކަމަށެވެ.
ސައްހަ މައުލޫމާތު ކުރިން ދީފިނަމަ އެ ފަރާތްތައް ކޮންޓެކްޓްވި މީހުންގެ ގޮތުގައި ރަޖިސްޓަރކޮށް ކަރަންޓީންކޮށް، ސާމްޕަލް ނެގުމުގެ ކަންތައް ކުރިއަށް ދާނެ ކަމަށް ނަޒްލާ ވިދާޅުވިއެވެ. އެކަމުގެ ސަބަބުން އިތުރު މީހުންނަށް އެކްސްޕޯސް ވުމުގެ ފުރުސަތު ކުޑަވެގެންދާނެކަން ޑރ. ނަޒްލާ ފާހަގަ ކުރެއްވިއެވެ.
ސައްހަ މައުލޫމާތު ތަފްސީލުކޮށް ދިނުމަކީ ކޮވިޑް-19 ކޮންޓްރޯލްކޮށް ކޮންޓެކްޓް ޓްރޭސިން ރަނގަޅަށް ގެންދެވޭނެ ހަމައެކަނި ގޮތް ކަމަށް ޑރ. ނަޒްލާ ވިދާޅުވިއެވެ.
