ރާއްޖޭގެ މިނިވަންކަން ގެއްލިދާނެ ފަދަ ޙާލަތަކަށް ދިވެހި އަސްކަރިއްޔާ ފުރިހަމައަށް ތައްޔާރުކަމަށް ޑިފެންސް މިނިސްޓަރ މާރިޔާ އަޙުމަދު ދީދީ ވިދާޅުވެއްޖެއެވެ.
އާދިއްތަ ދުވަހުގެރޭ ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ، ދިވެހި އަސްކަރިއްޔާއަކީ މިހާރު ވަރަށް "ޕްރޮފެޝަނަލް" ބައެއް ކަމަށެވެ. އަދި ރާއްޖޭގެ މިނިވަންކަން ގެއްލިދާނެފަދަ ޙާލަތަކަށްވެސް އަސްކަރިއްޔާ ފުރިހަމައަށް ތައްޔާރުވެފައިވާކަން ފާހަގަ ކުރައްވައި މިނިސްޓަރ ވިދާޅުވީ، ރާއްޖޭގެ އެތެރޭގައި ހިނގާ ކަންކަމުގައި އަސްކަރިއްޔާއިން ފުރިހަމައަށް ކުރިމަތިލެވޭނެ ކަމުގެ ޤާބިލިއްޔަތު އެބައޮތް ކަމަށެވެ. އަދި ބޭރުން އަންނަ ޙަމަލާތަކުން ރެކިގަތުމަށްވެސް، ރާއްޖޭގެ ޑިޕްލޮމަސީ ވަރުގަދަކޮށް، ޤައުމުތަކާ ގުޅުން ބަދަހި ކުރުމަށް ކުރަމުންދާ މަސައްކަތްތަކުގެ ތެރެއިން އެފަދަ ކަންކަމުން ދިފާއު ވެވޭނެކަންވެސް މިނިސްޓަރ ފާހަގަ ކުރެއްވިއެވެ.
އޭގެ އިތުރުން، މިހާރު މިނިވަންކަން އޮތް މިންވަރަށް އަލިއަޅުވާލައްވާ މިނިސްޓަރ ވިދާޅުވީ، މި ސަރުކާރު ވެރިކަމާ ޙަވާލުވިއިރު، އެއްވެސް ސިޔާސީ މިނިވަންކަމެއް ނެތް ކަމަށާއި، ދުލާއި ޤަލަމުގެ މިނިވަންކަންވެސް އޮތީ ނިގުޅައިގެންފައި ކަމަށެވެ.
ނަމަވެސް މިއަދު މަންޒަރު ބަދަލުވެފައިވާކަން ފާހަގަ ކުރައްވައި މިނިސްޓަރ ވިދާޅުވީ، މިއަދު މުޒާހަރާކޮށް، ރައްޔިތުން ކަންބޮޑުވާ ކަންކަމާ ޙިޔާލު ފާޅު ކުރުމުގެ މިނިވަންކަން ޤާނޫނުގެ ދަށުން ލިއްބައިދީފައިވާ ކަމަށެވެ. އެހެން ނަމަވެސް، ކޮވިޑް-19 ގެ މިފަދަ ބަލިމަޑުކަމެއްގައި ވައިރަސް ފެތުރުން ކޮންޓްރޯލް ކުރުމަށްޓަކައި އަޅަންޖެހޭ ފިޔަވަޅުތަކަށް ރައްޔިތުން ސަމާލުކަން ދޭންޖެހޭނެކަމަށް މިނިސްޓަރ ވިދާޅުވިއެވެ.
އޭގެ އިތުރުން، ޕްރޮގްރާމްގައި ބިދޭސީންގެ މައްސަލައަށް އަލިއަޅުވާލައްވައި މިނިސްޓަރ ވިދާޅުވީ، ރާއްޖޭގެ ޒުވާނުންނަށްވުރެވެސް ގިނައިން ބިދޭސީން މިއަދު މި ޤައުމުގައި އުޅެމުންދާ ކަމަށާއި، އެއްވެސް އިރެއްގައި ބިދޭސީން ލައްވައި މަސައްކަތް ކުރުވައި އުޖޫރަ ނުދިނުމަކީ ތާއީދު ކުރައްވާނެ ކަމެއް ނޫން ކަމަށެވެ. އެހެން ނަމަވެސް އެއްވެސް ބަޔަކު ދިވެއްސަކު ރަހީނުކޮށް، ބައެއްގެ މުދާ ޙަލާކު ކުރުމަކީ "އޯކޭ ވެވޭނެ" ކަމެއް ނޫންކަމަށް މިނިސްޓަރ ވިދާޅުވިއެވެ.
އަދި ބިދޭސީންގެ މައްސަލަ ބޮއްސުންލައިގެން ދިޔައީ އެކަމުގައި ބައެއްގެ އިހުމާލު އޮވެގެން ކަމަށް ގިނަ ބަޔަކު ބުނަމުންދާއިރު، މިނިސްޓަރ ވިދާޅުވީ، އެ މައްސަލަތައް ބަލަން ޖެހޭނެ ކަމަށެވެ. އެގޮތުން އިމިގްރޭޝަންގެ ވެރިންގެ މައްސަލަ ބަލައި ތަހުޤީޤު ކުރަން ޖެހޭނެ ކަމަށް މިނިސްޓަރ ވިދާޅުވިއެވެ.
