ސިޔާސީ ކަންކަމުގައި ޚިޔާލު ތަފާތުވިޔަސް، ގައުމުގެ އެންމެ މަތީ މަސްލަހަތާއި ގުޅޭ ގޮތުން އެންމެން އެއްބަސް ވާންޖެހޭ: ރައީސް ސޯލިހު
26 ޖުލައި 2020 | އާދީއްތަ 08:04ސިޔާސީ ވާދަވެރިކަމުގައި ބައިބައިވުމަށް ފުރުސަތު ނުދިނުމަށް ގޮވާލެއްވި
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، މިނިވަން ދުވަހާ ގުޅިގެން ގައުމާ މުޚާތަބު ކުރައްވާ ހުރިހާ ރައްޔިތުން ވެސް ފަރުދީ ޒިންމާ ނެގުމަށް ގޮވާލެއްވި
ސިޔާސީ ކަންކަމުގައި ޚިޔާލު ތަފާތުވިޔަސް، ގައުމުގެ އެންމެ މަތީ މަސްލަހަތާއި ގުޅޭ ގޮތުން އެންމެން އެއްބަސް ވާންޖެހޭ ކަންކަން ހުންނާނެ ކަމަށާއި، އެފަދަ ކަންކަމުގައި ސިޔާސީ ވާދަވެރިކަމުގައި ބައިބައިވުމަށް ފުރުސަތު ނުދިނުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ގޮވާލައްވައިފިއެވެ.
އެމަނިކުފާނު މިކަމަށް ގޮވާލެއްވީ، ދިވެހިރާއްޖޭގެ މިނިވަންކަމަށް 55 އަހަރު ފުރޭ 56 ވަނަ މިނިވަން ދުވަހުގެ މުނާސަބަތުގައި ގައުމާއި މުޚާތަބު ކުރައްވާ ދެއްކެވި ވާހަކަފުޅުގައެވެ.
ރައީސް ސޯލިހު ވިދާޅުވީ، ދިވެހިންނަށް ސިޔާސީ މިނިވަންކަން ލިބުނީ ސުލްހަވެރިކަމާއި ހިކުމަތްތެރިކަމާއެކު ކުރި މަސައްކަތުން ކަމަށާއި، ސަރުކާރުގެ ސިޔާސަތުތައް ބައްޓަން ކުރުމުގައި ސުލްހައަށް އިސްކަންދީ، ދިވެހިންގެ މިނިވަންކަން ދެހެމެއްޓުމުގެ އަސާސްތަކުގެ މަތީގައި ހިފެހެއްޓުމުން ކަމަށެވެ.
މަލްޓި ޕާޓީ ޑިމޮކްރެޓިކް ނިޒާމެއްގެ ތެރެއިން ގައުމު އާރާސްތު ކުރުމުގެ މަސައްކަތް ކުރަމުން ދާނީ ސިޔާސީ ވާދަވެރިންގެ އަޑު އަހައިގެންކަން ފާހަގަކުރައްވައި ރައީސް ސޯލިހު ވިދާޅުވީ ސިޔާސީ ވާދަވެރިންގެ ޚިޔާލާއި މަޝްވަރާއަށް މި ސަރުކާރުން އަބަދު ވެސް މަރުހަބާ ކިޔާނެ ކަމަށެވެ. އަދި ގައުމުގެ އެންމެ މަތީ މަސްލަހަތު ހިމެނޭ ކަންކަމުގައި ސަރުކާރާއި އެކުގައި މަސައްކަތް ކުރެއްވުމަށް ހުރިހާ ސިޔާސީ ބޭފުޅުންނަށް އެމަނިކުފާނު ގޮވާލެއްވިއެވެ.
އިގްތިސާދީ ގޮތުން ދިވެހިން ހޯދާފައިވާ ކާމިޔާބީތަކުގެ މައްޗަށް އަލިއަޅުއްވައިލައްވައި ވާހަކަފުޅު ދައްކަވަމުން ރައީސް ސޯލިހު ވަނީ، ރާއްޖޭގެ އިގްތިސާދު މިހާރު ވެސް ބިނާވެފައި އޮތީ ދިވެހިން ތަރައްގީ ކުރި ދެ ސިނާއަތެއްގެ މައްޗަށް ކަމަށް ވިދާޅުވެ، މިއީ ދިވެހިންގެ އިގްތިސާދީ ހަރަކާތްތައް ސިންދަފާތު ކުރުމަށް އަމާޒު ހިފަންވީ ވަގުތުކަން ފާހަގަ ކުރައްވާފައެވެ.
އެގޮތުން އެމަނިކުފާނު ވިދާޅުވީ، މިއީ އިގްތިސާދީ ހަރަކާތްތަކުގައި ޒުވާނުންނާއި އަންހެނުންގެ ބައިވެރިވުން އިތުރު ކުރަންވީ ވަގުތު ކަމަށާއި، ގުދުރަތީ ވަސީލަތްތަކުގެ ނަފާ އިތުރު ކުރުމުގެ މަސައްކަތް ފަށަންވީ ވަގުތު ކަމަށެވެ.
މީގެ އިތުރުން ރައީސް ސޯލިހު ވިދާޅުވީ ދިވެހިންގެ ފަޚުރުވެރި ގައުމީ ޝަޚުސިއްޔަތުގެ ބިންގަލަކީ މާތްވެގެންވާ އިސްލާމް ދީން ކަމަށާއި، އެ ބިންގަލުގެ މަތީގައި ދިވެހި ގައުމިއްޔަތުގެ ބިނާ އާރާސްތު ކޮށްދިން ތަނބުތަކަކީ ދިވެހިވަންތަކަމާއި، ދިވެހިންގެ މާދަރީ ބަހާއި، ދިވެހި ތާރީޚާއި، ދިވެހިންގެ ސަގާފަތް ކަމަށެވެ. އަދި، މި ހުރިހާ ކަމެއް ލާމެހިގެން ގެތިފައިވާ ދިވެހި މުޖްތަމައުން މި ސިފަތައް ގެއްލިގެން ދިޔުމަކީ ހަމަ އެކަކުވެސް އެދޭނެ ކަމެއް ނޫން ކަމަށް އެމަނިކުފާނު ވިދާޅުވިއެވެ.
ރައީސް ސޯލިހު ވިދާޅުވީ މިނިވަންކަމުގެ މި ދަތުރުގައި 55 އަހަރު ހޭދަކުރުވުނު އިރު، ތަރައްގީގެ ސަމުގާއިން ދިވެހިން ދެން އަމާޒު ހިފަންވީ، އަދި ކޮންމެ ދިވެއްސެއްގެ ވިސްނުން ބަހައްޓަންވީ، ގައުމު ކުރިއަރުވައި ތަރައްގީ ކުރުމުގައި ފަރުދީ ޒިންމާ އަދާކުރުމަށް ކަމަށެވެ. އަދި، އެކަން ހާސިލު ކުރެވޭނީ، ތަރައްގީ އަކީ ކޮންމެ ފަރުދެއްގެ ޒާތީ ދިރިއުޅުމުގެ އެއްބައި ކަމުގައި ގަބޫލުކޮށް، އެގޮތަށް ދިރިއުޅުން ބައްޓަން ކޮށްގެން ކަމުގައި ވެސް އެމަނިކުފާނު ވިދާޅުވިއެވެ.
ރައީސް ސޯލިހުގެ ޚިތާބު ނިންމަވައިލެއްވީ، ރާއްޖޭގެ މިނިވަންކަމުގެ ބާނީ، ނިޝާން ޣާޒީގެ އިއްޒަތްތެރި ވެރިޔާ، ސުމުއްވުލް އަމީރު އަލް މަރްޙޫމް އިބްރާހީމް ނާޞިރު ރަންނަބަނޑޭރި ކިލެގެފާނުގެ ޒިކުރާ އައުކުރައްވާ، ގައުމުގެ އިގްތިސާދީ އަދި ސިޔާސީ މިނިވަންކަން ރައްކާތެރިކޮށް ދެމެހެއްޓުމަށްޓަކައި ސަރުކާރާއި ރައްޔިތުން އެކުގައި އެއް އަޒުމެއްގައި މަސައްކަތްކޮށް، ނަތީޖާ ހާސިލު ކުރުމަށް ގޮވާލައްވަމުންނެވެ.
