ފަރިތަކުރުންތަކުގައި ކުޅުންތެރިންގެ މަސައްކަތު ރޭޓް ފެނުމުން ލިބުނީ ހައިރާން ކަމެއް ކަމަށް ގައުމީ ފުޓްބޯޅަ ޓީމުގެ ކޯޗު ނެދަލެންޑްސްގެ މާޓީން ކޫޕްމަން ބުނެފިއެވެ.

ކޮވިޑް-19 ގެ ބްރޭކަށްފަހު މި މަހުގެ ކުރީކޮޅު ގައުމީ ޓީމުން ވަނީ ފަރިތަކުރުންތައް ފަށާފައެވެ. ގައުމީ ފުޓްބޯޅަ ޓީމުގެ 32 ކުޅުންތެރިންގެ ސްކޮޑެއް އެކުލަވާލައިގެން ފަރިތަކުރުންތައް ފެށި ނަމަވެސް، އަދިވެސް އެކި ސަބަބުތަކާ ހުރެ ބައެއް ކުޅުންތެރިންނަށް ފަރިތަކުރުންތަކުގައި ބައިވެރިނުވެވެއެވެ.

ގައުމީ ފުޓްބޯޅަ ޓީމުގެ ކޯޗު ނެދަލެންޑްސްގެ މާޓީން ކޫޕްމަން ބުނީ ވަރަށް ރަނގަޅު ރޫހެއްގައި ކުޅުންތެރިން ފަރިތަކުރަމުންދާ ކަމަށާއި، ކުޅުންތެރިންގެ މަސައްކަތު ރޭޓް ފެނިފައި އޭނާއަށް ލިބުނީ ހައިރާން ކަމެއް ކަމަށެވެ. އަދި މީގެ ކުރިން ކުޅުންތެރިންގެ ފިޓްނަސް ރަނގަޅު ނުވެދާނެ ކަމަށް ހީވެފައި އޮތް ނަމަވެސް، އެ ހީވުން މުޅިން ކަހަލަ ގޮތަކަށް ބަދަލުކޮށްލާފައިވާ ކަމަށާއި، އެކަމަކު އަދިވެސް ވަރަށް ގިނަ މަސައްކަތް ކުރަން އެބަހުރި ކަމަށް ކޫޕްމަން ބުންޏެވެ.

އޭނާ އިތުރަށް ބުނީ ފަރިތަކުރުންތައް ކުރަނީ ދުވަހަކަށް ވުރެން ދުވަހެއް ރަނގަޅުވާން ކަމަށާއި، އޭނާގެ ރޭވުންތެރިކަމާ އެއްގޮތަށް ކުޅުންތެރިން ކުރިއަށްދާ ކަމަށެވެ. އަދި އެ ވިސްނުންތަކާއެކު ކުޅުންތެރިން މަސައްކަތް ކުރާކަން ފެންނަ ކަމަށާއި، ކުރިއަށް އޮތް ދުވަސްތަކުގައި ކުޅުންތެރިން ވަރަށް ރަނގަޅަށް މަސައްކަތްކުރާނެ ކަމުގެ އުއްމީދު އެބައޮތް ކަމަށްވެސް ކޫޕްމަން ބުންޏެވެ.

ފީފާ ވޯލްޑް ކަޕް އަދި އޭއެފްސީ އޭޝިއަން ކަޕްގެ ޖޮއިންޓް ކޮލިފިކޭޝަން މެޗުތަކަށް ތައްޔާރުވުމަށް 32 ކުޅުންތެރިންގެ ސްކޮޑަކާއެކު ގައުމީ ފުޓްބޯޅަ ޓީމުން ފަރިތަކުރަމުން އަންނައިރު، ކޮވިޑް-19 ގެ ސަބަބުން ފަސްކުރި ކޮލިފައިންގ މެޗުތައް އޮކްޓޯބަރު މަހާއި ނޮވެމްބަރު މަހަށް މިހާރު ވަނީ ތާވަލު ކޮށްފައެވެ.

އެގޮތުން ރާއްޖެ އާއި ޗައިނާގެ މެޗު އޮކްޓޯބަރު މަހުގެ އަށްވަނަ ދުވަހަށް ވަނީ ތާވަލު ކޮށްފައެވެ. އަދި ރާއްޖެ އާއި ސީރިއާ ކުޅޭ މެޗު އޮކްޓޯބަރު މަހުގެ 13 ވަނަ ދުވަހަށް މާލޭގައި ކުޅުމަށް ތާވަލު ކޮށްފައިވާއިރު، ރަށުން ބޭރުގައި ފިލިޕީންސް އާ ދެކޮޅަށް ރާއްޖެ ކުޅޭ މެޗު ވަނީ ނޮވެމްބަރު މަހުގެ 17 ވަނަ ދުވަހަށް ތާވަލުކޮށްފައެވެ.

އޭޝިއާ ސަރަހައްދުން ހަތަރު ގައުމެއް 2022 ވަނަ އަހަރުގެ ފީފާ ވޯލްޑް ކަޕަށް ކޮލިފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ޗައިނާ ހަތަރު މެޗުން ހަތް ޕޮއިންޓާއެކު ދެވަނައިގައި އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓު ހޯދާފައިވާ ފިލިޕީންސެވެ. ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެ ޕޮއިންޓެއް ލިބިފައިނުވާ ގުއާމެވެ.