މާލޭގެ ލޮނުޒިޔާރާތްކޮޅުގައި ތަރައްގީކުރާ ޕާކު އަންނަ ހަފުތާގައި ހުޅުވޭނެ ކަމަށް ލަފާކުރެވޭ ކަމަށް މާލެ ސިޓީ ކައުންސިލުން ބުނެފި އެވެ.

"ރާއްޖެއެމްވީ"އަށް މައުލޫމާތު ދެއްވަމުން މާލެ ސިޓީ ކައުންސިލްގެ ޑެޕިއުޓީ މޭޔަރ ޝަމާއު ޝަރީފް ވިދާޅުވީ، "ލޮނުޒިޔާރާތް ބަގީޗާ" ހުޅުވުމަށްޓަކައި ކުރަންޖެހޭ މައިގަނޑު މަސައްކަތްތައް ގާތްގަނޑަކަށް ނިމިފައިވާ ކަމަށާއި ނަމަވެސް، ކުދިކުދި ބައެއް މަސައްކަތްތައް ކުރެވެމުންދާ ކަމަށެވެ. ޝަމާއު ވިދާޅުވީ، މިހާރު ކުރެވެމުންދަނީ، ތަކެތި އެތުރުން ފަދަ ކުދިކުދި މަސައްކަތްތައް ކަމަށްވިޔަސް، މި ޖުލައި މަސް ނިމުމުގެ ކުރިން ހުޅުވޭވަރުވާނެ ކަމަށް އުއްމީދު ކުރައްވާ ކަމަށެވެ.

"ލޮނުޒިޔާރަތް ބަގީޗާ"އަކީ ގިނަ އަދަދެއްގެ މާމެލާމެލީގެ ގަސްތައް ހިމެނޭގޮތަށް ތަރައްގީ ކޮށްފައިވާ ރާއްޖޭގައި މިވަގުތު ހުރި އެންމެ ބޮޑު ބަގީޗާއަށް ވާނެ ކަމަށް ޝަމާއު ވިދާޅުވި އެވެ. އަދި އެ ބަގީޗާގެ ހިތްގައިމުކަން އިހުސާސް ކުރެވޭނީ، އެތަން ޒިޔާރަތް ކޮށްލުމުން ކަމަށާއި، އެ ބަގީޗާގައި ތިބޭއިރު، ބޭރުން ދުއްވާ ވެހިކަލްތަކުގެ އަޑުތައް ކޮންޓްރޯލް ކުރުމަށް ސައުންޑް ޕްރޫފް ކުރުމުގެ ގޮތުންވެސް ބައެއް ކަންކަން ކޮށްފައިވާނެ ކަމަށް ޝަމާއު ވިދާޅުވި އެވެ. އެގޮތުން، ބޭރުން އަންނަ އަޑުތައް ކޮންޓްރޯލް ކުރުމަށް އެތަނުގައި ގިނަ އަދަދެއްގެ ގަސް ބޭނުންކޮށް، ބަގީޗާއަކުން ލިބޭ ހިތްގައިކަން އެ ބަގީޗާއިން ލިބެމުންދާ ކަމަށްވެސް ޝަމާއު ވިދާޅުވި އެވެ.

ޝަމާއު ވިދާޅުވި، ބަގީޗާ ހުރި ގަސްތަކުން ލިބޭ ހިތްހަމަ ޖެހުމުގެ އިތުރުން، ސާފު ވަޔާއި، ރާޅުގެ އަޑާއި، އަދި އެސަރަހައްދުގެ މަންޒަރުތަކުން ލިބޭ ހިތްހަމަ ޖެހުމާއެކީ، މާލެ ސަރަހައްދުން ލިބޭނެ އެންމެބޮޑު ހިތްހަމަ ޖެހުމަށްވާނެ ކަމަށެވެ.

ހިޔާ ލިބިދޭ ބޮޑެތި ގަހާއި ރުކާއި މާމެލާމެލި ހައްދައި މަސްފެންގަނޑެއް ވެސް ހިމެނޭ ގޮތަށް ތަރައްގީކޮށްފައިވާ ޕާކާއެކު ބްރިޖު ސަރަހައްދަށް ވަނީ އިތުރު ފުރިހަމަކަމެއް ލިބިފަ އެވެ.

ޝަމާއު ވިދާޅުވީ ބަގީޗާ ބެލެހެއްޓުމުގެ މަސައްކަތަށް މިހާރު ދިވެހި މުވައްޒަފުން ހޯދައި އެކަމަށް އަހުލުވެރިކޮށްފައިވާ ކަމަށެވެ. އަދި ތަނުގެ ސެކިއުރިޓީން 24 ގަޑިއިރު ތިބޭނެ ކަމަށާއި، އެކި ފަރާތުން އެބަގީޗާއަށް ވަދެވޭގޮތަށް ގޭޓްތައް ހުންނާނެ ކަމަށެވެ. އަދި ސެކިއުރިޓީ ޕޯސްޓްތައްވެސް ގާއިމު ކޮށްފައި ވާނެކަމަށް ޝަމާއު ވިދާޅުވި އެވެ.

ޝަމާއު ވިދާޅުވީ، ޕާކް ހުޅުވާލާއިރު، ކޮވިޑް-19އަށް ރައްކާތެރިވުމުގެ ގޮތުން، ހެލްތް ޕްރޮޓެކްޝަން އެޖެންސީގެ ގައިޑްލައިނާ އެއްގޮތަށް އަމަލު ކުރުމުގެ ގޮތުން އުސޫލްތަކެއް ވެސް ކަނޑައެޅިފައިވާ ކަމަށެވެ.

ލޮނު ޒިޔާރަތްކޮޅުގައި ޕާކެއް ގާއިމުކުރުމުގެ މަސައްކަތް ފެށީ، މާލެ-ހުޅުމާލެ ބްރިޖްގެ މަސައްކަތް ނިމި، ހުޅުވި ފަހުންނެވެ. ބްރިޖްގެ މަސައްކަތް ކުރިއަށް ދިޔައިރު، އެތަނަކީ، ކޮންޓްސްޓްރަކްޝަން ސައިޓެކެވެ. އެތަން ޕާކެއްގެ ގޮތަށް ތަރައްގީ ކުރުމުގެ މަސައްކަތް ފެށީ މިދިއަ އަހަރުން ފެށިގެން ނެވެ.