ގައުމީ ބޮޑީބޯޑިންގ ޓީމަކީ ޒުވާން ޓީމެއް ކަމަށާއި، މި ޓީމާއެކު ބޮޑީބޯޑިންގެ ކުރިމަގު ވަރަށް އުޖާލާ ކަމަށް ރާއްޖޭގައި އުފެދުނު އެންމެ މޮޅު ބޮޑީބޯޑަރު އަލީ ޚުޝްރުވާން އަޙްމަދު (ކުޑަ އައްޔަ) ބުނެފިއެވެ.
ރާއްޖެ.އެމްވީއަށް ދިން ހާއްސަ އިންޓަވިއުއެއްގައި ކުޑަ އައްޔަ ބުނީ ބޮޑީބޯޑިންގ ގައުމީ ޓީމަކީ ވަރަށް ޒުވާން ޓީމެއް ކަމަށާއި، އެކަމަކު މި ޓީމާއެކު ބޮޑީބޯޑިންގެ ކުރިމަގު ފެންނަނީ ވަރަށް އުޖާލާކޮށް ކަމަށެވެ.
ކުޑަ އައްޔަ ބުނީ ފުރަތަމަ ފަހަރަށް ރާއްޖޭގައި ގައުމީ ބޮޑީބޯޑިންގ ޓީމެއް އެކުލަވާލުން އެއީ ބޮޑީބޯޑިންނަށް ލިބިގެންދިޔަ ވަރަށް ބޮޑު ކުރިއެރުމެއް ކަމަށާއި، މިއީ ވަރަށް ކުރިންސުރެ ދެކެން ބޭނުންވި ދުވަހެއް ކަމަށަވެ. އަދި ބޮޑީބޯޑިންގެ ގައުމީ ޓީމެއް އެކުލަވާލުމުން އެކަން ސަރުކާރުންވެސް ބަލައިގަންނަ ކަމަށާއި، އެހެންކަމުން ގައުމީ ޓީމުގެ ކުޅުންތެރިންނަށް ބަރާބަރަށް އެލަވަންސްވެސް ލިބިގެންދާނެ ކަމަށް ކުޑަ އައްޔަ ބުންޏެވެ.
ގައުމީ ބޮޑީބޯޑިންގ ޓީމެއް އެކުލަވާލުމާއެކު ކުރިއަރަމުން އަންނަ ޒުވާން ބޮޑީބޯޑަރުންނަށް އެކަމުގެ ހިތްހަމަޖެހުން ލިބިގެންދާނެ ކަމަށާއި، މިކަމުން ދޭހަވަނީ ބޮޑީބޯޑިންނަކީ މުސްތަގުބަލް އޮތް ކުޅިވަރެއް ކަމުގައި ކަމަށްވެސް ކުޑަ އައްޔަ ބުންޏެވެ.
ކުޑަ އައްޔަ އިތުރަށް ބުނީ މިހާރު އެކުލަވައިލާފައިވާ ގައުމީ ޓީމުގެ ކޮންމެ ބޮޑީބޯޑަރަކީވެސް މޮޅެތި ބޮޑީބޯޑަރުން ކަމަށާއި، މި ޓީމަކީ ހުނަރަށް ބަލާނަމަ ބައިނަލްއަގުވާމީ މުބާރާތްތަކުން ކާމިޔާބީތައް ހޯދޭނެ ޓީމެއް ކަމަށެވެ. އަދި މި ޓީމުގައި ތިބީ ތަޖުރިބާކާރު ބޮޑީބޯޑަރުންގެ އިތުރުން ޒުވާން ބޮޑީބޯޑަރުން ކަމަށްވެސް ބުންޏެވެ.
މޯލްޑިވްސް ބޮޑީބޯޑިންގ އެސޯސިއޭޝަން (އެމްބީބީއޭ) ން ގައުމީ ބޮޑީބޯޑިންގ ޓީމު އެކުލަވާލައިފައިވަނީ މިދިޔަ އަހަރު އެ އެސޯސިއޭޝަނުން ބޭއްވި މުބާރާތްތަކުން އެންމެ ރަނގަޅު ނަތީޖާތައް ނެރުނު ބޮޑީބޯޑަރުންގެ ރޭންކިންނަށް ބަލައިގެންނެވެ. ފުރަތަމަ ފަހަރށް އެކުލަވާލި ގައުމީ ބޮޑީބޯޑިންގ ޓީމުގައި ހިމެނެނީ ހަތަރު ބޮޑީބޯޑަރުންނެވެ. އެއީ ކުޑަ އައްޔަގެ އިތުރުން، އަސްވާން މުޙައްމަދު (ދޫނި) އާއި، އަޙްމަދު ނަޒްމީން (ލޯބި) އަދި އަލީ އާނިމް (ކިރިކާ) އެވެ.
ބޮޑީބޯޑިންގ ޓީމުގައި ހިމެނޭ ކުޑައައްޔަ އަކީ ރާއްޖޭގެ އެއްވަނަ ބޮޑީބޯޑަރެވެ. ކުޑައައްޔަ ވަނީ ރާއްޖޭގެ އިތުރުން ރާއްޖޭއިން ބޭރުގައި ބޭއްވުނު ގިނަ މުބާރާތްތަކުގައި ރާއްޖެ ތަމްސީލުކޮށް ރަންވަނަ ހޯދާފައެވެ.
ރާއްޖޭގެ ބޮޑީބޯޑަރުން ގިނަ ވަނަތަކެއް ހޯދަމުން އަންނައިރު، ބައިނަލްއަގުވާމީ މުބާރާތެއްގައި އެންމެ ފަހުން ރާއްޖޭގެ ބޯޑިބޯޑަރުން ވާދަކޮށްފައިވަނީ މިދިޔަ އަހަރުއެވެ. އެގޮތުން މިދިޔަ އަހަރު މެލޭޝިއާގެ ޓިއޮމަން ސާފް ފެސްޓިވަލްގައި ވާދަކޮށް ރާއްޖޭގެ ކުޑައައްޔަ ބޮޑީބޯޑިންގ ކެޓަގަރީން ރަން މެޑަލް ހޯދިއިރު، މި މުބާރާތުގައި ރާއްޖޭގެ އަލީ ޖާވީދު (ޖާއްޓެ) ވަނީ ރިހި މެޑަލް ހޯދާފައެވެ.
