ބައިބަލާ އެސޯސިއޭޝަނުން އިންތިޒާމުކޮށްގެން ބާއްވާ 1438 ވަނަ އަހަރުގެ "މޯލްޑިވިއަން ގޭސް ބައިބަލާ" މުބާރާތް 39 ޓީމާއެކު ފަށައިފި އެވެ.

މި މުބާރާތް އަންގާރަ ދުވަހުގެ ރޭ ފަށާފައިވާއިރު، ފުރަތަމަ ރޭ ހަތް މެޗު ވަނީ ކުޅެފައެވެ. އެގޮތުން މުބާރާތް ހުޅުވި މެޗު، ވީ އާ ދަ ވަންސްއާ ވާދަކޮށް ޓީން އޭޖް ޖޫނިއާސް އިން ވަނީ ކާމިޔާބުކޮށްފައެވެ. މި މެޗު އެޓީމުން ކާމިޔާބުކުރީ ގަދަ ހިފުމަކަށް ގޮހެވެ.

ދެވަނަ މެޗުގައި ބޮސްނިއާ ސިޓީއާ ވާދަކޮށް ސީދާ ދެ ގޭމުން ހުޅުމާލޭ ސްޕޯޓްސް ކްލަބުން ކާމިޔާބުކުރިއިރު، ތިންވަނަ މެޗު ބުރު ޕާކިއަންސްއާ ވާދަކޮށް ކާމިޔާބުކުރީ ޕީކޭ ކަޔޯޓީސް އެވެ. ހަތަރުވަނަ މެޗުގައި އެމްސީ ސްޕޯޓްސްގެ މައްޗަށް ދަނޑު ގޯޅި ކުރިހޯދިއިރު، ފަސް ވަނަ މެޗު އެޗްއެސް ނިއު ޖެނެރޭޝަންއާ ވާދަކޮށް މީޓް ދަ އީގަލްސް އިން ވަނީ ކާމިޔާބުކޮށްފައެވެ. ހަވަނަ މެޗު ބޫގާ ބާގާ އީގަލްސްއާ ވާދަކޮށް އާރުއެލްސީ މެޗު ކާމިޔާބުކުރިއިރު، ޓީސީ ނެވަޑައިސްގެ މައްޗަށް ވީކޭ ސްޕޯޓްސް ކްލަބް ވަނީ ކުރިހޯދާފައެވެ.

މުބާރާތުގައި ބުދަ ދުވަހުގެ ރޭ އަށް މެޗު ކުޅުމަށް ވަނީ ހަމަޖެހިފައެވެ. އެގޮތުން ފުރަތަމަ މެޗުގައި އީގަލްސް އިން ތްރީޑީއާ ދެކޮޅަށް ހައްހާ ވައިކަންމަތި ނިކުންނައިރު، ދެވަނަ މެޗުގައި އޫމްޕާ ލޫމްޕާ ނިކުންނާނީ ޓީސީ ފްރެޓާނިޓީއާ ދެކޮޅަށެވެ. ތިންވަނަ މެޗުގައި މީޓް ދަ އީގަލްސް އާއި ކްލަބް ޓީން އޭޖް ބައްދަލުކުރާއިރު، ހަތަރުވަނަ މެޗުގައި ބައްދަލުކުރާނީ ލޮރެންޒޯ ސްޕޯޓްސް ކްލަބް އަދި އާރްއެލްސީ އެވެ. ފަސްވަނަ މެޗުގައި ކްލަބް ޒެފްރޯލްއާ ދެކޮޅަށް ޓީންއޭޖް ޖޫނިއާސް ނިކުންނަނއިރު، ހަވަނަ މެޗުގައި އޮއެހާ ޖޫނިއާސް ނިކުންނާނީ ހުޅުމާލޭ ސްޕޯޓްސް ކްލަބާ ދެކޮޅަށެވެ. ހަތްވަނަ މެޗުގައި ވޯންޓެޑް ވެއާވުލްވްސްއާ ދެކޮޅަށް މަސްއޮޑި ވޯވޯ ނިކުންނައިރު، ފަހު މެޗުގައި ޕަންކް ނެކްސްޓް ލެވެލް ނިކުންނާނީ ޒެފްރޯލް ގޯޅިއާ ދެކޮޅަށެވެ.

މިރޭ ކުޅެ މެޗުތައް ފެށުމަށް ހަމަޖެހިފައިވަނީ 20:30 ގަ އެވެ.