މައުލޫމާތު ގެއްލުވާލާފައިވާކަމުގެ ތުހުމަތުތަކާއެކު އެސެޓް ރިކަވަރީ ކޮމިޝަނުގެ ފާޑުކިއުން ސީއެސްސީއަށް!

އެސެޓް ރިކަވަރީ ކޮމިޝަނުން ބަލަމުންދާ މައްސަލަތަކުގައި މައުލޫމާތު ސީދާ ގެއްލުވާލާފައިވާ ކަމަށް ޝައްކު ކުރެވޭ ޙާލަތްތަކެއްވެސް ފާހަގަވެފައިވާކަމަށް ބުނެ، އެސެޓް ރިކަވަރީ ކޮމިޝަނުން ސިވިލް ސަރވިސް ކޮމިޝަނަށް ފާޑުކިޔައިފިއެވެ.

ބުރާސްފަތި ދުވަހު އޮތް ނޫސްވެރިންގެ ބައްދަލުވުމުގައި، ލިއެކިއުންތަކާއި މައުލޫމާތު ނިޒާމުން ގެއްލުވާލާފައިވުމާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެސެޓް ރިކަވަރީ ކޮމިޝަންގެ ރައީސް އަހުމަދު އައްސަދު ވިދާޅުވީ، އެފަދަ މައްސަލަތަކެއް ކޮމިޝަނަށް ފާހަގަވެފައިވާ ކަމަށެވެ. އެގޮތުން އެމްއެމްޕީއާރްސީގެ ތަހުޤީޤުވެސް ކުރިއަށްދާ މި ދަނޑިވަޅުގައި، މިނިސްޓްރީ އޮފް ޓޫރިޒަމްއަށް އަލިއަޅުވާލައްވާ އައްސަދު ވިދާޅުވީ، މިނިސްޓްރީގައި ހުންނަ ލިއެކިއުންތައް ބެލެހެއްޓުމަކީ ހަމައެކަނި މިނިސްޓަރުގެ ޒިންމާއެއް ނޫން ކަމަށެވެ. އަދި އެކަމަށްޓަކައި ސިވިލް ސަރވިސް ކޮމިޝަން، އޭގެ ގޮތުގައި އޮޕަރޭޓްކުރަން ޖެހޭކަން އޭނާ ފާހަގަ ކުރެއްވިއެވެ.

މިނިސްޓަރަކަށް ސިޓީއެއް ފޮނުވުމަށްފަހު، އެ ފައިލްތައް ނައްތާލެވިގެން ނުވާނެކަމަށް އޭނާ ވިދާޅުވިއެވެ.

އޭގެ އިތުރުން، އޭސީސީގެ ތަހުޤީޤުގައިވެސް އެފަދަ މައްސަލަތަކެއް ފާހަގަވެފައިވާ ކަމަށް އައްސަދު ވިދާޅުވިއެވެ. އެގޮތުން ސަރުކާރުގެ އިދާރާތަކުން ބައެއް ލިއެކިއުންތައް ނުފެނިގެން އުޅެން ޖެހުނުކަން އޭނާ ފާހަގަ ކުރެއްވިއެވެ.

ސިވިލް ސަރވިސް ކޮމިޝަނަށް މީގެ ކުރިންވެސް ބޮޑެތި ފާޑުކިއުންތައް އަމާޒުވެފައިވެއެވެ. އެގޮތުން އެކޮމިޝަން ފެއިލްވެފައިވާ ކަމަށް ވިދާޅުވެ، އެކޮމިޝަނުގެ މެންބަރުން ވަކިކުރުމަށް މަޖިލީހުގެ މެމްބަރުންވެސް ގޮވާލާފައިވެއެވެ.

ސީއެސްސީއަށް ބޮޑެތި ފާޑުކިއުންތަކެއް އަމާޒުވެފައިވާއިރު، ސީއެއްސީގެ އޭރުގެ ރައީސް ޝަމީމަކީ، ނިމިދިޔަ ރިޔާސީ އިންތިޚާބުގެ ކެމްޕެއިންގައި ކުރީގެ ރައީސް ޢަބްދުﷲ ޔާމީނުގެ ކެމްޕެއިންގައި ޙަރަކާތްތެރިވި ކަމުގެ ތުހުމަތު ކުރެވޭ ބޭފުޅެކެވެ. އެގޮތުން އެސެޓް ރިކަވަރީ ކޮމިޝަނުންވެސް އެމްއެމްޕީއާރްސީއާ ގުޅުންހުރި މައްސަލަތައް ބަލަމުންދާއިރު، ކުރީގެ ރައީސް އަބްދުﷲ ޔާމީނުގެ މައްޗަށް މަނީ ލޯންޑަރިންގެ ދައުވާ ސާބިތުވެ، އެމަނިކުފާނު ދަނީ ޖަލު ޙުކުމެއްވެސް ތަންފީޒު ކުރައްވަމުންނެވެ.