ވަންދޫ ބަނދަރު ހެދުމުގެ މަސައްކަތް ކުރިޔަށް
މަޝްރޫއު ހަވާލުކޮށްފައިވަނީ މިދިޔަ އަހަރު
ރ. ވަންދޫގެ ބަނދަރުގެ މަސައްކަތް ކުރިޔަށް ދަނީ
ރ. ވަންދޫގެ ބަނދަރު މަރާމާތުކޮށް ބަނދަރު ފުންކުރުމުގެ މަސައްކަތުގެ 12 އިންސައްތަ ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ބުނެފިއެވެ.
ވަންދޫގެ ބަނދަރު ހެދުމުގެ މަޝްރޫއު އަކީ މިދިޔަ އަހަރު އޮގަސްޓު މަހުގެ 26 ވަނަ ދުވަހު އެމްޓީސީސީއާ ހަވާލުކޮށްފައިވާ މަސައްކަތެކެވެ.
އެމްޓީސީސީން ބުނީ، މަޝްރޫއުގެ ތެރެއިން ހާބަރ ބޭސިން ފުންކުރުމުގެ މަސައްކަތްވަނީ ނިންމާފައިވާ ކަމަށާއި، މިހާރު ކުރިޔަށްދަނީ އެއްގަމު ތޮށި ރޫޅާލުމުގެ މަސައްކަތް ކަމަށެވެ. އަދި އާ އެއްގަމު ތޮށިލުމަށް ބޭނުންވާ ކޮންކްރީޓް ޔުނިޓުތައް ޕްރޮޖެކްޓް ސައިޓަށް ގެންދެވިފައި ކަމަށްވެސް އެމްޓީސީސން ބުންޏެވެ.
މި މަޝްރޫޢުގެ ދަށުން 1،870 ކިއުބިކް މީޓަރުގެ ހާބަރ ބޭސިން ފުންކުރުމާއި، 75 މީޓަރުގެ ސަރަހައްދެއްގައި އެއްގަމު ތޮށި ލުމުގެ މަސައްކަތް ހިމެނެއެވެ. މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން ހަވާލުކޮށްގެން ކުރިއަށްގެންދާ ވަންދޫ ބަނދަރު ހެދުމުގެ މަޝްރޫއަކީ 5.99 މިލިއަން ރުފިޔާއަށް ހަވާލުކޮށްފައިވާ މަޝްރޫއެކެވެ.
