އެޗްއާރުސީއެމް މެމްބަރުކަމުން ޒާހިދު ވަކިކުރަން މަޖިލީހުން ފާސްކޮށްފި
22 ޖުލައި 2020 | ބުދަ 11:40އެޗްއާރުސީއެމްގެ މެމްބަރުކަމުން ވަކިކުރުމުގެ މަސައްކަތް ކުރަމުންދަނިކޮށް، އެކޮމިޝަނުގެ ރައީސް އީނާސް އަދި މެމްބަރު އަފްރީން ވަނީ އިސްތިއުފާ ދެއްވާފައި
އެޗްއާރުސީއެމްގެ ކުރީގެ މެމްބަރު ޒާހިދު (ކ-2) އަދި ކޮމިޝަނުގެ ކުރީގެ ރައީސް އީނާސް (ކ-3): މަގާމުން ވަކިކުރުގެ މަސައްކަތް ކުރުމާއެކު އެޗްއާރުސީއެމްގެ ގިނަ މެމްބަރުން ވަނީ އިސްތިއުފާ ދެއްވާފައި
ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ ނާއިބު ރައީސް މުހައްމަދު ޒާހިދު، އެކޮމިޝަނުގެ މެމްބަރުކަމުގެ މަގާމުން ވަކިކުރަން ރައްޔިތުންގެ މަޖިލީހުން ފާސްކޮށްފިއެވެ.
އެޗްއާރުސީއެމް މެމްބަރުން މަގާމުން ވަކިކުރުމުގެ މަސައްކަތް މަޖިލީހުން ކުރަން ފެށުމާއެކު، އެކޮމިޝަނުންގެ ކޮމިޝަނުގެ ގިނަ މެމްބަރުން ވަނީ އިސްތިއުފާ ދެއްވާފައެވެ. އެގޮތުން މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމެޓީން ރިޕޯޓް ފާސްކުރުމަށްފަހު، މަޖިލީހުގެ ތަޅުމަށް ހުށަހެޅި ވޯޓާ ހަމައަށް އައިއިރު، އެކޮމިޝަނުގެ މެމްބަރުންގެ ގޮތުގައި ތިއްބެވީ، ކޮމިޝަނުގެ ނައިބު ރައީސް ޒާހިދުގެ އިތުރުން، ކޮމިޝަންގެ މެމްބަރު ނައިވީން އަބްދުﷲ އެވެ.
ޒާހިދު މަގާމުން ވަކިކުރަން ބުދަ ދުވަހުގެ މަޖިލީހުގެ ޖަލްސާއިން ފާސްކުރީ، ވޯޓުގައި ބައިވެރިވެވަޑައިގެންނެވި 61 މެމްބަރުންގެ އަޣްލަބިއްޔަތުން ނެވެ. ދެ މެމްބަރަކު ޒާހިދު، މަގާމުން ވަކިކުރަން ނުފެންނަ ކަމަށް ވޯޓު ދެއްވި އެވެ.
ކޮމިޝަނުގެ މެމްބަރު ނައިވީން އަބްދުﷲ ހުންނެވީ މެޓަރނިޓީ ލީވްގައި ކަމަށްވާތީ، އޭނާއަށް ޖަވާބުދާރީވުމުގެ ފުރުސަތު ދިނުމުގެ ގޮތުން ކޮމެޓީން ވަނީ އޭނާ މަގާމުން ވަކިކުރުމުގެ މަސައްކަތް މަޑު ޖައްސާލާފަ އެވެ. ނަމަވެސް ނައިވީންގެ މެމްބަރު ކަމުގެ 5 އަހަރުގެ ދައުރު، އަންނަ ސެޕްޓެމްބަރު މަހުގެ 13 ވަނަ ދުވަހަށް ހަމަވާނެ އެވެ.
އެޗްއާރުސީއެމް ދެން ތިއްބެވި، އެކޮމިޝަނުގެ ރައީސް އައިމިނަތު އީނާސް އާއި ކޮމިޝަނުގެ މެމްބަރު އައިޝަތު އަފްރީން ވަނީ މަޖިލީހުން އެ މެމްބަރުން ވަކިކުރުމުގެ މަސައްކަތް ކުރަމުންދަނިކޮށް، މަގާމުން އިސްތިއުފާ ދެއްވާފައެވެ. އަދި ކޮމެޓީ ރިޕޯޓް މަޖިލީހުގެ ތަލުމަށް ހުށަހެޅިއިރު، އެކޮމިޝަނުގެ މެމްބަރު ކަމުގެ މަގާމުގައި ހުންނެނެވި، މޫސާ ޢަލީ ކަލޭފާން ވަނީ މަޖިލީހުގައި ވޯޓަށް އެހުމުގެ ކުރިން އިސްތިއުފާ ދެއްވާފަ އެވެ.
މަޖިލިސް ގަވާއިދުގެ ދަށުން އެއްވެސް ބޭފުޅަކު މަޤާމަކުން ވަކި ކުރުމަށް ކޮމެޓީއަކަށް ފެނިއްޖެ ހާލަތުގައި މަޖިލީހުގެ ރައީސްގެ ސަމާލުކަމަށް ގެންނަން ޖެހެއެވެ. އިސްލާޙު ކުރެވުނު ގަވާއިދުގައި މުސްތަޤިއްލު މުއައްސަސާތަކުގެ މެމްބަރުންނާއި މުސްތަޤިއްލު މަޤާމުތަކުގެ މީހުން ވަކި ކުރުމާއިބެހޭ މާއްދާގައި ވާގޮތުން މީހަކު ވަކި ކުރުމަށްޓަކައި މަޖިލީހަށް ހުށަހެޅުމުން، އެ މީހެއްގެ ނަން މަޖިލީހުގައި އިއްވާ، ކަމާބެހޭ ކޮމެޓީއަށް ފޮނުވަންޖެހެއެވެ. އަދި އެމީހުން ވަކި ކުރެވޭނީ އެ މައްސަލަ އެ ކޮމެޓީއަކުން ދިރާސާ ކުރުމަށްފަހު ނިންމާ ނިންމުމަށް އެކުލަވާލެވޭ ރިޕޯޓެއްގެ މައްޗަށް ބަހުޘްކޮށް، ނެގޭ ވޯޓަކަށް ފަހުއެވެ.
މި މެމްބަރުން މަގާމުން ވަކި ކުރުމަށް ކޮމިޓީން ނިންމާފައިވާ ސަބަބުތަކެއްގެ ތެރޭގައި ކޮމިޓީއަށް ދޮގު މަޢުލޫމާތު ދިނުމާއި މަޤާމު އަދާކުރުމުގެ ޤާބިލުކަން ނެތުން ހިމެނެއެވެ. އެގޮތުން ދައުލަތުގެ ބެލުމުގެ ދަށުގައިތިބި ކުޑަކުދިންތަކަކަށް މުވައްޒަފުންތަކެއް އަނިޔާކޮށްގެން ހުށަހަޅާފައިވާ މައްސަލަތައް ނުބަލަން ނިންމާފައިވުމުގެ އިތުރުން، އަނިޔާވެރިކޮށް މަރާލާފައިވާ ނޫސްވެރިޔާ އަހުމަދު ރިލްވާނުގެ މައްސަލައިގެ ތަޙްޤީޤް ލަސްވެގެން ޢާއިލާއިން ހުށަހަޅާފައިވާ މައްސަލައިގައި އިހުމާލުވެފައިވުމާއި، މައްސަލަ ބެލުން ލަސްވުމާ ދެކޮޅަށް ޢާއިލާއިން ބޭއްވި ހިނގާލުމުގައި ފުލުހުންގެ ފަރާތުން އެކަށީގެންނުވާ ބާރުގެ ބޭނުން ކުރުމުގެ ސަބަބުން ރިލްވާންގެ މަންމައަށް އަނިޔާވި މައްސަލަ ކޮމިޝަނުން ނުބެލުން ވެސް ސަބަބުތަކުގެ ތެރޭގައި ހިމެނެއެވެ.
މީގެއިތުރުން އަނިޔާވެރިކޮށް މަރާލާފައިވާ ބްލޮގަރ، ޔާމިން ރަޝީދުގެ މައްސަލައިގައި، އާނާއަށް ދީފައިވާ މަރުގެ އިންޒާރުގެ މައްސަލަތައް ފުލުހުން ނުބެލި މައްސަލަ ޔާމީން ރަޝީދުގެ ޢާއިލާއިން ކޮމިޝަނަށް ހުށަހެޅުމުން އެ މައްސަލަ ބެލުމުގައި ވެސް އިހުމާލުވުމާއި، ޢާއިލާއާމެދު އެ ކޮމިޝަނުން ޢަމަލުކުރިގޮތް ރަނގަޅު ނޫން ކަމަށް ކޮމިޓީއަށް ފެންނާތީ ކޮމިޓީން ނިންމާފައިވަނީ އެ މެމްބަރުން ވަކި ކުރުމަށެވެ. އަދި އަނިޔާގެ މައްސަލަތައް ބަލަންވާ ވަރަށް ބަލާފައި ނުވުމާއި ނޭޝަނަލް ޕްރިވެންޓިވް މެކޭނިޒަމްގެ ޒިޔާރަތްތައް ހުއްޓުވާލުން ވެސް ފާހަގަކޮށްލެވެއެވެ.
