ރިސޯޓްގައި ހަމަނުޖެހުން ހިންގި ބިދޭސީންގެ ބަންދުގެ މުއްދަތު ޖަހައިފި
21 ޖުލައި 2020 | އަންގާރަ 17:12ބިދޭސީންގެ ބަންދަށް ވަނީ 15 ދުވަސް ދީފައި
ހަމަނުޖެހުން ހިންގި ބިދޭސީން
ވ. އަތޮޅުގައި ތަރައްގީ ކުރަމުންދާ ރިސޯޓެއްގައި ހަަމަނުޖެހުން ހިންގި ބިދޭސީންގެ ބަންދަށް 15 ދުވަސް ޖަހައިފިއެވެ.
ފުލުހުން ބުނީ ހޯމަ ދުވަހުގެ ރޭ ހިންގި ހަމަނުޖެހުންތަކާއި ގުޅިގެން ފުލުހުންގެ ބެލުމުގެ ދަށަށް ގެންދިޔަ ބިދޭސީންގެ ބަންދާއި މެދު ގޮތެއް ނިންމުމަށް ވ. ފެލިދޫ މެޖިސްޓްރޭޓް ކޯޓަށް ހާޒިރުކުރުމުން މިނިސްޓްރީ އޮފް ހޯމްއެފެއަރޒް އިން ކަނޑައަޅާ ތަނެއްގައި ބަންދުގައި ބަހައްޓައިގެން ތަހުޤީގު ކުރިއަށް ގެންދިއުމަށް 15 ދުވަހުގެ މުއްދަތު ދީފައިވާ ކަމަށެވެ.
ހޯމަ ދުވަހުގެ ރޭ ފުލުހުން ބުނީ، ރިސޯޓެއްގެ ގެ ގޮތުގައި ތަރައްޤީ ކުރަމުންދާ ރަށެއްގައި މަސައްކަތް ކުރަމުން ދިޔަ ބިދޭސީ މަސައްކަތްތެރިން، މަސައްކަތަށް ހުރަސް އަޅައި އިހްތިޖާޖުކޮށް ހަމަނުޖެހުން ހިންގުމާއި ގުޅިގެން އެ ރަށުގައި ފުލުހުން ހަރަކާތްތެރިވަމުންދިޔަ ކަމަށެވެ. އެއީ ކޮން ރަށެއް ކަމެއް ފުލުހުން ހާމައެއް ނުކުރެއެވެ.
ފުލުހުން ބުނީ، ހަމަނުޖެހުމުގައި އެއްވެސް މީހަކަށް އަނިޔާވެފައިނުވާ ކަމަށެވެ. ނަމަވެސް އެ ހަމަނުޖެހުމުގައި އެ މީހުންގެ ސުޕަވައިޒަރުގެ ރޫމްއަށް ގެއްލުން ދީފައިވާ ކަމަށް ފުލުހުން މައުލޫމާތުދެއެވެ. މައްސަލަ ހައްލު ކުރުމަށް ސްޕޮންސަރުންނާ ވާހަކަ ދައްކަމުންދާ ކަމަށް ފުލުހުން ވަނީ ބުނެފައެވެ.
