ރިލުވާންގެ މަރާ ގުޅޭ ވަގު ޑޮކިއުމެންޓް ހެދި ފަނޑިޔާރު އިސްތިއުފާ ދެއްވައިފި
21 ޖުލައި 2020 | އަންގާރަ 08:28ހަސަން އަލީ ސަސްޕެންޝަންގައި ހުންނަވާތާ ދިހަ މަސް ދުވަސް ވަނީ ވެފައި
ހައި ކޯޓުގެ ފަނޑިޔާރު ހަސަން އަލީ
ރިލުވާނުގެ މަރާ ގުޅޭ ވަގު ޑޮކިއުމަންޓް ހެއްދެވުމުގެ ތުހުމަތުކުރެވޭ ހައި ކޯޓުގެ ފަނޑިޔާރު ހަސަން އަލީ އިސްތިއުފާދެއްވައިފިއެވެ.
ހަސަން އަލީ އިސްތިއުފާ ދެއްވުމާ ގުޅިގެން ޖުޑީޝަލް ސަރވިސް ކޮމިޝަން (ޖޭއެސްސީ) އިން ނެރުނު ބަޔާނުގައި ބުނެފައިވަނީ، ފަނޑިޔާރު އިސްތިއުފާ ދެއްވީ އެ ކޮމިޝަނުގެ އަޑުއެހުމަށް ހާޒިރުވުމަށް އަމުރު ފޮނުވާފައިވަނިކޮށެވެ. ޖޭއެސްސީން އަމުރު ފޮނުވާފައިވަނީ ހަސަން އަލީގެ މައްޗަށް ތުހުމަތުކުރެވޭ މައްސަލައިގެ ފަހު އަޑުއެހުމަށެވެ.
ފަނޑިޔާރު ހަސަން އަލީގެ މައްޗަށް ތުހުމަތުކުރެވެނީ 2014 ވަނަ އަހަރު އިމިގްރޭޝަން ކޮންޓްރޯލަރުގެ މަގާމުގައި ހުންނެވި ދުވަސްވަރު، މޯލްޑިވްސް ޕޮލިސް ސަރވިސް އިންޓެލްގައި މަސައްކަތްކުރާ ދެ ފުލުހުންނާ ގުޅިގެން، ނޫސްވެރިޔާ އަހުމަދު ރިޟުވާން އަބްދުﷲ ރާއްޖެއިން ބޭރަށް ގޮސް މަރުވެފައިވާކަން ދެއްކުމަށްޓަކައި ޓްރެވަލް ޑޮކިއުމެންޓެއް ތައްޔާރުކުރުމުގެ މަސައްކަތް ކޮށްފައިވާކަމަށެވެ.
ރިޟްވާންގެ މަރުގެ މައްސަލަ ތަހުގީގުކުރަމުން އަންނަ މަރު ކޮމިޝަނުން ޖޭއެސްސީއާ އެ މައުލޫމާތު ހިއްސާކުރުމުން، އެ ކޮމިޝަނުން ވަނީ 16 ސެޕްޓެމްބަރު 2019 ވަނަ ދުވަހު ފަނޑިޔާރުކަމުގެ ހުރިހާ މަސްއޫލިއްޔަތަކުން ހަސަން އަލީ އެކަހެރިކޮށް، ގޭގައި މަޑުކުރުމަން އަންގާފައެވެ. ހަސަން އަލީ ސަސްޕެންޝަނުގައި ހުންނަވާތާ ދިހަ މަސް ދުވަސް ވަނީ ވެފައެވެ.
ކޮމިޝަނުން ބެލި މައްސަލައިގެ ތަހުގީގު ނިންމުމަށް ފަހު ތައްޔާރުކުރެވުނު ތަހުގީގު ރިޕޯޓު ނިންމާ، އޮންނަ އުސޫލުގެ ތެރެއިން ހަތް ދުވަހުގެ ތެރޭގައި ޖަވާބުދާރީ ވުމަށް ފޮނުވުނީ މި ޖުލައި މަހުގެ 12 ގައެވެ. އަދި ފަނޑިޔާރު އިސްތިއުފާ ދެއްވީ ބުދަ ދުވަހު ފަހު އަޑުއެހުމަށް ހާޒިރުވާން އެންގުމުންނެވެ.
