އިމިގްރޭޝަން ގާނޫނަށް އިސްލާހެއް ހުށައެއްނާޅަން: ރައީސް ނަޝީދު

އިމިގްރޭޝަން ގާނޫނަށް އެއްވެސް އިސްލާހެއް ހުށަނާޅުއްވާ ކަމަށް ވިދާޅުވެ، މަޖިލީހުގެ ގައުމީ ސަލާމަތާއި ޚަރީޖީ ގުޅުންތަކުގެ ކޮމިޓީގެ މުގައްރިރު، އިބްރާހިމް ޝަރީފް ދެއްކެވި ވާހަކަތައް މަޖިލީހުގެ ރައީސް މުހައްމަދު ނަޝީދު ދޮގު ކުރައްވައިފިއެވެ.

ހޯމަ ދުވަހުގެ މަޖިލީހުގެ ޖަލްސާގައި ބިދޭސީންނަށް ރެސިޑެންޓް ވިސާ ލިބޭ ގޮތަށް ރައްޔިތުންގެ މަޖިލިހުގެ ރައީސް މުހައްމަދު ނަޝީދު ހުށަހެޅުއްވި އިސްލާހުގެ ހަގީގަތް ހޯދުމަށް ނޮޅިވަރަމް ދާއިރާގެ މެމްބަރު މުހައްމަދު ނަޝީދު ހުށައެޅުއްވި ކުއްލި މައްސަލައަށް ވޯޓަށް އެހުމަށް ރަނގަބީލު ޖެހިފަހުން މަޖިލީހުގެ ރައީސް ވިދާޅުވީ ހުރިހާ ރައްޔިތުންނަށާއި މެމްބަރުންނަށް ކަމުގެ ހަގީގަތް ސާފުވާން ޖެހޭ ކަމަށެވެ.

Advertisement

އެ ބިލު ދިރާސާކުރާ މުގައްރިރު، އަދި މަރަދޫ ދާއިރާގެ މެމްބަރު އިބްރާޙިމް ޝަރީފު ވިދާޅުވެފައިވަނީ ރިޔާސަތުން ހުށައަޅާފައިވާ އިސްލާހާއި އެކު، އެ ބިލާ މެދު އަލުން ކޮމިޓީގައި ވިސްނުމަށް އެދިވަޑައިގެންފައިވާ ކަމަށެވެ.

އެގޮތުން، ނަޝީދު ހުށައަޅުއްވާފައިވަނީ، މިހާރު ރެޒިޑެންސް ވިޒާ ދޭ ބޭރުގެ ވިޔަފާރިވެރިންނަށް 100،000ރ. އަށް ވުރެ ބޮޑު އިންވެސްޓްމަންޓެއް ރާއްޖޭގައި ކުރާ ބިދޭސީންނަށާއި، ދިހަ އަހަރަށްވުރެ ދިގު މުދަތަކަށް ގެއެއް ކުއްޔަށް ހިފާ ފަރާތްތަކަށް އަދި ދިވެއްސަކާ ކައިވެނިކޮށްގެން އުޅޭ ބިދޭސިންނަށް ރެސިޑެންސް ވިސާ ދިނުމަށް ކަމަށް ވެސް ވިދާޅުވިއެވެ.

މި އިސްލާހު ފާސްވެއްޖެ ނަމަ، ފަސޭހައިން ބިދޭސީންނަށް ރާއްޖެއިން ބިދޭސީންނަށް ރެޒިޑެންސް ވިޒާ ލިބިގެންދާނެ ކަމަށް ބުނެ ގިނަ ބަޔަކު ކަންބޮޑުވުން ފާޅުކުރަމުންދާއިރު، ރައީސް ނަޝީދު ވިދާޅުވެފައިވަނީ އެމަނިކުފާނު އިމިގްރޭޝަންގެ ގާނޫނަށް އެއްވެސް އިސްލާހެއް ހުށަނާޅުއްވާކަމަށެވެ.

އެއްލައްކަ ރުފިޔާއަށް ވުރެ ބޮޑު އިންވެސްޓްމަންޓެއް ކޮށްގެން ރެޒިޑެންސީ ލިބޭ ގޮތަށް އިސްލާހު ހުށައެޅުއްވި ކަމަށް ޚަބަރު ފެތުރެމުންދާއިރު، މިކަމާއި ގުޅިގެން އެމަނިކުފާނު ވިދާޅުވީ އެ އަދަދަކީ ކޮމިޓީގެ އަދަދެއް ނޫން ކަމަށެވެ. އެހެންނަމަވެސް، ތަޅުމުގައި ވާހަކަދައްކަވަމުން މެމްބަރުން ވަނީ އެއް ލައްކަ ޑޮލަރާއި އެއް މިލިއަން ޑޮލަރާއި ދެމެދުގެ އަދަދުތައް ފާހަގަކުރައްވާފައިވާ ކަމަށް ވިދާޅުވިއެވެ.

މަޖިލީހުގެ ނިޒާމު ސާފުކޮށްދެއްވަމުން ރައީސް ނަޝީދު ވިދާޅުވެފައިވަނީ ކޮމިޓީއަށް ފޮނުވޭނީ ބިލަކާއި ގުޅިގެން އިބްތިދާއީ ބަހުސްގައި ދެކެވޭ ވާހަކަތައްކަމަށެވެ. އަދި، ބިލު ދިރާސާ ކުރަމުންދާއިރު، އެ ކޮމިޓީން ނިންމައިފިނަމަ އާއްމުންގެ ހިޔާލަށް ހުޅުވާލާ، އެކި ވުޒާރާތަކާއި އިދާރާތަކާއި ބައްދަލުކުރެވޭނެ، ކަމަށެވެ.

އެއަށް ފަހު ކޮމިޓީއަށް ލިބުނު ހުރިހާ މައުލޫމާތުގެ މައްޗަށް ރިޕޯޓެއް އެކުލަވާލާ، ތަޅުމަށް ފޮނުވޭނެ ކަމަށެވެ. ނަޝީދު ވިދާޅުވީ، ތަޅުމުގައި ފާހަގަކުރެވުނު ކަންކަން އެ ރިޕޯޓުގައިވޭތޯ ބެލުމަކީ މަޖިލީހުގެ ރައީސްގެ މަސްއޫލިއްޔަތެއް ކަމަށެވެ. ރައީސް ނަޝީދު އިތުރަށް ވިދާޅުވީ، އިމިގްރޭޝަން ގާނޫނަށް އިސްލާހު ގެނައުމުގެ ބިލް ކޮމިޓީއަށް އަލުން ފޮނުވާލެއްވީ ކޮމިޓީގައި ދެކެވުނު އެއްވެސް ވާހަކައެއް ރިޕޯޓުގައި ނެތުމުން ކަމަށެވެ.

ރެޒިޑެންޓް ވިޒާ ދިނުމުގައި ބޮޑެތި ލުއިތަކެއް ދޭން ނިންމާފައިވާ ކަމަށް ރައީސް ނަޝީދަށް ބޮޑެތި ފާޑުކިޔުންތަކެއް ވަނީ އަމާޒުވެފައެވެ. އަދި މި ފާޑުކިޔުންތަކާ ގުޅިގެން މަޖިލިހުގެ މެޖޯރިޓީ އޮންނަ އެމްޑީޕީގެ ބައެއް މެމްބަރުން ވަނީ ކަމުގެ ހަގީގަތް އޮޅުވާލަން އެކި ފަރާތްތަކުން މަސައްކަތްކުރާ ކަމަށް ވިދާޅުވެ ނުރުހުން ފާޅުކުރައްވާފައެވެ.