ބޭރު މީހާ ގަވައިދަށް ގެނެއުމަށް ހުއްދައެއް ދޭންޖެހޭ، އުޅޭނެ ތަނެއްވެސް ދޭންޖެހޭ: ނަޝީދު
ހައްލެއް އެއްވެސް ބަޔަކަށް ނުގެނެވޭ
އެމްޑީޕީގެ ޖަލްސާއެއްގައި ރައީސް ނަޝީދު ވާހަކަފުޅު ދައްކަވަނީ
ގަވައިދާ ހިލާފަށް އުޅޭ ބިދޭސީން ގަވާއިދުގެ ތެރެއަށް ގެނެއުމަށް ކޮންމެވެސް ބާވަތެއްގެ ހުއްދައެއްދީ، އެ މީހުން އުޅޭނެ ތަނެއް ދޭންޖެހޭ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބިދޭސީން އުޅޭނެ ތަނެއް ދޭން ޖެހޭ ކަމަށް ކަމަށް ރައީސް ނަޝީދު ވިދާޅުވީ، އެމަނިކުފާނުގެ ވެބްސައިޓުގައި''ބޭރު މީހުން''ގެ މައުޝޫގައި ލިޔުއްވާފައިވާ ލިޔުމެއްގައެވެ.
ރައީސް ނަޝީދު ވިދާޅުވީ, ލިޔެކިޔުން ގެއްލުވާލާފައިވާ ބިދޭސީން އެމީހުންގެ ގައުމަށް ފޮނުވާލައި، އެމީހުންގެ މައްސަލަ ހައްލު ކުރެވުނު އެއްވެސް ގައުމެއް ނެތް ކަމަށެވެ. ތަރައްގީ ވެފައިވާ ގައުމު ތަކަށްވެސް ޖެހެނީ އެމީހުންނަށް ތިބެވޭނެ ގޮތް ހަދައިދޭން ކަމަށް އެމަނިކުފާނު ވިދާޅުވިއެވެ. ޔޫރަޕްގެ ގައުމުތަކުން މިސާލު ނަންގަވަމުން ރައީސް ނަޝީދު ވިދާޅުވީ، އެ ގައުމުތަކުން ފެންނަމުން ދިޔަ މަންޒަރަކީ އެ ގައުމުތަކަށް ހެޔޮއަގުގައި މަސައްކަތް ކުރުމަށް މީހުންގެނައި މިންވަރު އިތުވެރުވެ ދިޔަ މަންޒަރު ކަމަށެވެ.
ރައީސް ނަޝީދުގެ ނަޒަރުގައި، ގަވާއިދާ ހިލާފަށް އުޅެމުންދާ ހުރިހާ އެންމެން ފޮނުވައެއް ނުލެވޭނެއެވެ. އަދި އެމީހުން ފޮނުވާލާނެ ކަމަށް ވިދާޅުވަނީނަމަ އެއީ ވަރަށް ޒިންމާދާރުކަން ކުޑަކޮށް ވިދާޅުވާ ބަސްތަކެކެއް ކަމަށް އެމަނިކުފާނު ވިދާޅުވި އެވެ. ރައީސް ނަޝީދު ވިދާޅުވީ، ރާއްޖޭގައި މިހާރު ތިބި ގިނަ ބޭރު މީހުންގެ މައްސަލަ ހައްލު ކުރެވޭނީ ރާއްޖޭގައި ކަމަށެވެ.
ރައީސް ނަޝީދުގެ ލިޔުން ނިންމަވާލައްވަމުން އެމަނިކުފާނު ވިދާޅުވީ، އެ ވާހަކަތަކާއި ބައެއް ބޭފުޅުން ނުރުހިދާނެ ކަމަށެވެ. އެހެން ނަމަވެސް މީގެ ފަސް ދިހަ އަހަރުފަހުން ބިދޭސީންގެ މައްސަލަ އޮންނާނީ އަދި މާ ބޮޑުވެފައި ކަމަށެވެ.
