ށ. ފުނަދޫ އާއި ބ. އޭދަފުށީގެ ކޮވިޑް މެނޭޖްމެންޓް ފެސިލިޓީ ހުޅުވައިފި
16 ޖުލައި 2020 | ބުރާސްފަތި 19:58މި ފެސިލިޓީތައް ރަސްމީކޮށް ހުޅުވައިދެއްވީ ޕްލޭނިންގ މިނިސްޓަރ އަސްލަމް
މިއިން ކޮންމެ ފެސިލިޓީއެއްގައިވެސް 20 އައިސީޔޫ އެނދާއި، 37 އައިސޮލޭޝަން އެނދު ހުންނާނެ
ށ އަތޮޅު ފުނަދޫއާއި ބ އަތޮޅު އޭދަފުށީގައި ޤާއިމުކޮށްފައިވާ ކޮވިޑް މެނޭޖްމަންޓް ފެސިލިޓީ ރަސްމީކޮށް ހުޅުވައިފިއެވެ.
ބުރާސްފަތި ދުވަހުގެރޭ އޮންލައިންކޮށް ކުރިއަށްދިޔަ ބައްދަލުވުމެއްގައި މި ފެސިލިޓީތައް ރަސްމީކޮށް ހުޅުވައިދެއްވީ ބައްދަލުވުމުގެ ޝަރަފުވެރި މެޙެމާން، މިނިސްޓަރ އޮފް ހައުސިންގ، ޕްލޭނިންގ އެންޑް އިންފްރާސްޓްރަކްޗަރ މުޙައްމަދު އަސްލަމްއެވެ.
މިނިސްޓަރ އަސްލަމްގެ އިތުރުން މި ރަސްމިއްޔާތުގައި ހެލްތް މިނިސްޓަރ އަބްދުﷲ އަމީނާއި، ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ)ގެ އިސް ބޭފުޅުންގެ އިތުރުން، ށ ފުނަދޫ އަދި ބ އޭދަފުށީ ސިއްޙީ މަރުކަޒުގެ އިސް ވެރިންވެސް ބައިވެރިވެ ވަޑައިގެންނެވިއެވެ.
ށ ފުނަދޫގައި ޤާއިމުކޮށްފައިވާ ފެސިލިޓީގައި 20 އައިސީޔޫ އެނދާއި، 37 އައިސޮލޭޝަން އެނދު ހުންނާނެ ކަމަށާއި، ބ އޭދަފުށީގައި ޤާއިމުކޮށްފައިވާ ފެސިލިޓީގައިވެސް 20 އައިސީޔޫ އެނދާއި، 37 އައިސޮލޭޝަން އެނދު ހުންނާނެކަމަށް ހެލްތް މިނިސްޓްރީން މައުލޫމާތުދެއެވެ. އަފި މި ފެސިލިޓީތައް ޤާއިމު ކުރުމާއެކު، ކޮވިޑް-19 ޖެހިގެން ޙާލު ބޮޑުވާ ބަލި މީހުންވެސް މާލެ އަންނަން ނުޖެހި، އަތޮޅު ތެރެއިން ފަރުވާ ލިބޭނެ ކަމަށް މިނިސްޓްރީން ބުނެއެވެ.
އަތޮޅުތެރޭގައި 7 ފެސިލިޓީއެއް ގާއިމް ކުރުމުގެ މަސައްކަތްތައް ހެލްތް މިނިސްޓްރީން ކުރިއަށްގެންދާއިރު، އޭގެ ތެރޭގައި ހިމެނެނީ 5 މެއިން ފެސިލިޓީއާއި 2 ޓްރާންސިޓް ފެސިލިޓީ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީން) މީގެ ކުރިން ބުނެފައިވެއެވެ. އެގޮތުން ލ. އަތޮޅާއި އައްޑު ސިޓީގައި ގާއިމް ކުރާ ފެސިލިޓީތައްވެސް ޚިދުމަތް ދެވޭ ފެންވަރަށް ތަރައްޤީކުރެވި، ހުޅުވަން ތައްޔާރުވަމުންދާކަން އެޗްއީއޯސީން ހާމަ ކޮށްފައިވެއެވެ.
ރާއްޖޭގެ 5 ޒޯނެއްގައި ކޮވިޑް ޓްރީޓްމަންޓް މެއިން ފެސިލިޓީތައް ޤާއިމު ކުރުމުގެ މަސައްކަތް ކުރަމުންދާއިރު، އޭގެ ތެރޭގައި ހިމެނެނީ އަލަށް ހުޅުވާފައިވާ ށ ފުނަދޫއާއި ބ އޭދަފުށީ ސެންޓަރުގެ އިތުރުން، ލ. ގަމާއި، ގއ. ވިލިނގިލި އަދި އައްޑޫ ސިޓީގައި ޤާއިމުކުރާ ފެސިލިޓީއެވެ.
