މަޖިލިސް ފެންނަނީ ކަންމަތީ ފިހާރައެއްގެ ގޮތުގައި: ފައިސަލް ނަސީމް
މަޖިލީހުގައި މަސައްކަތް ކުރަނީ ހިތުހުރި ގޮތަކަށް
ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު ފައިސަލް ނަސީމް
ރައްޔިތުންގެ މަޖިލިސް މިހާރު ހިންގަމުންދަނީ ކަންމަތީ ފިހާރައެއްގެ އުސޫލުން ކަމަށް އެ މަޖިލީހުގެ ކާށިދޫ ދާއިރާގެ މެންބަރު ފައިސަލް ނަސީމް ވިދާޅުވެއްޖެއެވެ.
ހޯމަ ދުވަހުގެރޭ އިދިކޮޅު ފަރާތްތަކުން، ޖުމްހޫރީ ޕާޓީގެ މައި ހަރުގެ، މ. ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން ފައިސަލް ވިދާޅުވީ، މިހާރު ފެނިގެން ދަނީ ކަންމަތީ ފިހާރައެއް ހުޅުވާ ލައްޕާ އުސޫލުން ހިތަށް އެރި ގޮތަކަށް މަޖިލިސް ހުޅުވައި ލައްޕައި، އެތަނުގައި ހިތަށް އެރި ގޮތަކަށް މަސައްކަތް ކުރަމުންދާ މަންޒަރު ކަމަށެވެ.
މަޖިލިސް މި ފެންނަނީ އަމިއްލަ ކުޑަކުޑަ ފިހާރަގަނޑެއްގެ ގޮތުގަ. ކަންމަތީ ފިހާރައެއް ހުޅުވާފަ ލައްޕާ ގޮތަށް މަޖިލިސް ހުޅުވާފަ ލެއްޕުން މިއޮތީ. މަޖިލީހުގަ އެކަނި ގޮސްގެން ވެސް ކަންތައްތައް ނިންމާލަނީ. ނިންމާފަ ހެނީ ހަމަ. އަތްތިލަބަޑި ވެސް ޖަހަނީ. އަހަރުމެން ބޭނުންވާ ގޮތަށް މިއޮތީ ނިމިފައޭ. 46 ވޯޓު 48 ވޯޓު، އެކަނި ގޮސް ނިންމާލާފަ ވެސް
ރައްޔިތުންގެ މަޖިލިސް ހިނގަމުންދާ ގޮތަށް ފާޑުވިދާޅުވެ ވާހަކަ ދައްކަވަމުން، ފައިސަލް ވިދާޅުވީ، ޤާނޫނު އަސާސީގައި ރައްޔިތުންނަށް ލިބިދީފައިވާ ޙައްޤުތައް ނިގުޅައިގަންނަމުން ދަނީ ކޮރަޕްޝަންގެ ވާހަކަ ރައްޔިތުން ދައްކާތީ ކަމަށާއި، ނަމަވެސް ކޮރަޕްޝަން ހިންގާނަމަ އެވާހަކަ ދައްކާނެ ކަމަށެވެ.
އަޅުގަނޑުމެން ބޭނުމެއް ނުވޭ އެއްވެސް މީހަކަށް ވަގަށް ގޮވާކަށް. ކޮރަޕްޝަނޭ ހަޤީޤަތުގަ ކިޔަން ވެސް އަޅުގަނޑުމެން ބޭނުމެއް ނުވޭ. އެހެންނަމަވެސް ޤައުމަކަށް ލިބޭ ދެތިން އަހަރުގެ ބަޖެޓް އެއް އަހަރުގެ ދެތިން މަސްތެރޭގަ އޭތި ގެއްލިގެން، އެހިސާބަށް ދިޔައިމަ އެވާހަކަ ދައްކާނެ. ދެން އެވާހަކަ ދައްކާތީވެ އެކަންތައް ހުއްޓުވުމަށްޓަކާ، ޤަނޫނުއަސާސީއާ ޤާނޫނުތަކަށް ކިތަންމެ ބަދަލުތަކެއް ގެނަޔަސް އެވާހަކަ ދައްކާނެ
ފައިސަލް އިތުރަށް ވިދާޅުވީ، ކޮރަޕްޝަން ފަދަ ކަންކަމުގައި ބަސްބުނެ، އިސްލާހީ މަސައްކަތް ފެށުމުން ދެން ފެނިގެންދަނީ، ހައްޤު އަދަބު ލިބެން ޖެހޭ ބޮޑެތި ކުށްވެރިން ދޫކޮށްލައި، ސިޔާސީ ލީޑަރުންނަށް ޙުކުމް ކުރުމައިގެން އުޅޭތަން ކަމަށެވެ.
ކޮބާތޯ މި ޤައުމުގަ ތިބި މި ޤައުމުގެ ރައުސުލްމާލުން އެތައް ބައެއް ހުސްކޮށްލާފަ، އަދި އެނޫނަސް އެބަތިބި ޑްރަގް ވިޔަފާރިއާ މިނޫނަސް އެތައް ކަންތައްތަކެއް އަޅުގަނޑުމެންނަށް ދުވަހުން ދުވަހަށް އަޑު އިވެމުންދާއިރު، ހައްޤު އަދަބު ދެވެންޖެހޭ ފަރާތްތަކެއް ޤައުމުގައި ތިބިކަމީ އެއީ، އަޅުގަނޑުމެންގެ ތެރޭ ސުވާލު އުފެދިފަ އޮތް ކަމެއް ނޫން. ކީއްވެގެންތޯ މި ކަންތައްތައް ނުކުރެވިގެން އުޅެނީ؟
ފައިސަލް ވިދާޅުވީ ބޮޑެތި ކުށްވެރިންނާއިގެން ނޫޅެ، ސިޔާސީ ލީޑަރުންގެ ފަހަތުން އުޅެންވީ ސަބަބެއް ނެތް ކަމަށެވެ.
ޖުމްހޫރީ ޕާޓީގެ ލީޑަރު، އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހިމް ހައްޔަރުކޮށްފައިވަނީ ޤާނޫނާއި ޚިލާފަށްކަން ފާހަގަކުރައްވާ ފައިސަލް ވަނީ ސަރުކާރުގެ އެ އަމަލު ވަރަށް ބޮޑަށް ކުށްވެރި ކުރައްވާފައެވެ.
