ފަޚުރުވެރި ޢާއިލާތަކެއް ބިނާކުރުމަށް އަޅުގަނޑު ވީ ވަޢުދު ހަނދާނެއް ނުނެތޭ: ރައީސް

ފަޚުރުވެރި އާއިލާތަކެއް ބިނާ ކުރުމަށް ވެވަޑައިގެންފައިވާ ވަޢުދުފުޅު ހަނދާން ނުނެތޭ ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ވިދާޅުވެއްޖެއެވެ.

ގެވެށި އަނިޔާ ހުއްޓުވުމަށް ޖެންޑަރ މިނިސްޓްރީން ފަށާގައިވާ "ގެވެށި ގުޅުން" ކެމްޕެއިން އިފްތިތާޙު ކުރެއްވުމުގެ ގޮތުން ދެއްވި ވީޑިއޯ މެސެޖުގައި ރައީސް ސޯލިޙު ވިދާޅުވީ، ގެވެށި އަނިޔާއަކީ ކަންބޮޑުވާ މިންވަރަކަށް ދިވެހި މުޖުތަމަޢުގައި ޒަމާނުއްސުރެ އަށަގަނެފައިވާ އިޖުތިމާޢީ ބޮޑު މައްސަލައެއް ކަމަށެވެ. އަދި މިއީ ޢާއިލާތައް ހަލާކުވެ، އުފާވެރި ޖީލުތަކެއް ބިނާކުރުމަށް ހުރަސްއަޅާ މައިގަނޑު އެއް މައްސަލަ ކަމަށްވެސް ރައީސް ވިދާޅުވިއެވެ.

އޭގެ އިތުރުން، މި މައްސަލަ ޙައްލުކުރުމުގައި މުޅި ދައުލަތް ޒަމާންތަކެއް ވަންދެން ނުކުޅެދިފައި އޮތްކަން ފާހަގަ ކުރައްވައި ރައީސް ސޯލިޙު ވިދާޅުވީ، މިކަން ޙައްލުނުކޮށް، މުޖުތަމަޢެއްގެ ގޮތުގައި ކުރިއަށް ދެވޭކަށް ނެތް ކަމަށެވެ.

އަންހެނުންނާއި ކުޑަކުދިންނަށް ރައްކާތެރިކަމާއި ޢަދުލު އިންސާފު ހޯދައިދިނުމަށް ސަރުކާރުން ކުރަމުންދާ މަސައްކަތް ފާހަގަ ކުރައްވައި ރައީސް ވިދާޅުވީ، މި އަހަރު މިނިސްޓްރީ އޮފް ޖެންޑަރ އަށް ކަނޑައަޅާފައިވާ ބަޖެޓުވެސް 294 މިލިއަން ރުފިޔާއަށް އިތުރު ކޮށްފައިވާ ކަމަށެވެ. އަދި ޤާނޫނުތަކަށް ގެންނަން ޖެހޭ ބަދަލުތައް ވެސް ގެންނަމުންދާކަން ފާހަގަ ކުރައްވައި ރައީސް ވިދާޅުވީ، ރޭޕް އަދި ޖިންސީ ގޯނާއަކީ، ގްރޭވް ކްރިމިނަލް އޮފެންސް (ޖިނާއީ ބޮޑު ޖަރީމާއެއް) ގެ ގޮތުގައި، ޖިނާއީ އިޖުރާއާތުގެ ޤާނޫނުގައި މިހާރު ކަނޑައަޅާފައިވާ ކަމަށެވެ.

އޭގެ އިތުރުން، ގެވެށި އަނިޔާގެ ޝިކާރައަކަށް ވެފައިވާ މީހުންނަށް އިތުރަށް އަނިޔާ ލިބޭނެ ގޮތަކަށް ޢަމަލުތައް ބަހައްޓައިގެން ނުވާނެކަން ފާހަގަ ކުރައްވައި ރައީސް ވިދާޅުވީ، އެ މީހުން އަލުން "ވިކްޓިމައިޒް" ވިޔަދީގެން ނުވާނެ ކަމަށެވެ.

ރައީސް ވިދާޅުވީ، ބޭރު ޤައުމުތަކަށް ސަފީރުން ކަނޑައެޅުމަށް، 5 ނަމެއް މިހާރު ރައްޔިތުންގެ މަޖިލީހަށް ހުށަހަޅާފައިވާ ކަމަށާއި، އޭގެ ތެރޭގައި 3 އަންހެން ބޭފުޅަކު ހިމެނޭނެ ކަމަށެވެ. އަދި އެ ބޭފުޅުންނަށް ރުހުން ލިބި، މަޤާމަށް ޢައްޔަނުކުރުމުން، ދިވެހި ސަފީރުންގެ ތެރޭގައި ހިމެނޭ އަންހެނުންނާއި ފިރިހެނުންގެ ޢަދަދު ހަމަހަމަ ވެގެންދާނެކަން ފާހަގަ ކުރައްވައި ރައީސް ވިދާޅުވީ، މިއީ ވެސް އަންހެނުން ބާރުވެރި ކުރުވުމުގައި ކުރިއަށް އެޅުނު މުހިންމު ފިޔަވަޅެއް ކަމަށެވެ.