މާދަމާވެސް ޖަލަށް ލެވިދާނެ ކަމަށާއި ރައީސް އަބްދުﷲ ޔާމީން ކިތަންމެ ބާރަށް އުޅުއްވިއަސް ޤައުމު އިސްލާހުކުރައްވަން ނިކުމެވަޑައިގެން ތިއްބެވި 4 ލީޑަރުން ފަހަތަކަށް ނުޖެއްސެވޭނެ ކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހީމް ވިދާޅުވެއްޖެއެވެ.

ގުޅިފައިވާ ސިޔާސީ ޕާޓީތަކުން ބުދަ ދުވަހުގެ ރޭ މ. ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން ޤާސިމް ވިދާޅުވީ އެބޭފުޅުންނަކީ ތަފާތު ޚިޔާލުތަކުގެ ލީޑަރުން ކަމަށާއި އެހެންނަމަވެސް އެޚިޔާލު ތަފާތުވުންތައް ދޫކޮށްލާފައި އެއްގަލަކަށް އެރުމުން ރައްޔިތުންނަށް ޤަބޫލު ކުރެއްވޭނެ ހަޤީގަތަކީ އަމާންކަމާއި އޮމާންކަމާއެކީގައި ކަންކަން ކުރިއަށް ގެންދެވޭނެ ދުވަހެއް އޮތްނަމަ މިގޮތަށް މިހެން މަސައްކަތް ކުރަން ނުޖެހޭނެކަން ކަމަށެވެ. ޤާސިމް ވިދާޅުވީ ކުރިއަށް އޮތް ރިޔާސީ އިންތިޚާބުގައި ރައީސް ޔާމީން ވާދަކުރެއްވި ނަމަވެސް މިހާރު އިސްލާހަށް މަސައްކަތކުރާ އެއްވެސް ޕާޓީއަކުން ރައީސް ޔާމީނަށް ތާއީދު ނުކުރައްވާނެ ކަމަށެވެ.

ގާސިމް ވިދާޅުވީ، ހަތަރު ޕާޓީގެ ލީޑަރުން ނިކުމެވަޑައިގަތީ އަމިއްލަފުޅަށް ނޫން ކަމަށާއި ޕާޓީތަކުގެ އާއްމު މެންބަރުންގެ ތެރެއިން އެކަން އެގޮތަށް ނިންމުމުން، މަޖްބޫރުވެގެން ޤައުމު ސަލާމަތް ކުރައްވަން ކަމަށެވެ. އަދި މިއީ ޤައުމު ސަލާމަތްކޮށް، ހަމަހަމަކަމާއެކު އަދްލު އިންސާފް ޤާއިމްކޮށް، ރާއްޖޭގެ އިޤްތިސޯދު ހިމާޔަތްކޮށް، ރާއްޖެއިން ކޮރަޕްޝަން ނައްތާލުމަށް ކުރާ މަސައްކަތެއް ކަމަށް ގާސިމް ވިދާޅުވި އެވެ. 

ޤާސިމް ވިދާޅުވީ 4 ލީޑަރުންގެ ތެރެއިން ޤާސިމް އެކަނި މިވަގުތު މާލޭގައި ހުންނެވުނު ނަމަވެސް ހަތަރު ލީޑަރުންގެ މެދުގައި ކަންކަން ދަނީ ވަރަށް ބޮޑަށް ގުޅި ވަރަށް އެކުވެރި ޖައްވެއްގައި ކަމަށެވެ. އެކަމަށްޓަކައި އަނެއް ތިން ލީޑަރުންނަށް ޝުކުރު އަދާކުރައްވާ ކަމަށް ޤާސިމް ވިދާޅުވިއެވެ. ޤާސިމް ވިދާޅުވީ އެ ބޭފުޅުން ގުޅިވަޑައިގެން ޤައުމު އިސްލާހުކުރައްވާނެ ކަމަށެވެ.

"އަޅުގަނޑުމެން ކަށަވަރުކުރަން އޮތީ އަޅުގަނޑުމެން ފަހަކަށް ނުޖެއްސޭނެޔޭ. ރައީސުލް ޖުމްހޫރިއްޔާ ކިތައްމެ ބާރަށް އުޅުއްވިއަސް" ޤާސިމް ވިދާޅުވިއެވެ.

ބުދަ ދުވަހުގެރޭގެ ޖަލްސާއަށް ރައީސް ޔާމީން ފެކްޝަނުގައި ކުރިން ހުންނެވި މަޑުއްވަރީ ދާއިރާގެ މެންބަރު މުހައްމަދު އަމީތާއި ވިލިނގިލީ ދާއިރާގެ މެންބަރު ސައުދު ހުސައިން ވަޑައިގެންނެވީތީ މަރުހަބާ ދަންނަވަމުން ޤާސިމް ވިދާޅުވީ ދެން އެަކަމެއް ނުހުއްޓުވޭނެ ކަމަށާއި މެންބަރުން ވަޑައިގެން އެހަރަކާތާ ގުޅެމުންދާނެ ކަމަށެވެ.

"މިކަމެއް ނުހުއްޓުވޭނެ. ޖުމްހޫރީ ޕާޓީން ދިޔަ މެންބަރުންވެސް އަންނާނެ. އަޅުގަނޑު މާދަމާ ޖަލަށް ފޮނުވިދާނެ. އެކަމަކު މިސައްކަތެއް ނުހުއްޓުވޭނެ. މިރޫހު މަރައެއް ނުލެއްވޭނެ. އަޅުގަނޑު ދަންނަވާނީ މަނިކުފާނު އަވަހަށް ފުރައްވަން އުޅުއްވާށޭ." ޤާސިމް ވިދާޅުވިއެވެ.

ރާއްޖެ އެތައް ތަނަކުން ދަރަނިވެރިވެފައިވާ ކަމަށާއި ކުޑަޚަރަދަކުން ކުރެވޭ ކަންކަން އެތައް އަދަދަކުން ބޮޑުކޮށް ކުރުމަކީ އަވަސް ކުރުމުގެ ނަމުގައި ކުރެވޭނެ ކަންކަން ނޫން ކަމަށް ގާސިމް ވިދާޅުވި އެވެ. އެކަންކަން ކުރަން ޖެހޭ ޤާނޫނުތަކާއި ޤަވާއިދު ތަކުން ބޭރުން އެއްވެސް ކަމެއް ނުކުރެވޭނެ ކަމަށެވެ. އެހެންނަމަވެސް އެފަދަ ގޮތަކަށް ކަންކުރުމުން ކޮރަޕްޝަނެއް ނެތޭ ބުނުމަކީ ޖޯކެއް ކަމަށް ޤާސިމް ވިދާޅުވިއެވެ.  ޤާސިމް ވިދާޅުވީ އެމެރިކާގައި އޮންނަ ގޮތައް މާދަމާވެސް މިޑްޓަރމް އިލެކްޝަނެއް ބާއްވައިފިނަމަ ރައީސް ޔާމީނަށް 5 ޕަސެންޓްވެސް ނުލިބޭނެ ކަމަށެވެ.