ޕީޕީއެމް ނަމުގައި އުޅޭ ވަގުތީ ނުރަސްމީ ފެކްޝަނަކަށް އަޅުގަނޑު ވައްކެތް ނުކުރެވޭނެ: ސައުދު

ޕީޕީއެމުން ވަކިކުރީ ޤަވާއިދާ ޚިލާފަށް ކަމަށާއި، ޕީޕީއެމްގެ ނަމުގައި އުޅޭ ވަގުތީ ފެކްޝަނަކަށް ޕާޓީން ވަކި ނުކުރެވޭނެ ކަމަށް ޕީޕީއެމުން މިއަދު ވަކިކުރި ރައްޔިތުންގެ މަޖިލީހުގެ ވިލިނގިލީ ދާއިރާގެ މެންބަރު ސައުދު ހުސައިން ވިދާޅުވެއްޖެއެވެ.

ސައުދު މިހެން ވިދާޅުވީ ޕީޕީއެމުން އޭނާ ވަކިކުރުމާއި ގުޅިގެން ހޯމަ ދުވަހު ކުރެއްވި ޓްވީޓެއްގައެވެ.

ސައުދު ކުރެއްވި ޓްވީޓްގައި ވިދާޅުވެފައި ވަނީ ޕީޕީއެމްއިން އޭނާ ވަކިނުކުރެވޭނެ ކަމަށާއި ވަކިކުރީ ޤަވާއިދާ ޚިލާފަށް ޕީޕީއެމް ނަމުގައި އުޅޭ ނުރަސްމީ ވަގުތީ ފެކްޝަނަކުން ކަމަށެވެ. ނޭޝަން ފަސްޓް (ފުރަތަމަ ޤައުމު) ހޭޝް ޓެގަކާއެކު ކުރައްވާފައިވާ މި ޓުވީޓް ނިންމަވާ ލައްވަމުން ބޭރުކުރީތީ އުފާ ކުރާކަމަށް ވިދާޅުވެފައިވެއެވެ.

ސައުދު މިގޮތައް ޓްވީޓް ކުރައްވާފައި މިވަނީ ދެ ފެކްޝަނަކަށް ބެހިފައިވާ ޕީޕީއެމްގެ މުސްތަޝާރު ރައީސް ޔާމީންގެ ފެކްޝަނުން އޭނާ ވަކިކޮށްފައި ވަނިކޮށެވެ.

ރާއްޖެ އެމްވީއަށް މައުލޫމާތު ލިބިފައިވާ ގޮތުގައި ރައީސް ޔާމީން ފެކްޝަންގެ ސުލޫކީ ކޮމެޓީން ސައުދު އެޕާޓީން ވަކިކުރައްވަން ނިންމެވީ ހޯމަ ދުވަހު ބޭއްވި އެކޮމެޓީގެ ބައްދަލުވުމުގައި ބައިވެރިވި 5 މެންބަރުންގެ އިއްތިފާގުންނެވެ.

ޕާޓީން ވަކިކުރިކަން އަންގައި ސައުދުއަށް ޕީޕީއެމް އިން ފޮނުވި ސިޓީގައި ވަނީ، ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމަށާއި މި ސަރުކާރަށް ތާއީދު ނުކުރައްވާކަމަށް ފާޅުގައި ވިދާޅުވަމުން ގެންދަވާ ބޭބޭފުޅުންނާއެކު މަސައްކަތް ކުރައްވަމުން ގެންދާކަމީ ޕާޓީގެ އަސާސީ ޤަވާއިދާ ހިލާފު ކަމެއް ކަމަށާއި، ޕާޓީގެ ފިކުރާއި ހިލާފަށް ފާޓީއާއި އަދި ސަރުކާރާއި އިދިކޮޅު ހަރަކާތްތައް ހިންގަމުން ގެންދާ ފަރާތްތަކާއެކު މަސައްކަތް ކުރައްވަމުން ގެންދަވާ ކަމަށެވެ. އަދި ފާޅުކަން ބޮޑު ގޮތަކަށް ސޯޝަލް މީޑިއާގައި އާއި އަދި ތަފާތު ފޯރަމްތަކުގައި ޕާޓީގެ އަސާސްތަކާއި ހިލާފަށް އަމަލުކުރައްވާ، ޕާޓީގެ ވިސްނުމާއި ފިކުރާއި ދެކޮޅަށް ވަކާލާތުކުރައްވަމުން ގެންދަވާކަން ސައުދުގެ ފަރާތުން ފާހަގަ ކުރެވިފައި ވާކަމަށެވެ.

އަދި ސުލޫކީ ކޮމެޓީއަށް ހުށަހެޅިފައިވާ މައްސަލަތައް ބެލި ބެލުމުން، ހުށަހެޅިފައިވާ މައްސަލައަށާއި ޕާޓީގެ އަސާސީ ޤަވާއިދާއި ކުރިން ފާހަގަކޮށްފައިވާ މައްސަލަތަކަށް ރިއާޔަތްކޮށް ޕާޓީގެ ސުލޫކީ މައްސަލަތަކާއި ބެހޭ ޤަވާއިދުގެ 15 ވަނަ މާއްދާގެ (ހ)ގެ 7 ވަނަ ނަމްބަރުގައިވާ ގޮތުގެ މަތިން، ސައުދު އެ ޕާޓީގެ މެމްބަރުކަމުން ވަކިކުރުމަށް ސުލޫކީ ކޮމެޓީން ނިންމާފައިވާ ކަމަށެވެ.

ސައުދު ޕީޕީއެމްއިން ވަކިކުރިއިރު އިދިކޮޅުފަރާތްތަކާއި ސައުދުވަނީ މީގެ ކުރިން ގުޅިވަޑައިގަންނަވާފައެވެ. ސައުދު އިދިކޮޅު ފަރާތްތަކާއި ގުޅިވަޑައިގެންނެވުމާއި އެކު ޕީޕީއެމްގެ ޕީޖީ ގްރޫޕްގެ ވައިބަރ ގުރޫޕުންވެސް ސައުދުވަނީ ބޭރުކޮށްފައެވެ.

ސައުދު ވަކިކޮށްފައި މިވަނީ ރައީސް މައުމޫނަކީ ޕީޕީއެމް ކަމަށާއި ޕީޕީއެމްއަކީ ރައީސްމައުމޫނު ކަމަށް ވިދާޅުވެ ރައީސް މައުމޫނާއެކު ކުރިއަށް ވަޑައިގަންނަވަން ނިންމާފައި ވަނިކޮށެވެ.

އިދިކޮޅު ފަރާތްތަކާ ގުޅުމާއެކު ސައުދާ އާއިލީގޮތުން ގާތް ބައެއް ފަރާތްތައް ވަނީ ސަރުކާރުގެ މަޤާމަތްކުންވެސް ވަކިކޮށްފައެވެ.