އަނިޔާއަށްފަހު ކުޅުމުގައި ބައިވެރިވުމަށް މިހުރީ ތައްޔާރަށް: އޮޒިލް

އަނިޔާއަށް ފަހު ކުޅުމުގައި ބައިވެރިވުމަށް ތައްޔާރަށް ހުރި ކަމަށް އާސެނަލަށް ކުޅެމުން އަންނަ ޖަރުމަންގެ މިޑްފިލްޑަރު މެސެޓް އޮޒިލް ބުނެފިއެވެ.

އާސެނަލްގެ ފަރިތަކުރުންތަކުގައި ބައިވެރިވުމަށްފަހު އޮޒިލް ކުރި ޓްވީޓެއްގައި އޭނާ ބުނީ ކުޅުމުގެ ތެރެއަށް އެނބުރި އައުމަށް ތައްޔާރަށް ހުރި ކަމަށެވެ. އެކަމަކު އާސެނަލްގެ ކޯޗު މިކޭލް އާޓެޓާ މި ސީޒަނުގައި އޮޒިލް ދެން ބޭނުން ނުކުރާނެ ކަމަށް މީޑިއާ ރިޕޯޓުތައް ބުނެއެވެ.

މީޑިއާއިން ކުރި ސުވާލަކަށް ޖަވާބު ދެމުން އާޓެޓާ ބުނީ އޮޒިލް މި ސީޒަނުގައި ދެން ފެނުމާމެދު އެއްޗެއް ބުނަން ނޭނގޭ ކަމަށާއި، އަނިޔާއިން ރަނގަޅުވެ އޮޒިލް އެނބުރި އައިކަމުގައި ވިޔަސް އާސެނަލްގެ ހާލަތު ބަދަލުނުވާނެ ކަމަށެވެ.

ކޮވިޑް-19ށް ފަހު އިނގިރޭސި ޕްރިމިއާ ލީގުގައި ކުޅުނު އެއްވެސް މެޗަކުން އޮޒިލް ފެނިފައިނުވާއިރު، އާޓެޓާ ބުނީ އޮޒިލް ނުކުޅެނީ އަނިޔާގެ ސަބަބުން ކަމަށެވެ. އުމުރުން 31 އަހަރުގެ މިޑްފިލްޑަރަށް އަނިޔާވީ އާސެނަލްގެ ފަރިތަކުރުންތަކުގެ ތެރެއިންނެވެ.

މީގެ ކުރިން އޮޒިލް ވަނީ އާސެނަލާއެކު ކުރިމަގެއް ނެތް ކަމަށް ބުނެފައެވެ. އަދި އޮޒިލް ބުނީ އޭނާ އާސެނަލާއެކު ހަދައިފައިވާ އެއްބަސްވުން އާކުރުމާމެދު ގޮތެއް ނުނިންމާ ކަމަށާއި، ސަބަބަކީ އާސެނަލާއެކު އޭނާއަށް ކުރިމަގު ނުފެންނާތީ ކަމަށެވެ. އަދި މިހާރު އޭނާގެ އަމާޒަކީ އޭނާ އަށާއި ޓީމަށް ކާމިޔާބު ހޯދުމަށް މަސައްކަތް ކުރުން ކަމަށާއި އެއަށްފަހު ވާނެ ގޮތެއް ބުނަން ނޭގޭ ކަމަށްވެސް އޮޒިލް ވަނީ ބުނެފައެވެ.

އާސެނަލްގައި އޮޒިލްގެ ކުރިމަގާމެދު ސުވާލު އުފެދުނު ނަމަވެސް، އޭނާ އަކީ އާސެނަލްގެ އެންމެ ބޮޑު މުސާރައެއް ލިބޭ ކުޅުންތެރިއާއެވެ. ހަފުތާއަކު އޮޒިލް އަށް ޖުމްލަ 350،000 ޕައުންޑް ލިބެއެވެ.

ޝާލްކާއިން ސީނިއާ ކެރިއަރު ފެށި އޮޒިލް ވަނީ ރެއާލް މެޑްރިޑާއެކުވެސް ކާމިޔާބު ދުވަސްތަކެއް ހޭދަކޮށްފައެވެ. 2013 ވަނަ އަހަރު ރެއާލް ދޫކޮށް އާސެނަލަށް ބަދަލުވި އޮޒިލް ވަނީ އާސެނަލްއަށް މިހާތަނަށް ކުޅެދިން 181 މެޗުން 32 ލަނޑު އެޓީމަށް ކާމިޔާބުކޮށްދީފައެވެ.