މުބާރާތުގައި ބައިވެރިވުމަށް މޯލްޑިވިއަންގެ ޓީމް ވިއެޓްނާމަށް ފުރައިފި

އޭޝިއަން މެންސް ކްލަބް ވޮލީބޯލް ޗެމްޕިއަންޝިޕްގައި ބައިވެރިވުމަށް ރާއްޖޭގެ ގައުމީ ޗެމްޕިއަން، މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބް ވިއެޓްނާމަށް ފުރައިފިއެވެ.

ވިއެޓްނާމުގައި މިމަހުގެ 28 އިން އަންނަ މަހުގެ 7 ވަނަ ދުވަހުގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ މި މުބާރާތަށް މޯލްޑިވިއަންގެ ޓީމް ފުރާފައިވަނީ 24 ވަނަ ދުވަގެ ރެއެވެ. އެގޮތުން މުބާރާތުގެ ގްރޫޕް ސްޓޭޖުގައި މޯލްޑިވިއަންގެ ޓީމުން ވާދަކުރަން ޖެހޭނީ ޗައިނާގެ ޗެމްޕިއަން، ބެއިޖިން މޮޓޯސް އާއި، ތައިލޭންޑްގެ ޗެމްޕިއަން، އެއާފޯސް ޓީމާއި ޖަޕާނުގެ ޗެމްޕިއަން، ޓޮޔޯޓާ ބޯސޭއާއެވެ.

މިއަހަރުގެ މުބާރާތުގައި ޖުމްލަ 14 ގައުމެއްގެ ޗެމްޕިއަނުން ބައިވެރިވާއިރު، މި މުބާރާތުގެ އެންމެ ފަހުގެ ޗެމްޕިއަން، އީރާނުގެ ސަރްމަޔާ ބޭންކްވެސް މުބާރާތުގައި ވާދަކުރެއެވެ.

ހުސްވި ހަފްތާގެ ތެރޭގައި ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެއިދާރާގެ ރައީސް މުހަންމަދު ލަތީފް (ލަތީބެ) ވިދާޅުވީ، އޭޝިއަން މެންސް ކްލަބް ވޮލީބޯލް ޗެމްޕިއަންޝިޕްގައި ރާއްޖޭގެ ގައުމީ ޗެމްޕިއަން މޯލްޑިވިއަން ވާދަކުރާއިރު އުންމީދަކީ މި މުބާރާތުން މޯލްޑިވިއަން ރަނގަޅު ކާމިޔާބީއެއް ހޯދުން ކަމަށެވެ. ލަތީބެ ވިދާޅުވީ ޓީމުން މުބާރާތަށް ވަމުންދާ ތައްޔާރީގައި އެސޯސިއޭޝަނުން އެއްބާރުލުންދޭ ކަމަށާއި އެސޯސިއޭޝަންގެ ފުރިހަމަ އެހީތެރިކަން ޓީމަށް ފޯރުކޮށްދެމުންދާ ކަމަށެވެ.

މި މުބާރާތަށް މޯލްޑިވިއަންގެ ޓީމުން ނިކުންނަނީ ފާއިތުވި ދެއަހަރުވެސް އެޓީމަށް ކާމިޔާބީ ހޯދައިދިން ކޯޗް އަބްދުﷲ ނާޝިދުގެ ބެލުމުގެ ދަށުންނެވެ.

ރާއްޖެއެމްވީއަށް ދިން އިންޓިވިއު އެއްގައި ކޯޗް އަބްދުﷲ ނާޝިދު ބުނީ، ރޯދަމަހާއި ދިމާވުމުން ޓީމުގެ ފަރިތަކުރުންތަށް ފެށުނީ ލަހުން ކަމަށާއި، ނަމަވެސް ފަރިތަކުރުންތަށް ފެށުމަށްފަހު ހުރިހާ ކަމެއްވެސް ދިޔައީ ވަރަށް ރަނގަޅަށް ކަމަށެވެ. އިތުރަށް ވާހަކަ ދައްކަމުން ނާޝިދް ބުނީ، މުބާރާތުގައި ވާދަކުރަން ޖެހެނީ ވަރަށް ވަރުގަދަ ޓީމުތަކާއި ދެކޮޅަށް ކަމަށާއި، އަމާޒަކީ މޮޅުވުން ނޫންކަމަށެވެ. އެގޮތުން ނާޝިދު ބުނީ މޮޅުވުމަށްވުރެ ބޮޑަށް މަސައްކަތް ކުރާނީ އިދިކޮޅު ޓީމުތަކަށް ރަނގަޅު ފައިޓެއްދީ ރަނގަޅު ތަޖުރިބާއެއް ހޯދުމަށް ކަމަށެވެ.

އޭޝިއާގެ ގައުމުތަކުގެ ޗެމްޕިއަން ކްލަބްތަކުގެ މެދުގައި ކުޅެވޭ މި މުބާރާތުގައި މިއީ ރާއްޖޭގެ ކްލަބެއް ވާދަކުރާ ދެވަނަ ފަހަރެވެ. މީގެ ކުރިން ދިވެހި ސިފައިންގެ ކްލަބް ވަނީ މި މުބާރާތުގައި ވާދަކޮށްފައެވެ.